ປະທານສານປະຊາຊົນສູງສຸດ ພົບປະ ແລະ ເນັ້ນໃຫ້ສານປະຊາຊົນເຂດ II ນະຄອນຫລວງວຽງຈັນ ຕ້ອງເອົາໃຈໃສ່ແກ້ໄຂ 4 ບັນຫາຄົງຄ້າງ
ໃນວັນທີ 26 ເມສາ 2023 ນີ້ ທີ່ສານປະຊາຊົນເຂດ 2 ນະຄອນຫລວງວຽງຈັນ, ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດ ໄດ້ ພົບປະໂອ້ລົມ ພະນັກງານຫລັກແຫລ່ງ ເມືອງໄຊທານີ, ເມືອງປາກງື່ມ ແລະ ພະນັກງານສານປະຊາຊົນເຂດ II ນະຄອນຫລວງວຽງຈັນ, ໂດຍໃຫ້ການຕ້ອນຮັບຂອງ ທ່ານ ຄໍາໜູນ ຕຽງທະລາດ ເຈົ້າເມືອງປາກງື່ມ ແລະ ທ່ານ ບົວລີ ແກ້ວມະນີວັນ ຮອງເລຂາພັກເມືອງໄຊທານີ ຫົວໜ້າຄະນະສະມາຊິກສະພາປະຊາຊົນນະຄອນຫລວງວຽງຈັນ ປະຈຳເມືອງໄຊທານີ ປະທານຄະນະກວດກາພັກ-ລັດ ເມືອງ ໄຊທານີ.
ທ່ານ ສັກກຸນາ ຍະພິຈິດ ປະທານສານປະຊາຊົນເຂດ II ນະຄອນຫລວງວຽງຈັນ ລາຍງານສະພາບໂດຍຫຍໍ້ວ່າ: ສານປະຊາຊົນເຂດ II ນະຄອນຫລວງວຽງຈັນ ມີສຳນັກງານຕັ້ງຢູ່ບ້ານໄຊສົມບູນ ເມືອງໄຊທານີ ຖືເປັນສານປະຊາຊົນຂັ້ນທ້ອງຖິ່ນ ມີພາລະບົດບາດສິດ ແລະ ໜ້າທີ່ໃນການແກ້ໄຂຄະດີເປັນຂັ້ນຕົ້ນ; ຮັບຜິດຊອບແກ້ໄຂຄະດີ 2 ເມືອງຄື: ເມືອງໄຊທານີ ປະກອບມີ 11 ກຸ່ມ ແລະ 104 ບ້ານທີ່ຂຶ້ນກັບ ແລະ ເມື່ອງປາກງື່ມ ປະກອບມີ 5 ກຸ່ມ ແລະ 53 ບ້ານທີ່ຂຶ້ນກັບ; ມີພະນັກງານທັງໝົດ 65 ຄົນ ຍິງ 22 ຄົນ; ປະກອບມີ ປະທານສານ 1 ຄົນ ຮອງສອງຄົນ, ຫົວໜ້າຄະນະສານ 4 ຄົນ ຍິງ 1 ຄົນ, ຫົວໜ້າໜ່ວຍງານຈັດຕັ້ງ-ກວດກາ 1 ຄົນ, ຫົວໜ້າຫ້ອງການ 1 ຄົນ, ຜູ້ພິພາກສາ 14 ຄົນ ຍິງ 5 ຄົນ (ຊັ້ນ 3 ມີ 3 ຄົນ, ຊັ້ນ 2 ມີ 3 ຄົນ ຍິງ 2 ຄົນ, ຊັ້ນ 1 ມີ 8 ຄົນ ຍິງ3 ຄົນ); ດ້ານການບໍລິຫານຄະດີ 1 ປີຜ່ານມາ ມີຄະດີທັງ 451 ເລື່ອງ, ແກ້ໄຂໄດ້ 394 ເລື່ອງ ເທົ່າກັບ 87%, ຂໍອຸທອນ 17 ເລື່ອງ ເທົ່າກັບ 4%, ສືບຕໍ່ດຳເນີນ 57 ເລື່ອງ ໃນນີ້ເປັນຄະດີຂອງເມືອງໄຊທານີ 392 ເລື່ອງ ແລະ ເມືອງປາກງື່ມ 59 ເລື່ອງ, ຄະດີທີ່ພົ້ນເດັ່ນມີດັ່ງນີ້: ຄະດີອາຍາປະກອບມີ ລັກຊັບ, ສໍ້ໂກງ ແລະ ສ້າງຄວາມເສຍຫາຍຜ່ານສື່ສັງຄົມອອນລາຍ; ຄະດີແພ່ງປະກອບມີ ບັນຫາທີ່ດິນ (ຂັດແຍ່ງທີ່ດິນ, ຂັດແຍ່ງມູນມໍຣະດົກ, ໃບຕາດິນເສຍຫາຍ) ແລະ ໜີ້ສິນ ແລະ ຄະດີຄອບຄົວ ແມ່ນການຢ່າຮ້າງ.
ໂອກາດນີ້, ທ່ານປະທານສານປະຊາຊົນສູງສຸດ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດດັ່ງກ່າວ ແລະ ເພື່ອຮັບປະກັນໃຫ້ແກ່ການດຳເນີນຄະດີຕາມຂະບວນຍຸຕິທໍາໃຫ້ມີຄວາມວ່ອງໄວ, ໂປ່ງໃສ, ພາວະວິໄສ ແລະ ຖືກຕ້ອງເປັນທຳ ບົນຈິດໃຈບຸກທະລຸ, ມີຈັນຍາບັນ-ຈັນຍາທຳ, ເສຍສະຫລະເພື່ອສ່ວນລວມ, ເຮັດແທ້ທໍາຈິງ ແລະ ເຄົາລົບຕໍ່ກົດໝາຍ ຈຶ່ງເປັນໜ້າທີ່ ແລະ ຄວາມຮັບຜິດຊອບຂອງພະນັກງານທີ່ຈະຕ້ອງໄດ້ພ້ອມກັນເອົາໃຈໃສ່ແກ້ໄຂບາງຈຸດອ່ອນຂໍ້ຄົງຄ້າງດັ່ງລຸ່ມນີ້:
- ຕ້ອງໄດ້ເດັດດ່ຽວ ແລະ ເຂັ້ມງວດທີ່ສຸດໃນການຕັດສິນ, ພິພາກສາຄະດີໃຫ້ສອດຄ່ອງຕາມຫລັກການນໍາພາຂອງພັກ, ຮັບປະກັນຄວາມເປັນເອກະພາບ, ນໍາພາເປັນໝູ່ຄະນະ, ຄົ້ນຄວ້າບັນຫາຄະດີ ຢ່າງພາວະວິໄສ, ມີຄວາມໂປ່ງໃສໃນທຸກຂັ້ນຕອນ, ຖືກຕ້ອງຕາມຂໍ້ມູນຫລັກຖານ ແລະ ກົດໝາຍກໍານົດໄວ້.
- ຕ້ອງໄດ້ສ້າງຄວາມເຂັ້ມແຂງໃຫ້ໄດ້ເປັນຜູ້ບໍລິການດີ, ບໍລິຫານທີ່ບໍລິສຸດໂປ່ງໃສ, ຊື່ສັດບໍລິສຸດ ສັດຊື່ຕໍ່ວິຊາຊີບ.
- ເອົາໃຈໃສ່ບໍາລຸງສ້າງພະນັກງານຂອງສານ ໃຫ້ມີຄວາມຮູ້ຄວາມສາມາດ, ຈັນຍາບັນ-ຈັນຍາທໍາ ແລະ ເປັນມືອາຊີບ ໃນການປະຕິບັດໜ້າທີ່ວຽກງານ ໂດຍສະເພາະຜູ້ພິພາກສາທີ່ເປັນຜູ້ຕັດສິນຊີ້ຂາດກ່ຽວກັບຄະດີ ຖືວ່າມີຄວາມສໍາຄັນຫຼາຍ ເພາະການຕັດສິນ, ຊີ້ຂາດດັ່ງກ່າວແຕະຕ້ອງເຖິງຊີວິດ, ສຸຂະພາບ, ອິດສະລະພາບ, ກຽດສັກສີ ແລະ ສິດ ຜົນປະໂຫຍດອັນຊອບທຳຂອງພົນລະເມືອງ.
- ເອົາໃຈໃສ່ປະສານສົມທົບ ແລະ ປຶກສາຫາລື ກັບພາກສ່ວນທີ່ກ່ຽວຂ້ອງຂອງການດຳເນີນຄະດີຕາມຂະບວນຍຸຕິທຳໃຫ້ຖືກຕ້ອງຕາມກົດໝາຍ ແລະ ຖືກຕາມຄວາມເປັນຈິງເປັນໃຈກາງ ແລະ ຖືການຈັດຕັ້ງປະຕິບັດຄຳຕັດສິນຂອງສານ ທີ່ໃຊ້ໄດ້ຢ່າງເດັດຂາດ ໃຫ້ສິ້ນສຸດຕາມກົດໝາຍ.
