ສົ່ງຕົວຜູ້ຖືກຫາຄະດີຟອກເງິນ ແລະ ຄະດີຢາເສບຕິດ ທີ່ຫລົບໜີມາລີ້ຢູ່ລາວ ໃຫ້ຕໍາຫຼວດໄທ ເພື່ອດໍາເນີນຄະດີ

ວັນທີ 5 ພຶດສະພາ 2023 ທີ່  ກົມຕໍາຫຼວດສືບສວນ-ສອບສວນ ກົມໃຫຍ່ຕໍາຫຼວດ ກະຊວງ ປກສ ມອບຜູ້ຖືກຫາ 2 ຄົນ ໃຫ້ເຈົ້າໜ້າທີ່ຕໍາຫຼວດຣາຊະອານາຈັກໄທ ທີ່ໄດ້ກະທໍາຜິດແລ້ວເອົາມາລີ້ຊ້ອນຢູ່ ສປປ ລາວ,  ໂດຍ ພັທ ສິງແກ້ວ ວົງພະຈັນ ຮອງຫົວໜ້າກົມຕໍາຫຼວດສືບສວນ-ສອບສວນ ແລະ ພັອ ກິດມົງຄົນ ບູລະນະພັກດີ ຜູ້ກັບກໍາຕໍາຫຼວດກວດຄົນເຂົ້າ-ອອກເມືອງ ຈັງຫວັດໜອງຄາຍ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ພັທ ສິງແກ້ວ ວົງພະຈັນ ໃຫ້ຮູ້ວ່າ: ຜູ້ຖືກຫາສອງຄົນ ຊື່ ທ້າວ ທົງໄຊ ພະນິນທອນ ອາຍຸ 42 ປີ ແລະ ທ້າວ ສັງກາດ ພັນທຸລີ ອາຍຸ 31 ປີ ທັງສອງເປັນຄົນສັນຊາດໄທ ທີ່ກະທໍາຜິດ ແລະ ໄດ້ເອົາຕົວຫຼົບໜີມາລີ້ຊhອນຢູ່ ສປປ ລາວ, ກົມໃຫຍ່ຕໍາຫຼວດກະຊວງປ້ອງກັນຄວາມສະຫງົບ ສປປ ລາວ, ໄດ້ຮັບໜັງສືຂໍຄວາມຮ່ວມມືຈາກຕໍາຫຼວດໜອງຄາຍຣາຊະອານາຈັກໄທ ໃຫ້ຕິດຕາມຈັບຕົວຜູ້ຖືກຫາຄົນສັນຊາດໄທ ທີ່ກະທໍາຜິດເອົາຕົວມາລີ່ຊhອນຢູ່ ສປປ ລາວ. ຈາກນັ້ນເຈົ້າໜ້າທີ່ຕໍາຫຼວດ ສປປ ລາວ ຈຶ່ງຕິດຕາມ ແລະ ສາມາດຈັບຕົວໄດ້ສໍາເລັດ.

ທ້າວ ທົງໄຊ ຢູ່ອໍາເພີບ້ານໝໍ ຕໍາບົນບາງໂຊກ ຈັງຫວັດສະລະບູລີ ມີຄໍາສັ່ງຈັບຕົວຂອງສານສາລະບູລີ ໃນຂໍ້ຫາກະທໍາຜິດຖານຟອກເງິນ ແລະ ເອົາຕົວມາຫຼົບໜີລີ່ຊ່ອນຢູ່ ສປປ ລາວ, ສ່ວນທ້າວ ສະກາດ ມີຄໍາສັ່ງຈັບຕົວຂອງຈັງຫວັດອຸບົນລາດຊະທານີ ໃນຂໍ້ຫາຮ່ວມກັນມີຢາເສບຕິດປະເພດ 1 ໄວ້ຄອບຄອງ; ທ້າວ ທົງໄຊ ໄດ້ລັກລອບເຂົ້າ ສປປ ລາວ ທີ່ແຂວງສະຫວັນນະເຂດ; ມາຮອດເດືອນພະຈິກ 2022 ໄດ້ພາກັນມາເຊົ່າຫ້ອງແຖວຢູ່ບ້ານໂຊກຄໍາ ເມືອງໄຊເສດຖາ ນະຄອນຫຼວຽງຈັນ ຕົກມາຮອດວັນທີ 22 ມັງກອນ 2023 ຈິ່ງຖືກເຈົ້າໜ້າທີ່ ສປປ ລາວ ຈັບຕົວຢູ່ຮ້ານຄາຣາໂອເກະ ບ້ານຮ່ອງໄກ່ແກ້ວ ເມືອງຈັນທະບູລີ.