ຢູ່ເມືອງປາກຊ່ອງ ມີການລົງທຶນ 96 ໂຄງການ ມູນຄ່າ 98,8 ຕື້ກີບ

ວັນທີ 4 ພຶດສະພາ ຜ່ານມາ, ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ ພ້ອມຄະນະ ໄດ້ລົງເຄື່ອນໄຫວຢ້ຽມຢາມຊຸກຍູ້ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ການຈັດຕັ້ງປະຕິບັດ 2 ວາລະແຫ່ງຊາດ ຢູ່ເມືອງປາກຊ່ອງ, ມີ ທ່ານ ພິມພອນ ພັນດານຸວົງ ເຈົ້າເມືອງປາກຊ່ອງ ພ້ອມດ້ວຍຄະນະ ໃຫ້ການຕ້ອນຮັບ.

ທ່ານ ພິມພອນ ພັນດານຸວົງ ເຈົ້າເມືອງປາກຊ່ອງ ໄດ້ລາຍງານ ກ່ຽວກັບ ການນໍາພາ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 3 ເດືອນຕົ້ນປີ 2023 ແລະ ການຈັດຕັ້ງປະຕິບັດ 2 ວາລະແຫ່ງຊາດ ຊຶ່ງຕະຫຼອດໄລຍະຜ່ານມາ ພາຍໃຕ້ການນຳພາຢ່າງໃກ້ຊິດຂອງອົງຄະນະພັກແຂວງຈຳປາສັກ ກໍຄືອົງຄະນະພັກເມືອງປາກຊ່ອງ ໄດ້ເອົາໃຈໃສ່ຢ່າງຕັ້ງໜ້າ ໃນການປະຕິບັດໜ້າທີ່ລວມ, ຄາດໝາຍສູ້ຊົນ ແລະ ວຽກງານຈຸດສຸມທີ່ໄດ້ກຳນົດໄວ້ ໂດຍກຳນົດເອົາການພັດທະນາເສດຖະກິດ ຕິດພັນກັບການຄຸ້ມຄອງ, ປົກປັກຮັກສາສິ່ງແວດລ້ອມ ເປັນໃຈກາງ, ຖືເອົາການສົ່ງເສີມຜະລິດກະສິກຳເປັນສິນຄ້າ ຕິດພັນກັບການປຸງແຕ່ງ ເປັນຕົ້ນ ກາເຟ, ພືດຜັກ, ຊາຕົ້ມນ້ຳ ແລະ ອື່ນໆ ໂດຍຊຸກຍູ້ໃຫ້ຂະແໜງການເປັນເຈົ້າການປະຕິບັດພາລະບົດບາດ, ຄວາມຮັບຜິດຊອບຂອງຕົນ ຢ່າງເຂັ້ມງວດ ພ້ອມທັງປະສານສົມທົບກັບບັນດາ ໂຄງການລົງທຶນຂອງເອກະຊົນພາຍໃນ – ຕ່າງປະເທດ ມີຢູ່ໃນເມືອງຈຳນວນ 96 ໂຄງການ ມູນຄ່າ 98,8 ຕື້ກີບ ຫຼື ເທົ່າກັບ 10,9 ລ້ານໂດລາ. ເສດຖະກິດຂອງເມືອງມີການຂະຫຍາຍຕົວດີສົມຄວນ ແລະ ມີຈັງຫວະທີ່ໝັ້ນທ່ຽງ ສະແດງອອກໄລຍະ 3 ເດືອນຕົ້ນປີ 2023 ມູນຄ່າລວມຍອດມູນຄ່າຜະລິດຕະພັນພາຍໃນຂອງເມືອງ ປະຕິບັດໄດ້ 1.637,74 ຕື້ກີບ ທຽບໃສ່ແຜນປີປະຕິບັດໄດ້ 35,15%. ສະເລ່ຍຕໍ່ຫົວຄົນເທົ່າກັບ 17.978.374 ກີບຕໍ່ຄົນ ຫຼື 1.057 ໂດລາຕໍ່ຄົນ.

ໂຄງປະກອບເສດຖະກິດຂະແໜງກະສິກຳ ກວມເອົາ 89,69%, ຂະແໜງອຸດສາຫະກຳກວມເອົາ 4,32% ແລະ ຂະແໜງບໍລິການກວມເອົາ 5,97% ຂອງລວມຍອດລາຍຮັບຜະລິດຕະພັນພາຍໃນ. ຄຽງຄູ່ກັບການພັດທະນາເສດຖະກິດ ວຽກງານວັດທະນະທຳ-ສັງຄົມ ກໍໄດ້ຮັບການປັບປຸງ ແລະ ພັດທະນາຢ່າງຕັ້ງໜ້າ ບັນດາຕົວຊີ້ວັດ ວຽກສຶກສາທິການ-ກິລາ, ວຽກສາທາລະນະສຸກ ວາງອອກ ເປັນຕົ້ນ ການຮຽນ-ການສອນ; ການຊົມໃຊ້ການບໍລິການກອງທຶນປະກັນສຸຂະພາບແຫ່ງຊາດຢູ່ຂັ້ນເມືອງ ຢ່າງທົ່ວເຖິງ.

ທ່ານ ວິໄລວົງ ບຸດດາຄໍາ ໄດ້ເນັ້ນໃຫ້ຄະນະພັກ-ອົງການປົກຄອງເມືອງປາກຊ່ອງ ເອົາໃຈໃສ່ຈັດຕັ້ງຜັນຂະຫຍາຍບັນດາມະຕິ, ຄຳສັ່ງຕ່າງໆ ໂດຍສະເພາະຕ້ອງຜັນຂະຫຍາຍເນື້ອໃນຈິດໃຈ ມະຕິກອງປະຊຸມວຽກງານການເມືອງ-ແນວຄິດ ທົ່ວປະເທດ ຄັ້ງທີ V, ກໍຄືມະຕິກອງປະຊຸມວຽກງານການເມືອງ-ແນວຄິດ ທົ່ວແຂວງ ເພື່ອສຶກສາອົບຮົມໃຫ້ ແກ່ພະນັກງານ ສະມາຊິກພັກ ແລະ ປະຊາຊົນບັນດາເຜົ່າໃຫ້ມີຄວາມໜັກແໜ້ນ ແລະ ຮັບຮູ້ເຂົ້າໃຈຢ່າງເລິກເຊິ່ງ, ມີສະຕິຕອບຕ້ານການໂຄສະນາໃສ່ຮ້າຍປ້າຍສີ ຂອງກຸ່ມຄົນບໍ່ຫວັງດີ ຜ່ານສື່ສັງຄົມອອນລາຍ, ຮັບປະກັນເຮັດໃຫ້ເມືອງມີຄວາມສະຫງົບ ປອດໄພ ຮອບດ້ານ, ສືບຕໍ່ຕິດຕາມກວດກາບັນຫາຄົນເຂົ້າ-ອອກເມືອງ ຍົກຍ້າຍຖິ່ນຖານ ຕິດພັນກັບການແກ້ໄຂບັນຫາຢາເສບຕິດ ແລະ ບັນຫາ ການບຸກລຸກ ລັກລອບ ຈູດທຳລາຍປ່າ, ກໍາໄດ້ກຸ່ມເປົ້າໝາຍຕ່າງໆ, ຕັ້ງໜ້າແກ້ໄຂປະກົດການຫຍໍ້ທໍ້ຕ່າງໆທີ່ເກີດຂຶ້ນ ໃຫ້ຫຼຸດໜ້ອຍຖອຍລົງ, ຄຽງຄູ່ກັບການຊຸກຍູ້ຂະບວນການຕ່າງໆຂອງອົງການຈັດຕັ້ງມະຫາຊົນ ຢ່າງເລິກເຊິ່ງ ແລະ ໃນໂອກາດນີ້, ທ່ານເຈົ້າແຂວງຈໍາປາສັກ ຍັງໄດ້ມອບຊຸດອຸປະກອນ ປະຊຸມທາງໄກ, ຄອມພິວເຕີໂນດບຸກ ແລະ ເງິນຈໍານວນໜຶ່ງ ໃຫ້ເມືອງປາກຊ່ອງ ນຳອີກ.

ຂ່າວ: ທັດຊະນະ, ພາບ: ພູທິບສະຫວັນ