ເປແອສເຊ ລົງໂທດແບນ ເມສຊີ່ ສອງອາທິດ ພ້ອມງົດຈ່າຍຄ່າແຮງ ຫລັງເດີນທາງບໍ່ຂໍອະນຸຍາດ

ສື່ກິລາຂອງຝຣັ່ງ L’Equipe ລາຍງານວ່າ ປາຣີ ແຊງ-ແຊກແມ໊ງ ສະໂມສອນດັງແຫ່ງລີກ 1 ໄດ້ສັ່ງຫ້າມ ລີໂອເນວ ເມສຊີ່ ເປັນເວລາ 2 ອາທິດ ຫລັງຈາກເດີນທາງໄປຕ່າງປະເທດໂດຍບໍ່ໄດ້ຮັບອະນຸຍາດຈາກສະໂມສອນກ່ອນ.

ດາວເຕະອາເຈນຕິນາເດີນທາງໄປ ຊາ​ອຸ​ດິ​ອາ​ຣາ​ເບຍ ​ໃນ​ວັນ​ຈັນ​ທີ່ຜ່ານມາ ​ເພື່ອ​ເຮັດໜ້າທີ່ເປັນ​ເອກ​ອັກຄະ​ລັດຖະທູດດ້ານການ​ທ່ອງ​ທ່ຽວ ຫລັງ​ຈາກ​ໄດ້​ມີ​ການ​ຕົກລົງ​ກັບ​ອຳນາດ​ການ​ປົກຄອງຂອງ​ປະ​ເທດ​ເສດຖີ​ນ້ຳມັນໄວ້​ແລ້ວ.

ໂດຍລາຍງານລະບຸວ່າ ເປແອສເຊ ບໍ່ພໍໃຈຫລາຍຕໍ່ພຶດຕິກຳຄັ້ງນີ້ຂອງກັບຕັນທີມແຊ້ມບານໂລກທີ່ບໍ່ໄດ້ແຈ້ງສະໂມສອນກ່ອນຈະເດີນທາງໄປອາຊີ. ເຖິງວ່າໃນມື້ນັ້ນທີມຈະບໍ່ໄດ້ຊ້ອມກໍ່ຕາມ.

ສື່ຊື່ດັງໃນເມືອງນ້ຳຫອມເປີດເຜີຍວ່າ ເມສຊີ່ ຈະຖືກລົງໂທດຫ້າມລົງເຕະຫ້າມຝຶກຊ້ອມເປັນເວລາ 2 ອາທິດ ແລະ ຈະບໍ່ໄດ້ຮັບຄ່າແຮງໃນຊ່ວງໄລຍະທີ່ຖືກລົງໂທດດ້ວຍ.