ເກີດແຜ່ນດິນໄຫວຂະໜາດ 7.3 ຣິກເຕີ ຢູ່ປະເທດອິນໂດເນເຊຍ ພ້ອມມີການແຈ້ງເຕືອນສຶນາມິ
ວັນທີ 25 ເມສາ 2023 ນີ້, ອົງການທໍລະນີຟີຊິກຂອງອິນໂດເນເຊຍ (BMKG) ໄດ້ລາຍງານວ່າໄດ້ເກີດແຜ່ນດິນໄຫວລະດັບ 7.3 ຣິກເຕີ ຢູ່ພາກຕາເວັນຕົກຂອງເກາະຊູມາຕຣາ ເຊິ່ງຮ້າຍແຮງຈົນຕ້ອງມີການເຕືອນໄພສຶນາມິ ແລະ ໄດ້ສັ່ງໃຫ້ອຳນາດການປົກຄອງທ້ອງຖິ່ນເລັ່ງຍົກຍ້າຍປະຊາຊົນຢູ່ເຂດປະສົບໄພໃຫ້ຍ້າຍອອກຈາກຝັ່ງ.
ແຜ່ນດິນໄຫວໄດ້ເກີດຂຶ້ນໃນເວລາປະມານ 3:00 ໂມງເຊົ້າຕາມເວລາທ້ອງຖິ່ນ ໃນຄວາມເລິກ 84 ກິໂລແມັດ ຫລັງຈາກໄດ້ກວດພົບການສັ່ນສະເທືອນຫລາຍຄັ້ງ ແລະ ບາງຄື້ນມີຂະໜາດປະມານ 4 ຣິກເຕີ.
ທ່ານ ອັບດຸ ມູຮາຣີ ໂຄສົກຂອງ BMKG ກ່າວວ່າເຈົ້າໜ້າທີ່ກໍາລັງເກັບກໍາຂໍ້ມູນຈາກເກາະທີ່ຢູ່ໃກ້ກັບຈຸດສູນກາງຂອງແຜ່ນດິນໄຫວຢູ່ນອກຝັ່ງຕາເວັນຕົກຂອງເກາະຊູມາຕຣາ ໂດຍທີ່ປາດັງ ນະຄອນຫຼວງຂອງເກາະຊູມາຕຣາຕາເວັນຕົກ ຮູ້ສຶກໄດ້ເຖິງແຜ່ນດິນໄຫວຢ່າງຮຸນແຮງ ແລະ ປະຊາຊົນພາກັນເຄືອນຍ້າຍອອກຫ່າງຈາກບໍລິເວນຊາຍຫາດໂດຍທັນທີ.
ເຈົ້າໜ້າທີ່ທ້ອງຖິ່ນລາຍງານວ່າ “ຢູ່ເທິງເກາະສິເບຣຸຕ ປະຊາຊົນໄດ້ຖືກຍົກຍ້າຍອອກໄປແລ້ວ ພວກເຂົາເຈົ້າໄດ້ຮັບຄຳສັ່ງໃຫ້ຢູ່ໃນເຂດອົບພະຍົບຈົນກ່ວາການເຕືອນໄພສຶນາມິຈະໄດ້ຮັບການຍົກເລີກ”
