ແຂວງຊຽງຂວາງ ມີຄູອາສາສະໝັກເຂົ້າສອບເສັງບັນຈຸລັດຖະກອນໃໝ່ 62 ຄົນ ຄັດເລືອກເອົາພຽງ 9 ໂຄຕ້າ ໃນປີ 2023

ພະແນກສຶກສາທິການ ແລະ ກິລາແຂວງ (ສກຂ) ຊຽງຂວາງ ຈັດສອບເສັງຄັດເລືອກເອົາລັດຖະກອນຄູໃໝ່ ປະຈໍາສົກປີ 2023, ໃນວັນທີ 25 ເມສາ 2023 ທີ່ສະໂມສອນໂຮງຮຽນ ມ.ສ ພອນສະຫວັນ ເມືອງແປກ, ໂດຍການເປັນປະທານຂອງ ທ່ານ ບຸນເລື່ອນ ວັນນາຮັກ ຫົວໜ້າພະແນກ ສກຂ, ມີ ທ່ານ ອຸ່ນຄໍາ ອວນສະຫວັນ ຮອງຫົວໜ້າກົມຈັດຕັ້ງ-ພະນັກງານ ກະຊວງສຶກສາທິການ ແລະ ກິລາ ພ້ອມພາກສ່ວນກ່ຽວຂ້ອງເຂົ້າຮ່ວມ.

ທ່ານ ສຸດທາ ອິນທະໄຊ ຫົວໜ້າຂະແໜງຈັດຕັ້ງ-ພະນັກງານ ພະແນກ ສກຂ ລາຍງານວ່າ: ສົກປີ 2023 ນີ້, ແຂວງຊຽງຂວາງໄດ້ຮັບໂຄຕ້າລັດຖະກອນຄູໃໝ່ທັງໝົດ 9 ທຶນ, ໃນນັ້ນໂຄຕ້າຄູສອນ 8 ທຶນ ແລະ ວິຊາຊີບ 1 ທຶນ ຊຶ່ງມີຄູອາສາສະໝັກທັງໝົດໃນທົ່ວແຂວງ 74 ຄົນ ຍິງ 40 ຄົນ, ແຕ່ມີໜ້າເຂົ້າມາສອບເສັງຄັດເລືອກຕົວຈິງ 62 ຄົນ ຍິງ 34 ຄົນ, ໃນນັ້ນເປັນຄູອາສາສະໝັກ 8-9 ປີ (ບໍ່ມີເງິນເດືອນ), ການສອບເສັງມີທັງໝົດ 11 ວິຊາຄື: ຄູອະນຸບານ, ຄູປະຖົມສຶກສາ, ຄູພາສາລາວ-ວັນນະຄະດີ, ຄູຄະນິດສາດ, ຄູວິທະຍາສາດທໍາມະຊາດ, ຄູວິທະຍາສາດສັງຄົມ, ຄູພາລະສຶກສາ, ຄູພາສາອັງກິດ, ຄູຊີວະສາດ, ຄູສິລະປະກໍາ ແລະ ຄູອາຊີວະສຶກສາ. ການສອບເສັງແມ່ນເສັງພາກຄວາມຮູ້ທົ່ວໄປ 60 ນາທີ ແລະ ພາກວິຊາສະເພາະ 60 ນາທີ, ຈາກນັ້ນຈະມີການສອບເສັງພາກປະຕິບັດຕົວຈິງ ແລະ ສໍາພາດຕື່ມອີກ, ໂດຍຈະໃຊ້ເວລາທັງໝົດ 4 ວັນ ແຕ່ວັນທີ 25-28 ເມສາ 2023 ນີ້ຈຶ່ງຈະສໍາເລັດ.

ທັງນີ້ກໍເພື່ອປະຕິບັດຕາມຄໍາແນະນໍາຂອງທ່ານລັດຖະມົນຕີກະຊວງສຶກສາທິການ ແລະ ກິລາ ສະບັບເລກທີ 389/ສສກ ລົງວັນທີ 15 ມີນາ 2023, ວ່າດ້ວຍການຮັບບັນຈຸລັດຖະກອນຄູ ແລະ ບໍລິຫານໃໝ່ຂອງຂະແໜງການສຶກສາ ແລະ ກິລາ ປະຈໍາສົກປີ 2023, ພ້ອມຍັງເປັນການຄັດເລືອກໃຫ້ໄດ້ບຸກຄະລາກອນທີ່ມີຄວາມຮູ້ຄວາມສາມາດ ແລະ ຮັກມັກອາຊີບຄູແທ້, ເພື່ອບັນຈຸເຂົ້າເປັນລັດຖະກອນຄູໃຫ້ຖືກຕ້ອງຕາມຈຸດປະສົງເປົ້າໝາຍ, ມີຄວາມບໍລິສຸດຍຸຕິທໍາ ແລະຫລີກລ່ຽງຈາກຫາງສຽງຂອງສັງຄົມ.