ປກສ ເມືອງສິງ ຈັບຜູ້ຄ້າ-ຂາຍຢາເສບຕິດໄດ້ 5 ຄົນ ພ້ອມຢຶດຂອງກາງຢາບ້າ 491 ເມັດ
ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງສິງ ແຂວງຫລວງນ້ຳທາ ລາຍງານໃຫ້ຮູ້ວ່າ: ໃນໄລຍະຜ່ານມາ ວັນທີ 17-27 ມີນາ 2023 ໄດ້ຮັບແຈ້ງຈາກ ປກສ ກຸ່ມບ້ານ ມອມ ວ່າທາງອົງການປົກຄອງ ບ້ານ ປ່າພຸກ ກັກຜູ້ຖືກຫາໄດ້ 2 ຄົນ ແລະ ຮັບການລາຍງານຈາກພົນລະເມືອງດີ ວ່າມີກຸ່ມຄົນບໍ່ດີເຄືອນໄຫວຄ້າ-ຂາຍ, ມົ້ວສຸມເສບຢາເສບຕິດຢູ່ເຂດບ້ານ ຈຽງອິນ ແລະ ບ້ານ ຫົວຂົວ ເມືອງສິງ. ດັ່ງນັ້ນ, ທາງໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງສິງ ຈຶ່ງໄດ້ລົງໄປກວດກາເຫັນວ່າມີມູນຄວາມຈິງແທ້ ຈຶ່ງກັກຜູ້ຖືກຫາໄດ້ 5 ຄົນ ຊື່ນາງ ອີເຊາະ ອາຍຸ 55 ປີ, ອາຊີບ ຫວ່າງງານ, ຢູ່ບ້ານ ປ່າພຸກ ເມືອງສິງ ພ້ອມຂອງກາງຢາບ້າ 4 ເມັດ, ທ້າວ ຊືປາ ອາຍຸ 28 ປີ, ອາຊີບ ຫ່ວາງງານ, ຢູ່ບ້ານ ປ່າພຸກ ເມືອງສິງ, ທ້າວ ສາຕື ອາຍຸ 46 ປີ, ອາຊີບ ຫ່ວາງງານ, ພັກເຊົາຢູ່ຕູບເຂດບ້ານ ຈຽງອິນ ເມືອງສິງ ພ້ອມຂອງກາງຢາບ້າ 123 ເມັດ, ທ້າວ ຄຳຈັນ ອາຍຸ 35 ປີ, ອາຊີບ ຫວ່າງງານ, ຢູ່ບ້ານ ອ່າງ ເມືອງ ແປກ ແຂວງ ຊຽງຂວາງ ພ້ອມຂອງກາງຢາບ້າ 11 ເມັດ ແລະ ທ້າວ ຊຽງສົມຈັນ ອາຍຸ 54 ປີ ອາຊີບ ຫ່ວາງງານ, ຢູ່ບ້ານ ຫົວຂົວ ເມືອງສິງ ພ້ອມຂອງກາງຢາບ້າ 353 ເມັດ, ເຈົ້າໜ້າທີ່ຈຶ່ງໄດ້ກັກຕົວພວກກ່ຽວມາດຳເນີນການສືບສວນ-ສອບສວນ.
ຜ່ານການສືບສວນ-ສອບສວນທັງ 5 ຄົນຮັບສາລະພາບວ່າ: ຢາເສບປະເພດຢາບ້າ ແມ່ນຂອງຕົນແທ້ເຊິ່ງໄດ້ພົວພັນຊື້-ຂາຍນຳພວກຮ່ວມຂະບວນການດຽວກັນຢູ່ ເມືອງສິງ ໂດຍຈຸດປະສົງຊື້ມາເພື່ອໄວ້ເສບ ແລະ ຂາຍຍ່ອຍ.
ປັດຈຸບັນຜູ້ຖືກຫາທັງ 5 ຄົນ ແລະ ຂອງກາງຢາເສບຕິດ 491 ເມັດແມ່ນໄດ້ສົ່ງໃຫ້ທາງກອງບັນຊາການ ປກສ ແຂວງ ຫລວງນ້ຳທາ ສືບຕໍ່ຂະຍາຍຜົນຫາກຸ່ມແກ້ງ ພວກຮ່ວມຂະບວນການດຽວກັນ ແລະ ດຳເນີນຄະດີຕາມລະບຽບກົດໝາຍ.
