ກະຊວງສຶກສາທິການ ແລະ ກິລາ ມອບໃບຍ້ອງຍໍໃຫ້ຜູ້ຊ່ຽວຊານຍີ່ປຸ່ນ ທີ່ມີຜົນງານດີເດັ່ນຊ່ວຍພັດທະນາວຽກງານການສຶກສາ ຢູ່ ສປປ ລາວ

ກະຊວງສຶກສາທິການ ແລະ ກິລາ (ສສກ) ໄດ້ຈັດພິທີມອບໃບຍ້ອງຍໍໃຫ້ແກ່ ທ່ານ ເຄອີຈິ ໂອກາວະ ຜູ້ຊ່ຽວຊານຈາກມະຫາວິທະຍາໄລ ໂກເບະ ປະເທດຍີ່ປຸ່ນ ທີ່ມີຜົນງານດີເດັ່ນໃນການປະກອບສ່ວນເຫື່ອແຮງ ແລະ ສະຕິປັນຍາ ເຂົ້າໃນການພັດທະນາວຽກງານການສຶກສາ ແລະ ກິລາຂອງ ສປປ ລາວ, ທັງເປັນການສົ່ງເສີມ, ຍາດແຍ່ງການຮ່ວມມື ແລະ ສະໜັບສະໜູນທາງດ້ານວຽກງານການສຶກສາ ແລະ ພັດທະນາຊັບພະຍາກອນມະນຸດ.

ພິທີຍ້ອງຍໍດັ່ງກ່າວ, ຈັດຂຶ້ນວັນທີ 2 ພຶດສະພາ 2023 ທີ່ກະຊວງ ສສກ, ຕາງໜ້າມອບໂດຍ ທ່ານ ພຸດ ສິມມາລາວົງ ລັດຖະມົນຕີ ກະຊວງ ສສກ ແລະ ຮັບໂດຍ ທ່ານ ເຄອີຈິ ໂອກາວະ ຜູ້ຊ່ຽວຊານຈາກມະຫາວິທະຍາໄລ ໂກເບະ ປະເທດຍີ່ປຸ່ນ ພ້ອມມີພາກສ່ວນກ່ຽວຂ້ອງເຂົ້າຮ່ວມ.

ເພື່ອເປັນການຍ້ອງຍໍສັນລະເສີນຄຸນງາມຄວາມດີ ແລະ ຍ້ອງຍໍຜົນງານດີເດັ່ນໃນການປະກອບສ່ວນເຫື່ອແຮງ ແລະ ສະຕິປັນຍາ ເຂົ້າໃນການພັດທະນາວຽກງານການສຶກສາ ແລະ ກິລາ ຂອງ ສປປ ລາວ, ທັງເປັນການກະຕຸກຊຸກຍູ້ສົ່ງເສີມ, ຍາດແຍ່ງການຮ່ວມມື ແລະ ສະໜັບສະໜູນທາງດ້ານວຽກງານການສຶກສາ ແລະ ພັດທະນາຊັບພະຍາກອນມະນຸດ ລະຫວ່າງກະຊວງສຶກສາທິການ ແລະ ກິລາ ແລະ ມະຫາວິທະຍາໄລໂກເບະ ໃນປັດຈຸບັນ ແລະ ຕໍ່ໜ້າອີກດ້ວຍ.

ສຳລັບໃນໄລຍະຜ່ານມາ, ທ່ານ ເຄອີຈິ ໂອກາວະ ໄດ້ມີຜົນງານພົ້ນເດັ່ນຫລາຍດ້ານ ເປັນຕົ້ນແມ່ນໄດ້ສະໜັບສະໜູນແກ່ພະນັກງານກົມແຜນການ ແລະ ກົມການເງິນ ກະຊວງສຶກສາທິການ ແລະ ກິລາ ຈໍານວນ 5 ທຶນ ເຂົ້າຮ່ວມຝຶກອົບຮົມກ່ຽວກັບວຽກງານແຜນການ ແລະ ການເງິນຢູ່ທີ່ມະຫາວິທະຍາໄລໂກເບະ, ເຊື້ອເຊີນການນໍາຈາກກະຊວງສຶກສາທິການ ແລະ ກິລາ ເຂົ້າຮ່ວມກອງປະຊຸມປຶກສາຫາລື ການຮ່ວມມືຕິດພັນກັບຂະແໜງການສຶກສາ ທີ່ມະຫາວິທະຍາໄລໂກເບະ. ນອກນີ້, ຍັງໄດ້ຊ່ວຍເຫລືອມະຫາວິທະຍາໄລແຫ່ງຊາດ ໂດຍການເປັນຜູ້ຊ່ຽວຊານໃນໂຄງການສ້າງຄວາມເຂັ້ມແຂງໃນຂະແໜງການສຶກສາ ແລະ ອື່ນໆ.