ປກສ ແຂວງຈຳປາສັກ ກັກຕົວເປົ້າໝາຍຄ້າຂາຍຢາເສບຕິດໄດ້ 1 ຄົນ ພ້ອມຂອງກາງຢາບ້າ 1.401 ເມັດ
ເຈົ້າໜ້າທີ່ພະແນກຕຳຫລວດສະກັດກັ້ນ ແລະ ຕ້ານຢາເສບຕິດ ປກສ ແຂວງຈຳປາສັກ ລາຍງານໃຫ້ຮູ້ວ່າ: ວັນທີ 21 ເມສາ 2023 ເວລາ 12:00 ໂມງ ເຈົ້າໜ້າທີ່ວິຊາສະເພາະໄດ້ຮັບການລາຍງານຈາກພົນລະເມືອງດີວ່າມີກຸ່ມຄົນບໍ່ດີເຄື່ອນໄຫວຄ້າຂາຍຢາເສບຕິດຢູ່ເຂດບ້ານທ່າຫລວງ ເມືອງໂພນທອງ ແຂວງຈຳປາສັກ. ດັ່ງນັ້ນ, ເຈົ້າໜ້າທີ່ວິຊາສະເພາະ ຈຶ່ງໄດ້ລົງຕິດຕາມແຫລ່ງຂ່າວເຫັນວ່າມີມູນຄວາມຈິງ.
ຫລັງຈາກນັ້ນ ຈຶ່ງໄດ້ຈັດຕັ້ງກຳລັງວິຊາສະເພາະ ສົມທົບກັບພາກສ່ວນທີ່ກ່ຽວຂ້ອງ ແລະ ອຳນາດການປົກຄອງບ້ານ ລົງສະຖານທີ່ດັ່ງກ່າວສາມາດກັກ ຕົວເປົ້າໝາຍໄດ້ 1 ຄົນ ຊື່ ທ້າວ ສີຣົກ ອາຍຸ 38 ປີ ສັນຊາດລາວ ກຳມະກອນ ບ້ານທ່າຫລວງ ເມືອງໂພນທອງ ແຂວງຈຳປາສັກ ພ້ອມເຄື່ອງຂອງ ກາງຢາບ້າ 1.401 ເມັດ, ລົດຈັກ 1 ຄັນ ມາດຳເນີນຄະດີ.
ປັດຈຸບັນຄະດີດັ່ງກ່າວ ຍັງຢູ່ໃນຂັ້ນຕອນການສືບສວນ-ສອບສວນຂອງເຈົ້າໜ້າທີ່ ເພື່ອຊອກຫາຜູ້ຮ່ວມຂະບວນການມາດຳເນີນຄະດີຕາມຂັ້ນຕອນຂອງກົດໝາຍບ້ານເມືອງຕໍ່ໄປ.
