ປິດສາກ 8 ປີ ມິລເນີ ອຳລາ ລີເວີພູລ ຍ້າຍຊົບ ໄບຣຕັນ ຫລັງຈົບລະດູການນີ້
ຟາບີຊີໂອ ໂຣມາໂນ ນັກຂ່າວຄົນດັງລາຍງານວ່າ ເຈມ ມິລເນີ ກອງກາງປະສົບການຫລາຍຂອງ ລີເວີພູລ ບັນລຸຂໍ້ຕົກລົງໃນການຍ້າຍໄປຮ່ວມທີມ ໄບຣຕັນ ແບບບໍ່ມີຄ່າຕົວຫລັງຈົບລະດູການນີ້ ພ້ອມປິດສາກໄລຍະເວລາ 8 ປີກັບ ລີເວີພູລ.
ໂດຍ ມິລເນີ ຍ້າຍຈາກ ແມນເຊສເຕີ ຊິຕີ ມາຢູ່ກັບ ລີເວີພູລ ຕັ້ງແຕ່ປີ 2015 ເຊິ່ງລາວກໍມີສ່ວນໃນການພາທີມຄວ້າແຊ໊ມມາຄອງຫລາຍລາຍການ ທັງ ພຣີເມຍລີກ ອັງກິດ, ຢູຟາ ແຊ໊ມປຽນ ລີກ, ເອຟເອ ຄັບ, ຄາຣາບາວ ຄັບ ແລະ ຟີຟາ ຄລັບ ເວີນ ຄັບ ເປັນຕົ້ນ.
ແນວໃດກໍຕາມດາວເຕະອາຍຸ 37 ປີລາຍນີ້ ພວມຈະຫມົດສັນຍາກັບ ລີເວີພູລ ຫລັງຈົບລະດູການນີ້ ແຕ່ຍັງບໍ່ມີການຂະຫຍາຍອອກໄປ ທ່າມກາງຂ່າວລືວ່າ ລາວຕ້ອງການຍ້າຍອອກຈາກທີມໄປຫາຄວາມທ້າທາຍໃຫມ່ໆ ໂດຍມີ ໄບຣຕັນ ເປັນທີມທີ່ຈະເຊັນສັນຍາ.
ຫລ້າສຸດ ໂຣມາໂນ ເຜີຍວ່າ ມິລເນີ ບັນລຸຂໍ້ຕົກລົງໃນການຍ້າຍໄປຫລິ້ນຢູ່ກັບ ໄບຣຕັນ ແບບບໍ່ມີຄ່າຕົວຫລັງຈົບລະດູການນີ້ດ້ວຍສັນຍາ 1 ປີ ຫລື ເຖິງເດືອນ ມິຖຸນາ ປີ 2024 ໂດຍຂະນະນີ້ເຫລືອພຽງການເຊັນສັນຍາຢ່າງເປັນທາງການເທົ່ານັ້ນ.
