ແມນຢູ ປະຕິເສດເຊັນຖາວອນ ເວກຮອສ ເຫດສອບຕົກ-ເລັງ 6 ດາວຍິງເສີມຄົມແທນ
ຢືນຢັນແລ້ວ ແມນຢູ ຕັດສິນໃຈ ເວກຮອສ ບໍ່ໄດ້ໄປຕໍ່ ຫລັງສອບຕົກໄລຍະຢືມຕົວ ເຜີຍລາຍຊື່ 6 ດາວຍິງທີ່ເລັງໄວ້ເສີມຄົມແທນ.
ແມນເຊສເຕີ ອິຟນິ້ງ ນີວ ສື່ທ້ອງຖິ່ນຊື່ດັງລາຍງານວ່າ ແມນເຊສເຕີ ຢູໄນເຕັດ ທີມດັງພຣີເມຍລີກ ອັງກິດ ຕັດສິນໃຈບໍ່ເຊັນສັນຍາຄວ້າຕົວ ເວົາ ເວກຮອສ ກອງໜ້າທີມຊາດເນເທີແລນ ມາຮ່ວມງານແບບຖາວອນແນ່ນອນແລ້ວ ຫລັງຈາກສ້າງຜົນງານບໍ່ຜ່ານໃນໄລຍະຢືມຕົວມາຈາກ ເບີນລີ ໃນຕະຫລາດນັກເຕະລະດູໜາວ ເດືອນມັງກອນທີ່ຜ່ານມາ.
ເຖິງວ່າ ເວກຮອສ ຈະໄດ້ລົງເປັນ 11 ຕົວຈິງໃຫ້ ແມນຢູ ຕະຫລອດ 19 ນັດທຳອິດທີ່ຍ້າຍມາ ແລະ ສ້າງຄວາມປະທັບໃຈໃຫ້ກັບແຟນບານໄລຍະທຳອິດຈາກຮູບແບບການຫລິ້ນທີ່ຂະຫຍັນທຸ່ມເທ ແຕກໍບໍ່ສາມາດຍິງປະຕູຊ່ວຍທີມ ຫລືສ້າງຄວາມແຕກຕ່າງໄດ້ຫລາຍເທົ່າທີ່ຄວນ ໂດຍຍິງໄດ້ພຽງ 2 ປະຕູ 3 ແອສຊິສ ຈາກການລົງຫລິ້ນລວມທຸກລາຍການທັງຫມົດ 26 ນັດ ເຊິ່ງໄລຍະຫລັງກໍເລີ່ມຫລຸດໄປເປັນຕົວສຳຮອງແລ້ວ.
ເຮັດໃຫ້ຫລັງຈົບລະດູການນີ້ ແມນເຊສເຕີ ຢູໄນເຕັດ ກຽມສົ່ງຕົວ ເວກຮອສ ກັບໄປຍັງ ເບີນລີ ເຊິ່ງລາວຍັງເຫລືອສັນຍາຈົນເຖິງເດືອນມິຖຸນາ ປີ 2025 ແຕ່ດາວຍິງອາຍຸ 30 ປີ ອາດໄດ້ກັບມາຫລິ້ນໃນພຣີເມຍລີກອີກເທື່ອຫນຶ່ງ ຫລັງຈາກ ເບີນລີ ຫາກໍເລື່ອນຊັ້ນຂຶ້ນມາໃນຖານະແຊ໊ມຂອງແຊ໊ມປຽນຊິບ.
