ໄລຍະຕົ້ນປີ 2023 ສາຂາໄຟຟ້ານະຄອນຫຼວງ 2 ພົບເຫັນຄົນລັກໃຊ້ໄຟ ເສຍຫາຍຫລາຍກວ່າ 100 ຕື້ກີບ

ສູນຂໍ້ມູນຂ່າວສານ ລັດວິສາຫະກິດໄຟຟ້າລາວ ລາຍງານ ວັນທີ 6 ພຶດສະພາ 2023 ນີ້ວ່າ: ໄລຍະຕົ້ນປີ 2023 ທີ່ຜ່ານມາ ຈົນເຖິງປະຈຸບັນ ລັດວິສາຫະກິດໄຟຟ້າລາວ ສາຂາໄຟຟ້ານະຄອນຫລວງ2 ທີ່ຂຶ້ນກັບຝ່າຍຄຸ້ມຄອງລະບົບໄຟຟ້າພາກກາງ ໄດ້ກວດພົບເຫັນຄົນລັກໃຊ້ໄຟ ເປັນຈໍານວນຫລາຍ ລວມມູນຄ່າຄວາມເສຍຫລາຍກວ່າ 100 ຕື້ກວ່າກີບ ທຽບໃສ່ປີ 2022 ເພີ່ມຂຶ້ນ 70 ຕື້ກວ່າກີບ.

ພາຍຫລັງໄດ້ຮັບເບາະແສ ລັດວິສາຫະກິດໄຟຟ້າລາວ ຮ່ວມກັບອໍານາດການປົກຄອງ ແລະ ປກສ ໄດ້ລົງກວດສອບ ແລະ ກວດພົບເຫັນການລັກໃຊ້ໄຟ ໃນນັ້ນປະກອບມີ: ປະເພດກະສິກຳເພື່ອການຄ້າ ຈໍານວນ 1 ລູກຄ້າ, ປະເພດທີ່ຢູ່ອາໄສ ຈໍານວນ 18 ຈຸດ, ປະເພດທຸລະກິດຄ້າຂາຍທົ່ວໄປ ຈໍານວນ 3 ຈຸດ, ບິດຄອຍ 7 ຈຸດ ແລະ ປະເພດອຸດສາຫະກໍາ ຈໍານວນ 3 ຈຸດ

ເຊິ່ງການລັກໃຊ້ໄຟແມ່ນໄດ້ນໍາໃຊ້ຮູບແບບຄື: ການລັກຕໍ່ຕົງ, ລັກດັດແປງຂໍ້ມູນ, ລັກດັດແປງພາຍນອກ, ລັກຊ໋ອດສາຍ CT-VT ແລະ ນໍາໃຊ້ເຄື່ອງມືທັນສະໄໝເຂົ້າໃນການດັດແປງອຸປະກອນໝໍ້ນັບໄຟ ທີ່ນໍາໄປສູ່ຄວາມເສຍຫາຍ.

ເຮັດໃຫ້ ລັດວິສາຫະກິດໄຟຟ້າລາວ ໄດ້ຮັບຜົນກະທົບ ແລະ ເສຍຫາຍເປັນຕົ້ນ ການເກັບກໍາຂໍ້ມູນ ແລະ ພະລັງງານຕົກເຮ່ຍ ຕໍ່ກັບເຫດດັ່ງກ່າວ ລັດວິສາຫະກິດໄຟຟ້າລາວ ກໍ່ບໍ່ໄດ້ນິ້ງນອນໃຈ ແລະ ໄດ້ເອົາໃຈໃສ່ລົງຕິດຕາມກວດກາ ແລະ ຫາວິທີປ້ອງກັນຢ່າງຫັດກຸມ. ການລັກໃຊ້ໄຟ ຫລື ດັດແປງຂໍ້ມູນ ມີຄວາມຜິດທາງດ້ານກົມໝາຍອາຍາ ຜູ້ກະທຳຜິດຈະໄດ້ຮັບໂທດ ທັງຈໍາທັງປັບ ຫາກທ່ານໃດພົບເຫັນຄົນລັກໃຊ້ໄຟ ສາມາດແຈ້ງມາຍັງໝາຍເລກໂທລະສັບ: 020 95582472 (ສ່ວນຂໍ້ມູນຂອງຜູ້ທີ່ໂທແຈ້ງ ທາງ ຟຟລ ຈະປິດເປັນຄວາມລັບ ພ້ອມທັງສົມມະນາຄຸນໃຫ້ແກ່ຜູ້ທີ່ແຈ້ງເບາະແສອີກດ້ວຍ)