ສອງກຸ່ມທະຫານຊູດັງຕົກລົງຢຸດຍິງ 7 ວັນ ຂະນະທີ່ສົງຄາມບີບປະຊາຊົນໜີຕາຍອອກນອກປະເທດແລ້ວ 1 ແສນກວ່າຄົນ
ສອງກຸ່ມທະຫານຊູດັງໄດ້ຕົກລົງໃນຫລັກການຈະຢຸດຍິງເປັນເວລາ 1 ວັນ ໂດຍຈະເລີ່ມຕົ້ນຂຶ້ນນັບແຕ່ວັນທີ 4 ພຶດສະພາ ຮອດວັນທີ 11 ພຶດສະພານີ້.
ກະຊວງການຕ່າງປະເທດຂອງຊູດັງໃຕ້ ເຊິ່ງສະເໜີເປັນຄົນກາງເຈລະຈາຄວາມຂັດແຍ່ງທີ່ເກີດຂຶ້ນໃນປະເທດຂ້າງຄຽງ ໄດ້ອອກຖະແຫລງການກ່ຽວກັບຂໍ້ຕົກລົງຢຸດຍິງຄັ້ງຫລ້າສຸດໃນວັນທີ 2 ພຶດສະພາ ໂດຍລະບຸວ່າ: ປະທານາທິບໍດີ ຊັລວາ ຄີ ຂອງຊູດັງໃຕ້ ເນັ້ນເຖິງຄວາມສໍາຄັນຂອງການຢຸດຍິງທີ່ຍາວນານຂຶ້ນກວ່າຮອບອື່ນໆທີ່ຜ່ານມາ, ຂະນະທີ່ກອງກໍາລັງທະຫານທັງສອງຝ່າຍຂອງຊູດັງຕົກລົງຈະສົ່ງຜູ້ແທນມາຮ່ວມເຈລະຈາກັນ.
ເຖິງຢ່າງໃດກໍຕາມ, ເຖິງວ່າຈະມີການຕົກລົງໂດຍຫລັກການທີ່ຈະຢຸດຍິງເປັນເວລາ 7 ວັນ, ແຕ່ບໍ່ແນ່ນອນວ່າກອງທັບຊູດັງ ແລະ ກອງກໍາລັງເຄິ່ງທະຫານ Rapid Support Forces (RSF) ຈະຍອມຢຸດການສູ້ຮົບໃນປະເທດແທ້ ຫລື ບໍ່ ເນື່ອງຈາກກ່ອນໜ້ານີ້ທັງສອງຝ່າຍໄດ້ລະເມີດຂໍ້ຕົກລົງຢຸດຍິງເລື້ອຍໆ.
ຂໍ້ມູນຫລ້າສຸດຈາກອົງການສະຫະປະຊາຊາດ (UN) ລະບຸວ່າ: ສົງຄາມທີ່ເກີດຂຶ້ນໃນຊູດັງໄດ້ບີບໃຫ້ປະຊາຊົນ 100.000 ກວ່າຄົນຕ້ອງອົບພະຍົບໜີຕາຍໄປປະເທດໃກ້ຄຽງ. ຂະນະທີ່ສົງຄາມທີ່ຍືດເຍື້ອເຂົ້າສູ່ອາທິດທີ 3 ໄດ້ເຮັດໃຫ້ເກີດວິກິດມະນຸດສະທໍາໃນດິນແດນແຫ່ງນີ້ ໂດຍມີພົນລະເມືອງທີ່ພັດຖິ່ນໃນປະເທດສູງເຖິງ 334.000 ຄົນ, ສ່ວນຜູ້ເສຍຊີວິດມີຫລາຍກວ່າ 500 ຄົນ ແລະ ບາດເຈັບອີກຫລາຍກວ່າ 4.000 ຄົນ.
ອ້າງອີງ:
https://www.aljazeera.com/…/sudans-warring-sides-agree…
https://www.bbc.com/news/world-africa-65448691
