ອຸນຫະພູມມະຫາສະໝຸດສູງຂຶ້ນເປັນປະຫວັດສາດ ເຮັດໃຫ້ໂລກຮ້ອນຜິດປົກກະຕິ

ສຳນັກຂ່າວຕ່າງປະເທດລາຍງານ: ວັນທີ 1 ພຶດສະພາ 2023 ຜ່ານມາ, ອຸນຫະພູມຂອງມະຫາສະໝຸດທີ່ເພີ່ມຂຶ້ນຢ່າງໄວໃນເດືອນທີ່ຜ່ານມາ ຄືຄວາມຜິດປົກກະຕິ ເຊິ່ງນັກວິທະຍາສາດຫລາຍຄົນຍັງບໍ່ສາມາດອະທິບາຍໄດ້.

ຂໍ້ມູນປຽນທຽບໂດຍອົງການບໍລິຫານມະຫາສະໝຸດ ແລະ ຊັ້ນບັນຍາກາດແຫ່ງຊາດຂອງສະຫະລັດ ຫລື ຊຸດຂໍ້ມູນທີ່ເອີ້ນວ່າ ການປະເມີນສູງສຸດດ້ານອຸນຫະພູມພື້ນຜິວທະເລ ເຊິ່ງລວບລວມໂດຍດາວທຽມ ເຜີຍໃຫ້ເຫັນເຖິງອຸນຫະພູມທີ່ສູງກວ່າປີຜ່ານມາ

ມະຫາສະໝຸດທີ່ຮ້ອນຂຶ້ນສ້າງຄວາມກັງວົນໃນດ້ານຕ່າງໆບໍ່ວ່າຈະເປັນການລຸກລໍ້າຂອງນ້ຳທະເລ, ລະດັບນ້ຳທະເລທີ່ເພີ່ມຂຶ້ນ, ລວມເຖິງຜົນກະທົບທີ່ຮ້າຍແຮງຕໍ່ລະບົບນິເວດທາງທະເລ ເນື່ອງຈາກມີສິ່ງມີຊີວິດສາຍພັນຕ່າງໆອາດຈະປັບຕົວໄດ້ຍາກ ຫລື ບໍ່ສາມາດປັບຕົວໄດ້.

ຢ່າງໃດກໍຕາມ ນັກວິທະຍາສາດຫລາຍຄົນກ່າວວ່າ: ຄວາມຮ້ອນທີ່ເພີ່ມຂຶ້ນ ອາດເປັນສັນຍານເຕືອນວິກິດສະພາບອາກາດທີ່ດຳເນີນໄປຕາມອັດຕາທີ່ໄວກວ່າຄາດການໄວ້ ແລະ ໂລກອາດກຳລັງເຖິງຂີດຈຳກັດຄວາມສາມາດຂອງມະຫາສະໝຸດໃນການດູດຊັບຄວາມຮ້ອນສ່ວນເກີນເຫລົ່ານີ້.