ປກສ ແຂວງບໍລິຄຳໄຊ ຢຶດຢາບ້າໄດ້ຫລາຍກວ່າ 4 ລ້ານເມັດທີ່ກຽມນຳສົ່ງຂ້າມໄປປະເທດເພື່ອນບ້ານ ມາດຳເນີນຄະດີ
ວັນທີ 24 ເມສາ 2023, ເຈົ້າໜ້າທີ່ ປກສ ແຂວງບໍລິຄຳໄຊ ໄດ້ຮັບແຈ້ງຄວາມຈາກພົນລະເມືອງດີວ່າມີກຸ່ມຄົນຈຳນວນໜຶ່ງເຄື່ອນໄຫວຄ້າຂາຍ ແລະ ຂົນສົ່ງຢາເສບຕິດປະເພດຢາບ້າ ຢູ່ເຂດບ້ານປາກທວາຍ ເມືອງທ່າພະບາດ ແຂວງບໍລິຄຳໄຊ, ສະນັ້ນເຈົ້າໜ້າທີ່ຕຳຫລວດພະແນກສະກັດກັ້ນ ແລະ ຕ້ານຢາເສບຕິດ ຈຶ່ງໄດ້ປະສານສົມທົບກັບຫ້ອງຕຳຫລວດ ປກສ ແຂວງ ລົງຕິດຕາມພິສູດແຫລ່ງຂ່າວເຫັນວ່າມີມູນຄວາມຈິງແທ້.
ຜ່ານການສືບສວນ-ສອບສວນ ຂອງເຈົ້າໜ້າທີ່ຮູ້ວ່າກຸ່ມຄົນດັ່ງກ່າວໄດ້ເອົາຢາເສບຕິດປະເພດຢາບ້າຊຸກເຊື່ອງໄວ້ເຮືອນຂອງປະຊາຊົນບ້ານປາກທວາຍ ເພື່ອກຽມນຳສົ່ງຂ້າມໄປປະເທດເພື່ອນບ້ານ. ດັ່ງນັ້ນເຈົ້າໜ້າທີ່ຈຶ່ງສະເໜີຄຳສັ່ງຂໍກວດຄົ້ນເຄຫະສະຖານຈາກອົງການໄອຍະການປະຊາຊົນແຂວງບໍລິຄຳໄຊ ເພື່ອກວດຄົ້ນເຮືອນດັ່ງກ່າວ. ຕໍ່ມາເວລາ 7:00 ໂມງ ຂອງວັນທີ 25 ເມສາ 2023 ໜ້າທີ່ຕຳຫລວດພະແນກສະກັດກັ້ນ ແລະ ຕ້ານຢາເສບຕິດ ສົມທົບກັບການຈັດຕັ້ງບ້ານເຂົ້າກວດຄົ້ນເຮືອນຫລັງດັ່ງກ່າວຕາມຄຳສັ່ງກວດຄົ້ນເລກທີ 03/ອຍກຂ ລົງວັນທີ 25 ເມສາ 2023. ເຊິ່ງຜ່ານການກວດຄົ້ນພົບເຫັນຂອງກາງ ຢາບ້າຈຳນວນ 10 ເປົາ ເທົ່າກັບ 4.019.000 ເມັດ ນ້ຳໜັກ 447 ກິໂລກຣາມ ມາດຳເນີນຄະດີຕາມລະບຽບກົດໝາຍ.
ສ່ວນຜູ້ກະທຳຜິດ ພ້ອມພັກພວກໄດ້ເອົາຕົວຫລົບໜີໄປ ແລະ ປັດຈຸບັນຄະດີດັ່ງກ່າວເຈົ້າໜ້າທີ່ວິຊາສະເພາະພວມເລັ່ງຕິດຕາມຄົ້ນຫາ ເພື່ອຈັບຕົວຜູ້ກະທຳຜິດ ພ້ອມພັກພວກ ມາດຳເນີນຄະດີຕາມລະບຽບກົດໝາຍຢ່າງເຂັ້ມງວດ.
