ລັດຖະບານຊາອຸ ພ້ອມສະເໜີຄ່າແຮງ ທີ່ເປັນປະຫວັດສາດຂອງວົງການບານເຕະ ດຶງ ເມສຊີ່ ມາຫລິ້ນໃນໂປຣລີກຊາອຸ

ເດລີ ເທເລກຣາຟ ເປີດເຜີຍຂ່າວໃໝ່ວ່າ: ລັດຖະບານຊາອຸດິອາຣາເບຍ ພ້ອມສະເໜີຄ່າແຮງທີ່ເປັນປະຫວັດສາດໃນວົງການບານເຕະເພື່ອດຶງໂຕ ລີໂອເນວ ເມສຊີ່ ກອງໜ້າຂອງ ປາຣີ ແຊັງ-ແຊັກແມັງ ມາສູ່ອານາຈັກໂປຣລີກໃນລະດູການໜ້າ ຫລັງຈາກທີ່ດາວຍິງທີມຊາດອາເຈນຕິນາກຳລັງຈະໝົດສັນຍາກັບແຊ້ມລີກເອີງ.

ເມສຊີ່ ອາຍຸ 35 ປີ ກຽມຍ້າຍອອກຈາກ ສະໂມສອນ ປາຣິ ແຊັງ-ແຊັກແມັງ ໃນຊ່ວງພັກແລ້ງນີ້ ເພາະກຳລັງຈະໝົດສັນຍາກັບສະໂມສອນເສດຖີຂອງລີກຝຣັ່ງ, ຂະນະທີ່ ສະກາຍ ສະປອດ ເປີດເຜີຍວ່າ PSG ບໍ່ມີແຜນທີ່ຈະຕໍ່ສັນຍາກັບ ເມສຊີ່ ອະດີດນັກເຕະຂອງ ບາເຊໂລນາ ແຕ່ຢ່າງໃດ.

ໃນການເປັນອິດສະລະຫລັງຈົບລະດູການ, ເມສຊີ່ ເຊິ່ງຖືກຕົ້ນສັງກັດຫ້າມສອງອາທິດ ຂໍ້ຫາເດີນທາງໄປ ຊາອຸດີອາຣາເບຍ ໂດຍບໍ່ໄດ້ຮັບການອະນຸຍາດ, ແລະ ຫລ້າສຸດ ເມື່ອວັນທີ 3 ພຶດສະພາ ເທເລກາຟ ເປີດເຜີຍວ່າ ລັດຖະບານຂອງ ຊາອຸດິ ອາຣາເບຍ ພ້ອມແລ້ວທີ່ຈະຄວ້າດາວຍິງຊາວລາຕິນ ມາຮ່ວມ ສ້າງຄວາມຮຶຮາໃນລີກຂອງພວກເຂົາດ້ວຍການຈ່າຍຄ່າຈ້າງໃຫ້ກັບ ກອງໜ້າທີມສີຟ້າ-ຂາວ ເປັນປະຫວັດສາດສູງເຖິງ 320 ລ້ານປອນຕໍ່ປີ ຫລາຍກວ່າ ຄຣິສເຕຍໂນ ໂຣນັລໂດ້ ກອງໜ້າທີມຊາດປອກຕຸຍການ ທີ່ຍ້າຍມາຮ່ວມກັບ ອັລ-ນາສເຊີ ເຖິງປີ 2025 ແລກກັບຄ່າຈ້າງປີລະ 165 ລ້ານປອນ ປະເພດທີ່ທຽບກັນບໍ່ໄດ້.