3 ເດືອນຕົ້ນປີ 2023 GDP ແຂວງອັດຕະປື ຂະຫຍາຍຕົວຢູ່ໃນລະດັບ 2,8%

ວັນທີ 24 ເມສາ 2023, ສະຫາຍ ທະນູໄຊ ບັນຊາລິດ ຄະນະປະຈໍາພັກແຂວງ ຮອງເຈົ້າແຂວງອັດຕະປື ລາຍງານຕໍ່ກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 8 ສະໄໝທີ XI ວ່າ: ໃນໄລຍະ 3 ເດືອນຕົ້ນປີ 2023 ນີ້ GDP ຂອງແຂວງອັດຕະປື ຂະຫຍາຍຕົວຢູ່ໃນລະດັບ 2,8%, ຄິດເປັນມູນຄ່າ 2.654 ຕື້ກີບ, ເທົ່າກັບ 62% ຂອງແຜນການ, ສ່ວນຂະແໜງຕົ້ນຕໍທີ່ຊຸກຍູ້ໃຫ້ເສດຖະກິດຂະຫຍາຍຕົວ ໄດ້ແກ່: ຂະແໜງກະສິກຳ, ຂະແໜງອຸດສາຫະກຳປຸງແຕ່ງ, ຂະແໜງພະລັງງານໄຟຟ້າ ແລະ ບໍ່ແຮ່, ຂະແໜງການຄ້າ ຂາຍຍົກ-ຂາຍຍ່ອຍ ແລະ ຂະແໜງການທ່ອງທ່ຽວ.

ໃນນີ້: ຂະແໜງກະສິກຳ ໄດ້ສຸມໃສ່ການຜະລິດເພື່ອຄໍ້າປະກັນສະບຽງອາຫານ ແລະ ຜະລິດເປັນສິນຄ້າ ເປັນຕົ້ນ: ການຜະລິດເຂົ້ານາແຊງ ປະຕິບັດໄດ້ 653 ເຮັກຕາ ເທົ່າກັບ 59% ຂອງແຜນການ (ແຜນການ 1.106 ໂຕນ),ການປູກພືດຜັກ ປະຕິບັດໄດ້ 171 ເຮັກຕາ ເທົ່າກັບ 29% ຂອງແຜນການ (ແຜນການ 599 ເຮັກຕາ), ການຂະຫຍາຍຝູງສັດລ້ຽງ: ທົ່ວແຂວງມີສັດລ້ຽງທັງໝົດ 558.513 ໂຕ ຫລຸດແຜນ 81.954 ໂຕ ເທົ່າກັບ 12,8%, ສາມາດການສະໜອງຊີ້ນ, ປາ, ໄຂ່ ໄດ້ທັງໝົດ 2,72 ລ້ານກິໂລ ເທົ່າກັບ 24% ຂອງແຜນການ (ແຜນການ 11,2 ລ້ານກິໂລ), ສະເລ່ຍອັດຕາການບໍລິໂພກ 15,77 ກິໂລ/ຄົນ, ການຜະລິດເປັນສິນຄ້າ ແມ່ນສຸມໃສ່ເກັບກູ້ຜົນຜະລິດມັນຕົ້ນ ໃນປີ 2022 ປະຕິບັດໄດ້ 15.877 ເຮັກຕາ ຜົນຜະລິດມັນດິບ 280.040 ໂຕນ ເປັນເງິນ 293,96 ຕື້ກີບ,ຜົນຜະລິດມັນແຫ້ງ 112.015 ໂຕນ ເປັນເງິນ 313,64 ຕື້ກີບ. ການສົ່ງອອກຜົນຜະລິດກະສິກຳ ລວມມີໝາກກ້ວຍ, ມັນຕົ້ນ, ໝາກນັດ ແລະ ໜາກໂອ 7.570 ໂຕນ ມູນຄ່າ 3,56 ລ້ານໂດລາ; ການສົ່ງອອກຜະລິດຕະພັນກະສິກຳ: ແປ້ງໝາກກ້ວຍ, ນໍ້າຕານ, ກາກນໍ້າຕານ ແລະ ຢາງພາລາ 8.045 ໂຕນ ມູນຄ່າ 11,23 ລ້ານໂດລາ; ການສົ່ງອອກສັດ: ຄວາຍ 255 ໂຕ, ງົວ 85 ໂຕ ແລະ ປາ 17,6 ໂຕນ.

ຂະແໜງອຸດສາຫະກຳ: ການຜະລິດອຸດສາຫະກຳປຸງແຕ່ງ ແລະ ຫັດຖະກຳ: ປະຕິບັດໄດ້ 85,61 ຕື້ກີບ ເທົ່າກັບ 18% ຂອງແຜນການ, ຜົນຜະລິດທີ່ພົ້ນເດັ່ນ ແລະ ສ້າງມູນຄ່າເພີ່ມ ລວມມີຜະລິດຕະພັນໄມ້, ຜະລິດຕະພັນນໍ້າຕານ ແລະ ຜະລິດຕະພັນຢາງພາລາ. ທົ່ວແຂວງ ມີໂຮງງານອຸດສາຫະກໍາປຸງແຕ່ງ ທັງໝົດ 255 ຫົວໜ່ວຍ ມູນຄ່າການລົງທຶນ 2.182 ຕື້ກີບ; ໃນນີ້: ໂຮງງານຂະໜາດໃຫຍ່ ມີ 17 ຫົວໜ່ວຍ, ຂະໜາດກາງ 25 ຫົວໜ່ວຍ, ຂະໜາດນ້ອຍ 99 ຫົວໜ່ວຍ ແລະ ແບບຄອບຄົວ 114 ຫົວໜ່ວຍ, ຂະແໜງບໍລິການ: ມູນຄ່າການສົ່ງອອກ-ນໍາເຂົ້າ: ປະຕິບັດໄດ້ 19,6 ລ້ານໂດລາ ເທົ່າກັບ 12,65% ຂອງແຜນການ, ໃນນີ້: ມູນຄ່າການສົ່ງອອກ ປະຕິບັດໄດ້ 18,5 ລ້ານໂດລາ ເທົ່າກັບ 12,2% ຂອງແຜນການ, ປະເພດສິນຄ້າສົ່ງອອກມີ ກະແສໄຟຟ້າ, ນໍ້າຕານຊາຍ, ກາກນໍ້າຕານ, ຢາງພາລາແຫ້ງ, ຜະລິດຕະພັນໄມ້ ແລະ ສິນຄ້າກະສິກຳ. ການນຳເຂົ້າ (ຜ່ານດ່ານ) ປະຕິບັດໄດ້ 1,09 ລ້ານໂດລາ ເທົ່າກັບ 32% ຂອງແຜນການ, ສິນຄ້າການນໍາເຂົ້າມີ ພະຫະນະຮັບໃຊ້ໂຄງການ. ການຈໍລະຈອນສິນຄ້າ (ຂາຍຍົກ-ຂາຍຍ່ອຍ): ປະຕິບັດໄດ້ 2.344,29 ຕື້ກີບ ເທົ່າກັບ 41% ຂອງແຜນ ການ,ໃນນີ້: ໝວດສິນຄ້າທີ່ຊົມໃຊ້ຫລາຍແມ່ນໝວດນໍ້າມັນເຊື້ອໄຟ-ອາຍແກັດ ແລະ ໝວດສະບຽງອາຫານ.

ຂ່າວ: ແຂວງອັດຕະປື