ແຈ້ງໂຈະ!! ຖ້ຽວບິນ ເລກທີ QV701/QV702 ເສັ້ນບິນ ວຽງຈັນ-ຊໍາເໜືອ ເພື່ອລໍຖ້າຢັ້ງຢືນຮອງຮັບຂຶ້ນທະບຽນ ແລະ ປະເມີນຄວາມປອດໄພການບິນ
ວັນທີ 5 ພຶດສະພາ 2023, ກົມການບິນພົນລະເຮືອນ ໄດ້ອອກແຈ້ງເລກທີ 1377/ກບພຮ ກ່ຽວກັບ ການໂຈະການປະຕິບັດຖ້ຽວບິນ ເລກທີ QV701/QV702 ເສັ້ນບິນ ວຽງຈັນ-ຊໍາເໜືອ (ໜອງຄ້າງ) ວ່າ: ເພື່ອຮັບປະກັນຄວາມປອດໄພການບິນ ກໍຄືປະຕິບັດຕາມຄໍາແນະນໍາ ຂອງອົງການການບິນພົນລະເຮືອນສາກົນ ICAO, ໂດຍສະເພາະກົດໝາຍວ່າດ້ວຍ ການບິນພົນລະເຮືອນ ແລະ ລະບຽບການທີ່ກ່ຽວຂ້ອງ.
ສະນັ້ນ, ກົມການບິນພົນລະເຮືອນ ຈຶ່ງແຈ້ງມາຍັງລັດວິສາຫະກິດການບິນລາວ ໃຫ້ໂຈະການປະຕິບັດຖ້ຽວບິນ ໂດຍອີງໃສ່ໃບອະນຸຍາດແຜນບິນຂອງກົມການບິນພົນລະເຮືອນ ສະບັບເລກທີ 1307/ກບພຮ, ລົງວັນທີ 28 ເມສາ 2023. ວັນທີ 12 ພຶດສະພາ 2023 ຫາ 28 ຕຸລາ 2023 ຖ້ຽວບິນເລກທີ QV701/QV702 ເສັ້ນບິນ ວຽງຈັນ-ຊໍາເໜືອ (ໜອງຄ້າງ). ເນື່ອງຈາກວ່າ ສະໜາມບິນໜອງຄ້າງ ຢູ່ໃນຂັ້ນຕອນການຢັ້ງຢືນຮອງຮັບຂຶ້ນທະບຽນສະໜາມບິນ ແລະ ການປະເມີນຄວາມປອດໄພການບິນ.
ພາຍຫລັງສໍາເລັດແລ້ວກົມການບິນພົນລະເຮືອນ ຈຶ່ງຈະໄດ້ອະນຸມັດແຜນບິນດັ່ງກ່າວຕາມລະບຽບການ.
ດັ່ງນັ້ນ, ຈຶ່ງແຈ້ງມາຍັງທ່ານເພື່ອຊາບ ແລະ ຈັດຕັ້ງປະຕິບັດຕາມແຈ້ງການສະບັບນີ້ຢ່າງເຂັ້ມງວດດ້ວຍ.
