ສຶກສອງນັກຊົກທີ່ບໍ່ເຄີຍເສຍ ເດວິສ ຊົກ ກາເຊຍ ຈຸກ ກຳມະການນັບ 10 ຍົກ 7
ການແຂ່ງຂັນທີ່ T-Mobile Arena, Las Vegas, USA ຈັດຂຶ້ນໃນປະເພດນໍ້າໜັກ 136 ປອນ ໂດຍບໍ່ມີສາຍແອວແຊ້ມເດີມພັນ. ເຖິງແມ່ນວ່າທັງສອງຈະເຄີຍໄດ້ແຊ້ມໃນລຸ້ນ lightweight ມາກໍ່ຕາມ. ໂດຍ ເດວິສ ເປັນແຊ້ມໂລກຂອງສະມາຄົມມວຍໂລກ WBA, ໃນຂະນະທີ່ ກາເຊຍ ເປັນແຊ້ມຊົ່ວຄາວຂອງສະຖາບັນດຽວກັນ.
ພຽງແຕ່ໃນຮອບຍົກທີ່ 2, ເດວິສ ຊີງຄວາມໄດ້ປຽບ ຊົກອັບເປີຄັດໃສ່ໜ້າຂອງ ກາເຊຍ ລົ້ມລົງໄປໃຫ້ຜູ້ຕັດສິນນັບ 8 ໄດ້ກ່ອນ ຫລັງຈາກນັ້ນເຮັດໃຫ້ ກາເຊຍ ຕ້ອງເປີດເກມບຸກເພື່ອຕີຕື້ນ ແຕ່ ເດວິສ ຍັງສາມາດຮັກສາຄວາມໄດ້ປຽບໄວ້ໄດ້ຈົນເຖິງຍົກທີ່ 7. ເດວິສ ເຫັນໂອກາດທີ່ຈະຊົກຊ້າຍເຂົ້າໄປໃນລຳໂຕຂອງ ກາເຊຍ ຕອນທຳອິດບໍ່ເປັນຫຍັງ ແຕ່ໃນສອງສາມວິນາທີຕໍ່ມາ ກາເຊຍ ຊຸດລົ້ມລົງພື້ນໄປໃຫ້ຜູ້ຕັດສິນນັບ 10.
ເດວິສ ເດັກສັງກັດຂອງ Floyd Mayweather Jr., ຍັງຮັກສາສະຖິຕິບໍ່ເສຍໃຜດ້ວຍການຊະນະ 29 ນັດຕິດຕໍ່ກັນ, ໂດຍເປັນການນັອກ 27 , ໃນຂະນະທີ່ ກາເຊຍ ເດັກສັງກັດ Golden Boy ຂອງ Oscar de la Hoya ເສຍເປັນນັດທຳອິດໃນການຊົກອາຊີບ 23 ນັດ ເປັນການນັອກ 19 ແລະ ເສຍ 1.
