ສົ່ງເສີມອະນຸລັກຮັກສາຈຸດເດັ່ນທີ່ເຮົາມີ ເພື່ອເປັນຈຸດຂາຍໃນການທ່ອງທ່ຽວ

ໂດຍ: ທິດກໍ່າ
ງານສະຫລອງສົ່ງທ້າຍປີເກົ່າ ພສ 2565 ຕ້ອນຮັບປີໃໝ່ ພສ 2566 ສິ່ງທີ່ໜ້າຊົມຊື່ນຍິນດີກໍຄືພວກເຮົາໄດ້ຈັດກິດຈະກໍາຫລາຍຢ່າງທີ່ມີສີສັນ ເພື່ອເປັນຈຸດຂາຍໃນການທ່ອງທ່ຽວ ເຊິ່ງອັນສໍາຄັນທີ່ສຸດກໍແມ່ນພວກເຮົາໄດ້ເສີມຂະຫຍາຍອະນຸລັກຮັກສາຈຸດເດັ່ນໆຂອງເມືອງລາວໃຫ້ຊາວໂລກເຂົາຮັບຮູ້ວ່າປະເທດລາວເຮົາເປັນປະເທດທີ່ມີວັດທະນະທໍາ-ທໍາມະຊາດທີ່ສວຍສົດງົດງາມເຊື່ອງຊ້ອນໄວ້ຄຽງຄູ່ຢູ່ກັບຊາດລາວຄົນລາວຈົນກາຍເປັນອະລິຍະທໍາທີ່ບໍ່ບົກແຫ້ງເຫືອດຫາຍ.

ຫາກຕັ້ງໂຈດກັນວ່າ, ຈຸດເດັ່ນໆທີ່ປະເທດລາວ, ຄົນລາວເຮົາມີຫຍັງແດ່ທີ່ຈະຟື້ນຟູບູລະນະ, ເສີມຂະຫຍາຍໃຫ້ເປັນຈຸດຂາຍໃນການທ່ອງທ່ຽວໃນປັດຈຸບັນ ແລະ ອະນາຄົດ. ຄໍາຕອບໂຈດກໍຄື ມີທໍາມະຊາດພູຜາປ່າໄມ້, ຫ້ວຍນໍ້າລໍາເຊ, ຖໍ້າຮູພູເຂົາອັນເປັນບໍ່ເກີດແຫ່ງຊັບໃນດິນສິນໃນນໍ້າທີ່ຫລາຍປະເທດໃນໂລກເຂົາບໍ່ມີຄືປະເທດລາວເຮົາ. ສ່ວນອັນທີສອງກໍແມ່ນທາງດ້ານວັດທະນະທໍາທີ່ກາຍເປັນອະລິຍະທໍາສືບທອດກັນມາແຕ່ບູຮານນະການ, ບັນພະບູລຸດ ນັບແຕ່ຍຸກຂຸນບູລົມລາຊາທິລາດມາຕໍ່ໃສ່ຍຸກລ້ານຊ້າງ ແລະ ກ້າວມາຮອດຍຸກປັດຈຸບັນຄື ສາທາລະນະລັດ ປະຊາທິປະໄຕ ປະຊາຊົນລາວ.

ຈາກສອງປັດໄຈພື້ນຖານນີ້ ໄດ້ສ້າງໃຫ້ຄົນລາວເຮົາມີທັດສະນະແບບແຜນຄຸນສົມບັດ, ການດໍາລົງຊີວິດອັນດີງາມ, ລຽບງ່າຍອ່ອນໄຫວ, ຈິດໃຈໂອບເອື້ອອາລີເອື້ອເຟື້ນເພື່ອແຜ່ຈົນກາຍເປັນຄຸນສົມບັດອະລິຍະທໍາປະຈໍາຕົວທີ່ໂດດເດັ່ນສະເພາະຂອງຊາດລາວຄົນລາວ. ໃນຍຸກ ສປປ ລາວ ທີ່ພວມມີການສ້າງສາພັດທະນາ, ມີຄວາມຈະເລີນຮຸ່ງເຮືອງ, ສະຫງົບສຸກຮົ່ມເຢັນຄືດັ່ງທຸກວັນນີ້ ພວກເຮົາຍິ່ງຖະໜຸຖະໜອມສົ່ງເສີມ ແລະ ອະນຸລັກຮັກສາເອກະລັກທີ່ກ່າວມານີ້ໃຫ້ຍືນຍົງຄົງຕົວຢູ່ຄຽງຄູ່ກັບຊາດລາວຄົນລາວຕະຫລອດໄປ.

ໃນຍຸກສະໄໝນີ້, ບໍ່ວ່າປະເທດໃດເຂົາກໍມີການແກ້ງແຍ່ງແຂ່ງຂັນ ທັງຄົ້ນຫາສິ່ງທີ່ບົ່ມຊ້ອນທີ່ມີໃນທໍາມະຊາດ ແລະ ສັງຄົມຂອງປະເທດເພື່ອມາຜະລິດໃຫ້ເປັນຈຸດຂາຍໃນການທ່ອງທ່ຽວທີ່ຈະນໍາເອົາເມັດເງິນອັນມະຫາສານມາໃຫ້ປະເທດຊາດ ເພາະອຸດສາຫະກໍາເປັນແຫລ່ງສ້າງລາຍຮັບອັນດັບຕົ້ນໆຂອງຊາດ. ໜຶ່ງໃນກິດຈະກໍາດ້ານວັດທະນະທໍາທີ່ພວກເຮົາຄວນປັບປຸງ ແລະ ເສີມຂະຫຍາຍໃຫ້ມີສີສັນອຸດົມສົມບູນນັ້ນກໍຄື ບຸນປີໃໝ່ລາວທີ່ສາມາດດຶງດູດເອົານັກທ່ອງທ່ຽວຈາກຕ່າງແດນເຂົ້າມາທ່ຽວມາຊົມໃຫ້ຫລາຍໆ ເພາະນອນຢູ່ໃນການສະຫລອງບຸນປີໃໝ່ນັ້ນມັນຍັງມີພິທີທາງສາສະໜາ, ແຫ່ນາງສັງຂານ, ບາສີສູ່ຂວັນ, ຫົດສົງນໍ້າດ້ວຍບັນຍາກາດທີ່ມີຄວາມໝາຍ ແລະ ມ່ວນຊື່ນ.

ຢ່າງໃດກໍດີ, ໃນອະນາຄົດຖ້າບໍ່ມີໂຣກລະບາດ, ໂຣຄາພະຍາດ, ໄພທໍາມະຊາດມາບຽດບຽນຊາດລາວຄົນລາວພວກເຮົາກໍຍັງມີຄວາມຫວັງໃນອະນາຄົດຊາດທີ່ຈະມີການພັດທະນາໃຫ້ຈະເລີນຮຸ່ງເຮືອງສີວິໄລແບບປະຊາຊົນຢູ່ດີກິນດີ, ມີຄວາມສຸກ, ສະຫງົບປອດໄພ ເຊິ່ງມາຮອດປັດຈຸບັນ ລາວໄດ້ມີຫລາຍຢ່າງສາມາດຕິດອັນດັບໂລກໃນການທ່ອງທ່ຽວ, ຄວາມສະຫງົບສຸກປອດໄພ, ອາຫານການກິນ ນັບທັງສິລະປະວັດທະນະທໍາ, ສະຖາປັດຕະຍະກໍາທີ່ເປັນເອກະລັກອັນໂດດເດັ່ນຂອງຊາດ ເຊິ່ງສິ່ງນີ້ລະຄືປະເທດລາວຄວາມເປັນລາວຢ່າງແທ້ຈິງ.