UN ເຕືອນ ໂລກກຽມຮັບມືກັບ ເອວນີໂຢ ຮອບໃໝ່ ເຊິ່ງຈະເຮັດໃຫ້ເກີດສະພາບຄວາມແຫ້ງແລ້ງ

ຂ່າວຕ່າງປະເທດລາຍງານ ເມື່ອວັນທີ 3 ພຶດສະພາ ຜ່ານມາ, ໜ່ວຍງານດ້ານອຸຕຸນິຍົມວິທະຍາຂອງສະຫະປະຊາຊາດໄດ້ກ່າວເຕືອນວ່າ ປາກົດການເອວນີໂຢ (El Nino) ກຳລັງຈະກັບມາພາຍໃນອີກບໍ່ເທົ່າໃດເດືອນຂ້າງໜ້າ ດັ່ງນັ້ນ, ຈຶ່ງກ່າວເຕືອນຂໍໃຫ້ຊາວໂລກກຽມພ້ອມຮັບມືກັບສະພາບອາກາດແຫ້ງແລ້ງ.

ອົງການອຸຕຸນິຍົມວິທະຍາໂລກ (WMO) ໜຶ່ງໃນວົງການຊຳນານພິເສດຂອງອົງການສະຫະປະຊາຊາດ (UN) ໄດ້ເປີດເຜີຍບົດລາຍງານການຄາດຄະເນທ່າອ່ຽງທີ່ໂລກຈະປະເຊີນກັບປາກົດການ ເອວນີໂຢ ພາຍໃນເດືອນກໍລະກົດນີ້ໄວ້ທີ່ 60% ແລະ ຄາດວ່າ ການເກີດ ເອວນີໂຢ ພາຍໃນເດືອນກັນຍາຈະຢູ່ທີ່ 70%-80% ປາກົດການດັ່ງກ່າວຈະສ້າງການປ່ຽນແປງຄັ້ງສຳຄັນໃຫ້ກັບຮູບແບບຂອງສະພາບອາກາດໂລກອີກຄັ້ງ. ທັງນີ້, ໂລກປະເຊີນກັບປາກົດການ ເອວນີໂຢ ຄັ້ງຫຼ້າສຸດໃນລະຫວ່າງປີ 2018-2019 ຕາມການບັນທຶກຢ່າງເປັນທາງການ ໂດຍ WMO ຂະນະທີ່ນັບຕັ້ງແຕ່ປີ 2020 ຈົນເຖິງໄລຍະຕົ້ນປີນີ້ ໂລກປະເຊີນກັບປາກົດການລານີຢາ ເຖິງຢ່າງໃດກໍຕາມ, 8 ປີຫຼ້າສຸດຖືວ່າເປັນປີທີ່ອຸນຫະພູມສະເລ່ຍຂອງໂລກຮ້ອນຂຶ້ນ ແລະ ທຳລາຍສະຖິຕິຢ່າງຕໍ່ເນື່ອງ ເຖິງແມ່ນວ່າຢູ່ທ່າມກາງປາກົດການລານີຢາ ໂດຍຊີ້ໃຫ້ເຫັນວ່າ ຖ້າຫາກບໍ່ເກີດລານີຢາ ໂລກອາດຈະຍິ່ງຮ້ອນຫຼາຍຂຶ້ນອີກຕະຫຼອດໄລຍະເວລາດັ່ງກ່າວ. ບົດລາຍງານຂອງ WMO ລະບຸຕື່ມວ່າ ຈົນເຖິງຂະນະນີ້, ຍັງບໍ່ສາມາດເຈາະຈົງໄດ້ກ່ຽວກັບຄວາມຮຸນແຮງ ແລະ ໄລຍະເວລາຂອງປາກົດການ ເອວນີໂຢ ຄັ້ງໃໝ່ທີ່ກຳລັງຈະເກີດຂຶ້ນ ແຕ່ທຸກພາກສ່ວນໃນໂລກຕ້ອງຮ່ວມກັນກຽມຄວາມພ້ອມຮັບມືກັບອຸນຫະພູມທີ່ຈະສູງຂຶ້ນອີກ.

ອີກຢ່າງໜຶ່ງ, ປາກົດການ ເອວນີໂຢ ໃນລະຫວ່າງປີ 2018-2019 ເບົາບາງຫຼາຍຕາມການວິເຄາະຂອງ WMO ເຖິງຢ່າງໃດກໍຕາມ, ເອວນີໂຢ ຄັ້ງກ່ອນໜ້ານັ້ນ ຊຶ່ງເກີດຂຶ້ນໃນລະຫວ່າງປີ 2014-2016 ຖືວ່າ ເປັນໜຶ່ງໃນ ເອວນີໂຢ ຄັ້ງຮຸນແຮງທີ່ສຸດທີ່ໂລກເຄີຍປະເຊີນສົ່ງຜົນໃຫ້ປີ 2016 ເປັນປີທີ່ໂລກມີອຸນຫະພູມສູງທີ່ສຸດ ແລະ ຄວາມເສຍຫາຍຕໍ່ສິ່ງແວດລ້ອມທີ່ເປັນຜົນມາຈາກມະນຸດເປັນປັດໄຈສຳຄັນເຊັ່ນດຽວກັນ. ບົດລາຍງານຂອງ WMO ລະບຸຕື່ມວ່າ ຜົນກະທົບຈາກປາກົດການ ເອວນີໂຢ ໃນປີນີ້ຈະຍັງບໍ່ເກີດຂຶ້ນທັນທີທັນໃດ ໝາຍຄວາມວ່າ ຈະເລີ່ມມີຜົນຊັດເຈນຫຼາຍຂຶ້ນຕັ້ງແຕ່ປີ 2024 ເປັນຕົ້ນໄປ.