ເປີດສາກແລ້ວເປຕັງທົ່ວປະເທດຊີງຂັນພະນະທ່ານນາຍົກລັດຖະມົນຕີ ຄັ້ງທີ 9
ເປີດສາກຢ່າງເປັນທາງການ, ການແຂ່ງຂັນເປຕັງທົ່ວປະເທດ ຊີງຂັນພະນະທ່ານນາຍົກລັດຖະມົນຕີແຫ່ງ ສປປ ລາວ ລະຫວ່າງວັນທີ 29-31 ມີນາ 2017 ເພື່ອເປັນການຄັດເລືອກນັກກິລາຜູ້ທີ່ມີພອນສະຫວັນດີເດັ່ນ ເພື່ອຕິດ ທີມຊາດກຽມເຂົ້າແຂ່ງຂັນງານມະຫະກຳກິລາຊີເກມ ຄັ້ງທີ 29 ທີ່ປະເທດມາເລເຊຍເປັນເຈົ້າພາບ ລະຫວ່າງວັນທີ 19-31 ສິງຫາ 2017 ທີ່ສະໜາມກິລາເປຕັງແຫ່ງຊາດ ວິທະຍາເຂດດົງໂດກ ເມືອງໄຊທານີ ນະຄນຫຼວງວຽງຈັນ ເຊິ່ງມີນັກກິລາຈາກ 14 ແຂວງ, 1 ນະຄອນຫຼວງວຽງຈັນ, 8 ກະຊວງ ແລະ 3 ສະຖາບັນ ເຂົ້າຮ່ວມ. ຂະນະທີ່ບໍລິ ສັດ ເບຍລາວ ຈຳກັດ ສືບຕໍ່ໃຫ້ການສະໜັບສະໜູນຫຼັກລວມມູນຄ່າ 108 ລ້ານກີບ.
ໂອກາດນີ້ ທ່ານ ຄຳຫຼ້າ ວິນໄລທອງ ກ່າວວ່າ: ເພື່ອເປັນການຄັດເລືອກນັກກິລາຜູ້ທີ່ມີພອນສະຫວັນດີເດັ່ນກຽມ ຮັບໃຊ້ຊາດຮ່ວມແຂ່ງຂັນງານມະຫະກຳກິລາຊີເກມ ຄັ້ງທີ 29 ດັ່ງນັ້ນຈຶ່ງໄດ້ຈັດການແຂ່ງຂັນລາຍການດັ່ງກ່າວນີ້. ເຊິ່ງມີການຊີງໄຊກັນທັງໝົດ 5 ລາຍການປະກອບມີ ປະເພດດ່ຽວຍິງ-ຊາຍ, ທີມຄູ່ຍິງ, ທີມຊຸດຊາຍ ແລະ ທີມຄູ່ ອາວຸໂສ.
ສຳລັບລາງວັນຊະນະເລີດປະເພດດ່ຽວຍິງ-ຊາຍ ແລະ ທີມຄູ່ອາວຸໂສ ທີ 1 ຈຳໄດ້ຮັບຫຼຽນຄຳ ພ້ອມເງິນສົດ1.5 ລ້ານກີບ, ທີມ 2 ຫຼຽນເງິນ ພ້ອມເງິນລາງວັນ 8 ແສນກີບ, ທີ 3 ຫຼຽນທອງ ພ້ອມເງິນ 5 ແສນກີບ, ປະເພດທີມ ຄູ່ຍິງ ທີ 1 ຈະໄດ້ຮັບຫຼຽນຄຳ ພ້ອມເງິນສົດ 2 ລ້ານກິບ, ທີ 2 ຫຼຽນເງິນ ພ້ອມເງິນ 1 ລ້ານກີບ, ທີ 3 ຫຼຽນທອງ ພ້ອມເງິນ 5 ແສນກີບ ແລະ ປະເພດທີມຄູ່ຊາຍ ທີ 1 ຈະໄດ້ຮັບຫຼຽນຄຳ ພ້ອມເງິນ 5 ລ້ານກີບ, ທີ 2 ຫຼຽນເງິນ ພ້ອມເງິນ 2 ລ້ານກີບ ແລະ ທີ 3 ຫຼຽນທອງ ພ້ອມເງິນ 1 ລ້ານກີບ.
ຂ່າວຈາກ:http://laosportnews.com.
