ອົດສະຕຣາລີ ປະກາດ ກວາດລ້າງການສູບຢາໄຟຟ້າ ທີ່ເປັນບັນຫາຕົ້ນຕໍໃນໂຮງຮຽນມັດທະຍົມສຶກສາ

ແຫລ່ງຂ່າວ ຊິດນີ ປະເທດ ອົດສະຕຣາລີ ລາຍງານ ວັນທີ 2 ພຶດສະພາ 2023 ວ່າ: ທ່ານ ມາກ ບັດເລີຣ ລັດຖະມົນຕີ ກະຊວງສາທາລະນະສຸກ ອົດສະຕຣາລີ ປະກາດ ກວາດລ້າງການສູບຢາໄຟຟ້າ. ເຊິ່ງການສູບຢາໄຟຟ້າ ໄດ້ກາຍປັນບັນຫາຕົ້ນຕໍ ອັນດັບ 1 ໃນໂຮງຮຽນມັດທະຍົມສຶກສາ ແລະ ພວມແພ່ ຂະຫຍາຍໃນບັນດາໂຮງຮຽນປະຖົມສຶກສາ,​ ໃນຂະນະທີ່ບໍລິສັດຢາສູບໄດ້ອອກຜະລິດຕະພັນຢາສູບຊະນິດໃໝ່ ທີ່ມີສີສັນໂດດເດັ່ນ ແລະ ເພີ່ມກິ່ນດຶງດູດໃຈ ເພື່ອສ້າງໃຫ້ຜູ້ເສບຕິດ ນິໂຄຕິນ ລຸ້ນໃໝ່ຄືກັບການເຄີຍສູບຢາມາກ່ອນ.

ຢາສູບໄຟຟ້າ ຈຳໜ່າຍໃຫ້ແກ່ລັດຖະບານ ແລະ ຊຸມຊົນທົ່ວໂລກ ໃນຖານະຜະລິດຕະພັນເພື່ອປິ່ນປົວພະຍາດທີ່ໃຊ້ຊ່ວຍໃນການຢຸດເຊົາສູບຢາ ສຳລັບຜູ້ສູບຢາເປັນເວລາດົນນານ, ແຕ່ບໍ່ແມ່ນຜະລິດຕະພັນ ສຳລັບ ເດັກນ້ອຍ. ໃນຂະນະດຽວກັນ, ອົດສະຕຣາລີ ໄດ້ອອກມາດຕະການໃໝ່ ເພື່ອຕໍ່ຕ້ານການສູບຢາຄັ້ງໃຫຍ່ທີ່ສຸດໃນຮອບທົດສະວັດ ຂອງອົດສະຕຣາລີ, ໂດຍຈະຫ້າມການຈຳໜ່າຍຢາສູບໄຟຟ້າແບບໃຊ້ຄັ້ງດຽວແລ້ວຖີ້ມ, ຢຸດຕິການນໍາເຂົ້າຢາສູບໄຟຟ້າທີ່ບໍ່ມີໃບສັ່ງຈາກແພດໝໍ ແລະ ຈຳກັດປະລິມານ ນິໂຄຕິນ ໃນຢາສູບໄຟຟ້າ ອື່ນໆ.

ນອກນັ້ນ, ສະຖາບັນ ສຸຂະພາບ ແລະ ສະຫວັດດີການ ອົດສະຕຣາລີ ຍັງລະບຸວ່າ ອົດສະຕຣາລີ ມີອັດຕາການສູບຢາ ລາຍວັນຕ່ຳສຸດໃນໂລກ ແຕ່ກວດພົບວ່າໄວໜຸ່ມທີ່ມີອາຍຸຕ່ຳກວ່າ 25 ສູບຢາເພີ່ມສູງຂຶ້ນ.