ອັນຊູ ຟາຕິ ກຽມອຳລາບາເຊໂລນາ ຫລັງມີທີມອັງກິດພ້ອມຊື້ 70 ລ້ານຢູໂຣ
ອັນຊູ ຟາຕິ ມີໂອກາດຍ້າຍອອກຈາກບາເຊໂລນາ ຫລັງຈົບລະດູການນີ້ ໂດຍໂຕແທນຢືນຢັນວ່າມີຂໍ້ສະເໜີຊື້ຕົວເຂົ້າມາໃນລາຄາສູງເຖິງ 70 ລ້ານຢູໂຣ ຈາກທີມໃນພຣີເມຍລີກ.
ເວັບໄຊ ສະປອດ ລາຍງານວ່າ ອັນຊູ ຟາຕິ ກອງໜ້າດາວຮຸ່ງຂອງ ບາເຊໂລນາ ທີມດັງແຫ່ງ ລາ ລີກາ ສະເປນ ມີໂອກາດໄດ້ຍ້າຍສັງກັດຫລັງຈົບລະດູການນີ້ ຫລັງໂຕແທນຢືນຢັນສາມາດຫາຂໍ້ສະເໜີ້ຊື້ຕົວນັກເຕະລາຍນີ້ໃນລາຄາສູງເຖິງ 70 ລ້ານຢູໂຣ.
ສຳລັບ ຟາຕິ ອາຍຸ 20 ປີ ເຊິ່ງເປັນຜົນຜະລິດຈາກລະບົບເຍົາວະຊົນຂອງບາເຊໂລນາ ເບິ່ງຄືວ່າຈະບໍ່ໄດ້ເປັນນັກເຕະຕົວຫລັກຂອງຜູ້ຈັດການທີມຢ່າງ ຊາບີ ເອີນານເດສ ແລະ ທາງສະໂມສອນເອງກໍຢາກປ່ອຍນັກເຕະລາຍນີ້ອອກເພື່ອນຳເງິນໄປຊື້ນັກເຕະລາຍອື່ນມາແທນນຳອີກ.
ລາຍງານລະບຸວ່າ ຊໍເກ ເມນເດສ ໂຕແທນຄົນດັງທີ່ເບິ່ງແຍມ ຟາຕິ ຢູ່ ໄດ້ແຈ້ງກັບຜູ້ບໍລິຫານບາເຊໂລນາໄປແລ້ວວ່າ ຈະມີສະໂມສອນແຫ່ງຫນຶ່ງທີ່ພ້ອມຍື່ນຊື້ນັກເຕະລາຍນີ້ດ້ວຍລາຄາ 70 ລ້ານຢູໂຣ ໂດຍສະໂມສອນແຫ່ງນີ້ເປັນທີມໃນພຣີເມຍລີກ ອັງກິດ.
ຟາຕິ ໄດ້ຮັບການເລື່ອນຊັ້ນຂຶ້ນທີມຊຸດໃຫຍ່ບາເຊໂລນາຕັ້ງແຕ່ເມື່ອປີ 2019 ລົງສະໜາມໃຫ້ຕົ້ນສັງກັດໄປແລ້ວ 103 ນັດ ລວມທຸກລາຍການ ຍິງໄດ້ 26 ປະຕູ ໂດຍນັກເຕະເຖິງຈະໄດ້ຮັບການຊື່ນຊົມເລື່ອງສີຕີນ ແຕ່ກໍມີບັນຫາເລື່ອງປະເຊີນອາການບາດເຈັບຢູ່ເລື້ອຍໆ.
