ກໍາປູເຈຍ ກຽມສ້າງທ່າເຮືອສີໜຸວິວ ໃຫ້ກາຍເປັນທ່າເຮືອສູນກາງໃນປີ 2029
ວັນທີ 1 ພຶດສະພາ ກໍາປູເຈຍເລີ່ມກໍ່ສ້າງທ່າເຮືອບັນທຸກຕູ້ຄອນເທນເນີແຫ່ງໃໝ່ຢູ່ທ່າເຮືອສີໜຸວິວ ໂດຍມີເປົ້າໝາຍສ້າງທ່າເຮືອດັ່ງກ່າວໃຫ້ກາຍເປັນທ່າເຮືອສູນກາງພາຍໃນປີ 2029.
ທ່ານ ຮຸນເຊນ ນາຍົກລັດຖະມົນຕີກໍາປູເຈຍ ກ່າວໃນພິທີວາງສີລາເລີກວ່າ: ການພັດທະນາທ່າເຮືອສີໜຸວິວຈະມີສ່ວນສົ່ງເສີມການເຕີບໃຫຍ່ທາງເສດຖະກິດ ແລະ ການຄ້າລະຫວ່າງປະເທດຂອງກໍາປູເຈຍ, ເປີດທາງໃຫ້ເຮືອຄອນເທນເນີຂະໜາດໃຫຍ່ສາມາດເຂົ້າຈອດທ່າເຮືອສີໜຸວິວ, ຫລຸດຕົ້ນທຶນການຂົນສົ່ງທາງທະເລຂອງກໍາປູເຈຍ ລວມທັງຊ່ວຍດຶງດູດນັກລົງທຶນ ແລະ ເລັ່ງການພັດທະນາເສດຖະກິດ.
ທ່ານ ຊຸນ ຈັນທອນ ລັດຖະມົນຕີກະຊວງໂຍທາທິການ ແລະ ຂົນສົ່ງ ກ່າວວ່າ: ການກໍ່ສ້າງທ່າເຮືອແຫ່ງໃໝ່ຈະແບ່ງອອກເປັນ 3 ໄລຍະ ໂດຍໄລຍະທໍາອິດຄວບຄຸມການສ້າງທ່າຈອດເຮືອສິນຄ້າທົ່ວໄປທາງບົກ ແລະ ທ່າຈອດເຮືອບັນທຸກຕູ້ຄອນເທນເນີ ຄວາມຍາວ 350 ເມັດ ແລະ ເລິກ 14,5 ເມັດ ເຊິ່ງຈະສາມາດຮອງຮັບເຮືອຂະໜາດ 60.000 DWT ຫລື ເຮືອບັນທຸກສິນຄ້າ 4.000 ທີອີຢູ (TEU: ໜ່ວຍນັບສິນຄ້າທີ່ບັນຈຸໃນຕູ້ຄອນເທນເນີຄວາມຍາວ 20 ຟຸດ).
ທ່ານ ຈັນທອນ ເປີດເຜີຍວ່າ: ຄາດຄະເນວ່າການກໍ່ສ້າງໄລຍະທໍາອິດຈະໃຊ້ເງິນລົງທຶນ 275 ລ້ານໂດລາສະຫະລັດ ແລະ ຄາດວ່າຈະສໍາເລັດພາຍໃນປີ 2026.
ສ່ວນການກໍ່ສ້າງໄລຍະທີສອງຈະເລີ່ມໃນປີ 2025 ແລະ ສິ້ນສຸດໃນປີ 2028 ແລະ ການກໍ່ສ້າງໄລຍະທີສາມຈະເລີ່ມໃນປີ 2026 ແລະ ສິ້ນສຸດໃນປີ 2029 ເຊິ່ງຄາດວ່າຈະໃຊ້ເງິນລົງທຶນທັງໝົດ 698 ລ້ານໂດລາສະຫະລັດ.
ປັດຈຸບັນ ທ່າເຮືອສີໜຸວິວມີປະສິດທິພາບຮອງຮັບຕູ້ຄອນເທນເນີ 700.000 ທີອີຢູຕໍ່ປີ ແລະ ຈະເພີ່ມເປັນ 1,4 ລ້ານທີອີຢູຕໍ່ປີໃນປີ 2026 ແລະ 2,58 ລ້ານທີອີຢູຕໍ່ປີໃນປີ 2029 ເມື່ອການກໍ່ສ້າງທັງສາມໄລຍະສໍາເລັດ.
ທັງນີ້, ທ່າເຮືອສີໜຸວິວ ເປັນທ່າເຮືອນໍ້າເລິກທາງການຄ້າລະຫວ່າງປະເທດພຽງແຫ່ງກຽວຂອງກໍາປູເຈຍ ໂດຍລາຍງານທາງການລະບຸວ່າ: ທ່າເຮືອສີໜຸວິວສາມາດສ້າງລາຍໄດ້ 86 ລ້ານໂດລາສະຫະລັດ ໃນປີ 2022.
