ຮົງກົງເພີ່ມອັດຕາຄ່າແຮງຂັ້ນຕໍ່າ ເປັນ 40 ໂດລາຮົງກົງຕໍ່ຊົ່ວໂມງ

ເຂດບໍລິຫານພິເສດຮົງກົງຂອງຈີນ ເພີ່ມອັດຕາຄ່າແຮງງານຂັ້ນຕໍ່າຕາມກົດໝາຍ ເປັນ 40 ໂດລາຮົງກົງຕໍ່ຊົ່ວໂມງ ມີຜົນບັງຄັບໃຊ້ນັບແຕ່ວັນທີ 1 ພຶດສະພາຜ່ານມາ.

ວັນທີ 3 ພຶດສະພາ, ສໍານັກຂ່າວຊິນຮົວລາຍງານວ່າ: ຄະນະຜູ້ບໍລິຫານຮົງກົງມີມະຕິເຫັນພ້ອມຕາມການແນະນໍາຈາກຄະນະກໍາມະການຄ່າແຮງງານຂັ້ນຕໍ່າ ໃຫ້ປັບອັດຕາຄ່າແຮງງານຂັ້ນຕໍ່າຕາມກົດໝາຍ ຈາກ 37,5 ໂດລາຮົງກົງຕໍ່ຊົ່ວໂມງ ເປັນ 40 ໂດລາຮົງກົງຕໍ່ຊົ່ວໂມງ ເພີ່ມຂຶ້ນ 6,7%.

ກົດໝາຍຄ່າແຮງງານຂັ້ນຕໍ່າລະບຸວ່າ: ລູກນ້ອງຈະໄດ້ຮັບການຄຸ້ມຄອງພາຍໃຕ້ອັດຕາຄ່າແຮງງານໃໝ່ ເຊິ່ງຄວບຄຸມອັດຕາຄ່າແຮງງານປະຈໍາເດືອນ, ປະຈໍາວັນ, ປະຈໍາຊົ່ວໂມງ, ປະຈໍາແຕ່ລະອັນ, ແບບຖາວອນ, ແບບຊົ່ວຄາວ, ແບບວຽກປະຈໍາ ຫລື ແບບວຽກນອກເວລາ ໂດຍບໍ່ຄໍານຶງວ່າຈະຖືກຈ້າງພາຍໃຕ້ສັນຍາຕໍ່ເນື່ອງ ຕາມກໍານົດໃນກົດໝາຍວ່າດ້ວຍການຈ້າງວຽກ ຫລື ບໍ່.

ເຖິງຢ່າງໃດກໍຕາມ, ອັດຕາຄ່າແຮງງານໃໝ່ ຈະບໍ່ມີຜົນບັງຄັບໃຊ້ສະເພາະແຮງງານເຮັດວຽກຢູ່ເຮືອນ, ນັກສຶກສາເຝິກງານ ແລະ ນັກສຶກສາທີ່ຫາປະສົບການເຮັດວຽກ.