ອິນເດຍສ້າງສະຖິຕິໃໝ່ ມີຜູ້ໂດຍສານເຮືອບິນສູງເຖິງ 4,56 ລ້ານຄົນພາຍໃນມື້ດຽວ

ກະຊວງການບິນຂອງອິນເດຍເປີດເຜີຍວ່າ: ອິນເດຍສ້າງສະຖິຕິໃໝ່ ມີຜູ້ໂດຍສານເຮືອບິນສູງສຸດເປັນປະຫວັດສາດເຖິງ 4,56 ລ້ານຄົນ ຈາກ 2.978 ຖ້ຽວບິນ ພາຍໃນໄລຍະເວລາພຽງມື້ດຽວ ໃນວັນທີ 30 ເມສາຜ່ານມາ.

ລັດຖະມົນຕີກະຊວງການບິນຂອງອິນເດຍລະບຸວ່າ: ປະລິມານຜູ້ໂດຍສານພາຍໃນປະເທດທີ່ເພີ່ມສູງຂຶ້ນໄລຍະຫລັງການແພ່ລະບາດຂອງໂຄວິດນັ້ນ ເປັນພາບສະທ້ອນການເຕີບໃຫຍ່ຢ່າງສູງຂອງອິນເດຍ ທີ່ມີສ່ວນຊ່ວຍກະຕຸ້ນຂະແໜງການທ່ອງທ່ຽວ ແລະ ຟື້ນຟູຂະແໜງເສດຖະກິດຂອງປະເທດແຫ່ງນີ້.

ໂດຍໄລຍະ 3 ເດືອນທໍາອິດຂອງປີ 2023 ມີຜູ້ໂດຍສານເຮືອບິນຖ້ຽວບິນພາຍໃນປະເທດສູງກວ່າ 37,5 ລ້ານຄົນ ເຊິ່ງເພີ່ມສູງຂຶ້ນ 51,7% ເມື່ອທຽບໃສ່ໄລຍະເວລາດຽວກັນເມື່ອ 1 ປີກ່ອນ ຫລັງຈາກໄດ້ຮັບຜົນກະທົບຢ່າງໜັກຈາກການແພ່ລະບາດຂອງພະຍາດໂຄວິດ.

ລາຍງານຈາກສະມາຄົມຂົນສົ່ງທາງອາກາດສາກົນ (IATA) ລະບຸວ່າ: ອິນເດຍຍັງເປັນຕະຫລາດອັນດັບຕົ້ນໆຂອງທຸລະກິດການບິນທາງການຄ້າ ໂດຍສະເພາະໃນມິຕິຂອງຈໍານວນບ່ອນນັ່ງທີ່ສາຍການບິນຕ່າງໆຮອງຮັບຜູ້ໂດຍສານຂອງຕົນເມື່ອທຽບໃສ່ປະເທດຕ່າງໆ ຄືອາເມລິກາ, ຈີນ, ຍີ່ປຸ່ນ, ອົດສະຕຣາລີ ແລະ ເບຣຊິນ.

ເຖິງຢ່າງໃດກໍຕາມ, ເຖິງວ່າຂະແໜງທຸລະກິດການບິນຈະມີການຟື້ນຕົວໄປໃນທິດທາງທີ່ດີ, ແຕ່ອຸດສາຫະກໍານີ້ຍັງປະສົບບັນຫາຫລາຍປະການ ລວມທັງລາຄາເຊື້ອໄຟທີ່ປັບຕົວສູງຂຶ້ນຫລາຍ ລວມທັງເງິນສະກຸນຣູປີທີ່ອ່ອນຄ່າລົງເມື່ອທຽບໃສ່ສະກຸນເງິນໂດລາຂອງອາເມລິກາ. ອີກທັງເຮືອບິນ 50 ກວ່າລໍາຂອງສາຍການບິນລາຍໃຫຍ່ໃນອິນເດຍ ຄື IndiGo ແລະ Go First ຕ້ອງຢຸດໃຫ້ບໍລິການຊົ່ວຄາວ ເນື່ອງຈາກມີເຫດຂັດຂ້ອງກ່ຽວກັບເຄື່ອງຈັກ ແລະ ອາດມີສ່ວນເພີ່ມຄວາມທ້າທາຍໃຫ້ທຸລະກິດການບິນໃນປະເທດນີ້ບໍ່ຫລາຍກໍໜ້ອຍໃນອະນາຄົດ.

ສະຖິຕິດັ່ງກ່າວເກີດຂຶ້ນຫລັງຈາກໜ່ວຍງານພາຍໃຕ້ສະຫະປະຊາຊາດຄາດຄະເນວ່າ: ອິນເດຍຈະແຊງຈີນຂຶ້ນເປັນປະເທດທີ່ມີປະຊາກອນຫລາຍທີ່ສຸດໃນໂລກ ແລະ ມີປະຊາກອນສູງເຖິງ 1,7 ພັນລ້ານຄົນ ພາຍໃນປີ 2064.

ອ້າງອີງ:

https://www.bbc.com/news/world-asia-india-65334390

https://au.news.yahoo.com/air-india-indigo-record-4…

https://edition.cnn.com/…/india-population…/index.html