ທ່ານ ສີຈິ້ນຜິງ ຫາລືກັບທ່ານ ເຊເລນສກີ ເປັນຄັ້ງທໍາອິດ ນັບແຕ່ສົງຄາມຣັດເຊຍ-ອູແກຣນເລີ່ມຂຶ້ນ

ປະທານປະເທດ ສີຈິ້ນຜິງ ຂອງຈີນ ຫາລືກັບປະທານາທິບໍດີ ໂວໂລດິເມຍ ເຊເລນສກີ ຂອງອູແກຣນ ເປັນຄັ້ງທໍາອິດ ນັບແຕ່ສົງຄາມຣັດເຊຍ-ອູແກຣນເລີ່ມຂຶ້ນໃນເດືອນກຸມພາ 2022 ຜ່ານມາ ໂດຍທາງການຈີນຕ້ອງການສົ່ງທູດຜູ້ແທນໄປນະຄອນຫລວງກຽບ ຂອງອູແກຣນ ແລະ ອາສາເປັນຄົນກາງໃນການເຈລະຈາເພື່ອຢຸດຄວາມຂັດແຍ່ງໃນຄັ້ງນີ້.

ຜູ້ນໍາຈີນ ແລະ ຜູ້ນໍາອູແກຣນໄດ້ຫາລືກັນຜ່ານທາງໂທລະສັບໃນວັນທີ 26 ເມສາຜ່ານມາ ໂດຍທ່ານ ເຊເລນສກີ ເປີດເຜີຍວ່າ: ເປັນການເຈລະຈາທີ່ຍາວນານ ແລະ ມີຄວາມໝາຍ ທັງສອງທ່ານຫາລືກັນເກືອບ 1 ຊົ່ວໂມງ.

ທ່ານ ເຊເລນສກີ ກ່າວເຖິງການໂອ້ລົມກັບທ່ານ ສີຈິ້ນຜິງ ເປັນຄັ້ງທໍາອິດວ່າ: “ຂ້າພະເຈົ້າເຊື່ອວ່າ ການເຈລະຈາກັນຜ່ານໂທລະສັບຄັ້ງນີ້ ຕະຫລອດຈົນການແຕ່ງຕັ້ງເອກອັກຄະລັດຖະທູດອູແກຣນປະຈໍາປະເທດຈີນ ຈະເປັນແຮງຊຸກຍູ້ທີ່ມີພະລັງໃນການພັດທະນາການພົວພັນລະດັບທະວີພາຄີຂອງທັງສອງປະເທດ”.

ການເຈລະຈາຂອງທ່ານ ສີຈິ້ນຜິງ ແລະ ທ່ານ ເຊເລນສກີ ເກີດຂຶ້ນຫລັງຈາກຜູ້ນໍາທັງສອງປະເທດກ່າວວ່າ: ພວກທ່ານຍິນດີຈະຫາລືຮ່ວມກັນໃນບັນຫາທີ່ເກີດຂຶ້ນ ຫລັງຈາກທ່ານ ສີຈິ້ນຜິງ ເດີນທາງຢ້ຽມຢາມນະຄອນຫລວງມົດສະກູເພື່ອເຂົ້າພົບປະທານາທິບໍດີ ວະລາດິເມຍ ປູຕິນ ຂອງຣັດເຊຍ ໃນເດືອນມີນາຜ່ານມາ.

ສ່ວນກະຊວງການຕ່າງປະເທດຈີນລະບຸວ່າ: “ຈຸດຢືນຂອງຈີນຄືການອໍານວຍຄວາມສະດວກໃນການເຈລະຈາຫາລືກັນເພື່ອສັນຕິພາບ” ແລະ ຍັງເປີດເຜີຍວ່າ: ທາງການຈີນກຽມສົ່ງທູດຜູ້ແທນ ເຊິ່ງເຄີຍເປັນອະດີດເອກອັກຄະລັດຖະທູດຈີນປະຈໍາປະເທດຣັດເຊຍ ເດີນທາງໄປອູແກຣນ ເພື່ອຮ່ວມຫາທາງອອກ ແລະ ຢຸດຄວາມຂັດແຍ່ງທີ່ເກີດຂຶ້ນມາກວ່າ 1 ປີ 2 ເດືອນແລ້ວ.

ອ້າງອີງ:

https://www.aljazeera.com/…/xi-holds-first-talks-with…

https://www.euractiv.com/…/chinas-xi-holds-first-call…/

https://www.nbcnews.com/…/china-xi-talks-ukraine…