ປກສ ນະຄອນໄກສອນ ແຂວງສະຫວັນນະເຂດ ຈັບກຸ່ມຄ້າຂາຍຢາເສບຕິດ ໄດ້ 7 ຄົນ ພ້ອມຂອງກາງຢາບ້າ 72 ພັນກວ່າເມັດ.

ພັທ ຄໍາສີ ທູນທະວົງສັກ ຫົວໜ້າກອງບັນຊາການ ປກສ ນະຄອນໄກສອນພົມວິຫານໃຫ້ຮູ້ວ່າ:  ວັນທີ 27 ເມສາ 2023 ຜ່ານມານີ້ ເຈົ້າໜ້າທີ່  ປກສ ນະຄອນໄກສອນພົມວິຫານ, ລົງເຄື່ອນໄຫວຕິດຕາມເປົ້າໝາຍຄ້າຂາຍຢາເສບຕິດ ຢູ່ເຂດບ້ານຫົວເມືອງໃຕ້ ນະຄອນໄກສອນພົມວິຫານ ແລະ ສາມາດກັກຕົວ ໄດ້ 2 ຄົນເບື້ອງຕົ້ນ ທ້າວ ພູສະນະ ຫຼື ບັອບ ອາຍຸ18 ປີ ປະຊາຊົນ ຢູ່ ບ້ານ ຫົວເມືອງໃຕ້ ນະຄອນໄກສອນພົມວິຫານ, ພ້ອມຂອງກາງຢາບ້າ 5 ເມັດ, ລົດຈັກ 1 ຄັນ ແລະ ທ້າວ ພູສະນະ ໃຫ້ການວ່າ: ຢາຈໍານວນດັ່ງກ່າວແມ່ນເອົາມາຈາກ ທ້າວແຈັກກີ້ ຫຼື ກີ້ ອາຍຸ 27 ປີ ປະຊາຊົນ ຢູ່ບ້ານຫົວເມືອງໃຕ້, ຈາກນັ້ນກໍ່ໄດ້ເຂົ້າກັກຕົວ ທ້າວແຈັກກີ້ຫຼື ກີ້ ຢູ່ເຮືອນຜູ້ກ່ຽວ.

ຕໍ່ມາ ໃນວັນທີ 28 ເມສາ 2023 ໄດ້ກັກຕົວ

• ນາງ ສຸລິຍາ ຫຼື ອື່ງ ອາຍຸ 33 ປີ ປະຊາຊົນ ຢູ່ ບ້ານໜອງເດີ່ນ ນະຄອນໄກສອນພົມວິຫານ ພ້ອມຂອງຂອງກາງຢາເສບຕິດ 115 ເມັດ ໂທລະສັບ 01 ໜ່ວຍ, ນາງສຸລິຍາໃຫ້ການວ່າ: ຢາຈໍານວນດັ່ງກ່າວແມ່ນເອົານໍາ ທ້າວ ສີລາ ຫຼື ແສນ ອາຍຸ 42 ປີ ປະຊາຊົນ ຢູ່ ບ້ານຫົວເມືອງໃຕ້ ນະຄອນໄກສອນ.
• ກັກຕົວ ທ້າວ ສີລາ ຫຼື ແສນ ຢູ່ເຮືອນຜູ້ກ່ຽວ, ທ້າວ ທອງຈັນ ຫຼື ບຽ້ວ ອາຍຸ 27 ປີ ປະຊາຊົນຢູ່ບ້ານ ຫົວເມືອງໃຕ້ນະຄອນໄກສອນ, ຂອງກາງຢາບ້າຈຳນວນ 4 ຖົງ ເທົ່າກັບ 797 ເມັດ , ໂທລະສັບ 01 ໜ່ວຍ.
• ທ້າວ ໄຊຍະສິດ ຫຼື ຕາຕີ໋ ອາຍຸ 42 ປີ ປະຊາຊົນ ຢູ່ບ້ານ ທ່າເມືອງ ນະຄອນໄກສອນ, ພ້ອມຂອງກາງຢາເສບຕິດ (ຢາບ້າ) ຈໍານວນ 01 ມັດ ກັບ07 ຖົງນ້ອຍ ລວມທັງໝົດ 1.349 ເມັດ, ລົດຈັກ ຢາມາຮາ ຟີໂນ້ 1ຄັນ, ທ້າວໄຊຍະສິດ ໃຫ້ການຕໍ່ເຈົ້າໜ້າທີ່ວ່າ: ຢາຈໍານວນດັ່ງກ່າວແມ່ນເອົານໍາ ທ້າວ ແກ້ວອຸດອນ ຫຼື ແອ ອາຍຸ 54 ປີ ອາຊີບ ປະຊາຊົນ ຢູ່ບ້ານ ສະບູໄຊ ເມືອງ ສອງຄອນ ແຂວງສະຫວັນນະເຂດ.
• ໜ່ວຍງານວິຊາສະເພາະກໍ່ໄດ້ລົງຕິດຕາມ ແລະກັກຕົວ ທ້າວ ແກ້ວອຸດອນ ຫຼືແອ ໃນວັນດຽວກັນ ພ້ອມພາຫະນະ ລົດກະບະ ຢີ່ຫໍ້ ໂຕໂຍຕ້າ ລີໂວ້ ສີປອນ 1ຄັນ, ຜ່ານການກວດຄົ້ນລົດຄັນດັ່ງກ່າວ ພົບເຫັນຂອງກາງຢາເສບຕິດຢູ່ໃນລົດ ຈໍານວນ 34 ມັດ ເທົ່າກັບ 68.000 ເມັດ, ໂທລະສັບ 3 ໜ່ວຍ, ປະຈຸບັນຄະດີດັ່ງກ່າວ ຍັງຢູ່ໃນຂັ້ນຕອນ ການ ສືບສວນ-ສອບສວນ ຂອງເຈົ້າໜ້າທີ່ເພື່ອ ປະກອບສໍານວນສົ່ງໄອຍະການ ຟ້ອງສານດຳເນີນຄະດີຕາມລະບຽບກົດໝາຍ.