ແຕ່ງຕັ້ງ ທ່ານ ສີໃສ ແກ້ວມະນີໄຊ ເປັນຫົວໜ້າສາຂາ ລັດວິສາຫະກິດໄຟຟ້າ ແຂວງສາລະວັນ ຜູ້ໃໝ່

ລັດວິສາຫະກິດໄຟຟ້າລາວ ສາຂາແຂວງສາລະວັນ ໄດ້ຈັດພິທີປະກາດການຈັດຕັ້ງມອບ-ຮັບໜ້າທີ່ຕໍາແໜ່ງຫົວໜ້າສາຂາຄົນໃໝ່ຂຶ້ນເມື່ອບໍ່ດົນມານີ້, ໂດຍການເປັນປະທານຂອງທ່ານ ໂພທິຍາ ວົງຈອມສີ ຫົວໜ້າພະແນກພະລັງງານ ແລະ ບໍ່ແຮ່ ແຂວງສາລະວັນ ແລະ ທ່ານ ສຸກສະຫວາດ ໂສສຸພັນ ຮອງຜູ້ອຳນວຍການລັດວິສາຫະກິດໄຟຟ້າລາວ.

ທ່ານ ວັນຄຳ ແສງເມືອງ ຮອງຝ່າຍບຸກຄະລາກອນ ໄດ້ຂຶ້ນຜ່ານຂໍ້ຕົກລົງ ເລກທີ 1001/ຟຟລ.ຝບກ ນະຄອນຫລວງວຽງຈັນ ວັນທີ 7 ເມສາ 2023 ວ່າດ້ວຍການແຕ່ງຕັ້ງ-ສັບຊ້ອນພະນັກງານນຳພາ ສາຂາແຂວງສາລະວັນ ທີ່ຂຶ້ນກັບຝ່າຍຄຸ້ມຄອງລະບົບໄຟຟ້າພາກໃຕ້ ອີງຕາມ ຂໍ້ 5 ມາດຕາ 32 ຂອງກົດລະບຽບ ລັດວິສາຫະກິດໄຟຟ້າລາວ (ສະບັບປັບປຸງ) ເລກທີ 380/ຟຟລ.ສພ ລົງວັນທີ 26 ຕຸລາ 2020 ແລະ ອີງຕາມການທາບທາມຜົນຄະແນນສຳພາດເປົ້າໝາຍຄະນະສາຂາ ແຂວງສາລະວັນ, ພ້ອມດ້ວຍບົດບັນທຶກ ແລະ ໜັງສືສະເໜີຕ່າງໆທີ່ກ່ຽວຂ້ອງລັດວິສາຫະກິດໄຟຟ້າລາວ ຕົກລົງເຫັນດີແຕ່ງຕັ້ງ-ສັບຊ້ອນພະນັກງານນຳພາຂັ້ນຫົວໜ້າສາຂາ ແລະ ຮອງຫົວໜ້າສາຂາແຂວງສາລະວັນຄື: ທ່ານ ສີໃສ ແກ້ວມະນີໄຊ ເປັນຫົວໜ້າສາຂາ ລັດວິສາຫະກິດ ແຂວງສາລະວັນ ຜູ້ໃໝ່ ແລະ ຕົກລົງແຕ່ງຕັ້ງ ທ່ານ ລຳເງິນ ສຸນາພັນ, ທ່ານ ສຸລິຍາ ຈັນທະວົງ ເປັນຮອງຫົວໜ້າສາຂາ.