ປະທານເທັນນິດລາວ ເນັ້ນນັກກິລາ ສູ້ສຸດຄວາມສາມາດ ສ້າງຜົນງານເຂົ້າຮອບເລິກໆ ໃນຊີເກມ

ປະທານສະຫະພັນເທັນນິດແຫ່ງຊາດລາວ ເນັ້ນໜັກຄະນະນັກກິລາເທັນນິດທີມຊາດລາວ ພະຍາຍາມສູ້ຊົນສຸດຄວາມສາມາດ ຍາດໃຫ້ໄດ້ໄຊຊະນະເພື່ອສ້າງກຽດສັກສີ ແລະ ຊື່ສຽງ ມາສູ່ປະເທດຊາດ ເວົ້າສະເພາະແມ່ນໃຫ້ບັນລຸເຂົ້າຫວັງຜ່ານເຂົ້າສູ່ຮອບເລິກໆ ທີ່ຈະສົ່ງເຂົ້າຮ່ວມຊີງໄຊ 7 ລາຍການ ໃນງານມະຫະກຳກິລາຊີເກມ ຄັ້ງທີ 32 ຫຼື “ພະນົມເປັນ ເກມ” ຈະຈັດຂຶ້ນລະຫວ່າງວັນທີ 5-17 ພຶດສະພານີ້ ພ້ອມທັງມອບເງິນອຸດໜູນຈຳນວນໜຶ່ງໃຫ້ແກ່ທັບນັກກິລາເທັນນິດທີມຊາດລາວ ເພື່ອເປັນຂວັນກຳລັງໃຈທີ່ຈະອອກເດີນທາງເປັນທາງການໃນວັນທີ 4 ພຶດສະພານີ້.

ພິທີນຳສົ່ງທັບນັກກິລາເທັນນິດທີມຊາດລາວ ເຂົ້າຮ່ວມແຂ່ງຂັນງານກິລາ “ພະນົມເປັນ ເກມ” ໄດ້ມີຂຶ້ນເມື່ອວັນທີ 2 ພຶດສະພາ ຜ່ານມາ ທີ່ສະໂມສອນ ເທັນນິດ ວຽງຈັນ (ຂ້າງສະໜາມກິລາເຈົ້າອານຸວົງ), ໃຫ້ກຽດເຂົ້າຮ່ວມໂອ້ລົມໂດຍ ທ່ານ ດາວວອນ ພະຈັນທະວົງ ປະທານສະຫະພັນເທັນນິດແຫ່ງຊາດລາວ ພ້ອມດ້ວຍບັນດາຄະນະບໍລິຫານງານສະຫະພັນກິລາດັ່ງກ່າວ, ຄູຝຶກ ແລະ ນັກກິລາ ຕະຫຼອດຮອດບັນດາຜູ້ໃຫ້ການສະໜັບສະໜູນເຂົ້າຮ່ວມຢ່າງພ້ອມພຽງ.

ໂອກາດນີ້, ທ່ານ ດາວວອນ ພະຈັນທະວົງ ກໍໄດ້ສະແດງຄວາມເປັນຫວງເປັນໄຍ ແລະ ຕີລາຄາສູງຕໍ່ການຕັດສິນໃຈຂອງຄະນະຄູຝຶກ ແລະ ນັກກິລາ ທີ່ໄດ້ຮ່ວມຊີວິດນຳກັນ ເຂົ້າໃນການເກັບຕົວຝຶກຊ້ອມ 6 ອາທິດ ເຕັມໆ ຊຶ່ງບັ້ນຮົບຕໍ່ໄປແມ່ນເຂົ້າສູ່ຂະບວນການແຂ່ງຂັນຕົວຈິງ ກໍຂໍໃຫ້ຄະນະຄູຝຶກ ໂດຍສະເພາະນັກກິລາຈົ່ງພ້ອມກັນສືບຕໍ່ເພີ່ມທະວີຄວາມເອົາໃຈໃສ່ ມີນໍ້າໃຈຮັກຊາດ ຮັກແພງຄວາມສາມັກຄີເຊິ່ງກັນ ແລະ ກັນ ແລະ ແລກປ່ຽນປະສົບການທີ່ດີທາງດ້ານການຫຼິ້ນກິລາ ແລະ ວັດທະນະທຳຂອງຊາດ ສິ່ງສຳຄັນຮັບຟັງຄຳສັ່ງສອນຂອງຄູຝຶກ ຕັ້ງໜ້າສູ້ຊົນຢ່າງສຸດຄວາມສາມາດ ເພື່ອຍາດໃຫ້ໄດ້ໄຊຊະນະເພື່ອສ້າງກຽດສັກສີ ແລະ ຊື່ສຽງ ມາສູ່ປະເທດຊາດ ກໍຄື ໃຫ້ໄດ້ຜ່ານເຂົ້າສູ່ຮອບເລິກໆ ໃນການແຂ່ງຂັນເທັນນິດ “ພະນົມເປັນ ເກມ” ໃຫ້ບັນລຸຄາດໝາຍທີ່ວາງໄວ້.

ສຳລັບທັບນັກກິລາເທັນນິດທີມຊາດລາວ ເຂົ້າຮ່ວມ “ພະນົມເປັນ ເກມ” ໃນຄັ້ງນີ້ ທັງໝົດ 5 ຄົນ, ຍິງ 2 ຄົນ ໄດ້ເລີ່ມເກັບຕົວຝຶກຊ້ອມ ແຕ່ເດືອນມີນາ ຜ່ານມາ ແລະ ຈະໄດ້ອອກເດີນທາງໃນວັນທີ 4 ພຶດສະພານີ້ ດ້ວຍສາຍການບິນລາວແອລາຍ ແລະ ຈະໄດ້ເລີ່ມແຂ່ງຂັນເປັນທາງການໃນລະຫວ່າງວັນທີ 6-15 ພຶດສະພາ 2023 ທັງໝົດ 7 ລາຍການ ປະກອບມີ: ປະເພດທີມຍິງ, ທີມຊາຍ, ດ່ຽວຍິງ, ດ່ຽວຊາຍ, ຄູ່ຍິງ, ຄູ່ຊາຍ ແລະ ຄູ່ປະສົມ. ຂະນະທີ່ ມິກເລດເຊີ ສະເດັດຕັນ ຜູ້ສ້າງຜົນງານປະຫວັດສາດໃຫ້ວົງການເທັນນິດລາວ ໃນຊີເກມ ຄັ້ງທີ 31 ທີ່ ສສ ຫວຽດນາມ ບໍ່ສາມາດເຂົ້າຮ່ວມແຂ່ງຂັນນຳຊຸດນີ້ ຍ້ອນຕິດພາລະກິດສ່ວນຕົວ.

ສ່ວນລາຍຊື່ນັກກິລາເທັນນິດທີມຊາດລາວ ທີ່ຈະເຂົ້າຮ່ວມໄລ່ລ່າຫຼຽນ “ພະນົມເປັນ ເກມ” ຄັ້ງນີ້ ປະກອບມີ ທ້າວ ວິທະຍາ ລາຊາວະດີ ມື 1 ປະເທດລາວ, ທ້າວ ສະຖາພອນ ສິມມາລາວົງ ມື 2 ປະເທດລາວ ແລະ ທ້າວ ສົມພອນ ຊົງວິໄລ ສ່ວນນັກກິລາຍິງ ກໍມີ ນາງ ດີໄລລາ ປະທຸມມາກູໂຣເນນ ມື 1 ປະເທດລາວ ແລະ ນາງ ທິຣະດາ ພົມມະຈັກ

ຂະນະທີ່ ຄູຝຶກແມ່ນ ທ່ານ ອາລັນ ວອງ ຄູຝຶກຊາວອົດສະຕຣາລີ.

ຂ່າວ: ໜັງສືພິມສຶກສາ-ກິລາລາຍວັນ