ເຫດລົດ 3 ລໍ້ຕຳລົດບັນທຸກ ເສຍຊີວິດ 1 ຄົນ ຢູ່ເສັ້ນທາງ 450 ປີ
ເວລາປະມານ 16:21 ໂມງ ຂອງວັນທີ 21 ເມສາ 2023, ໜ່ວຍກູ້ໄພມູນນິທິຊ່ວຍເຫລືອຄົນທຸກຍາກແຫ່ງ ສປປ ລາວ 1623 ໄດ້ຮັບແຈ້ງເຫດວ່າມີ ລົດສາມລໍ້ ແລະ ລົດບັນທຸກຕຳກັນ ຢູ່ເສັ້ນທາງ 450 ປີ ນະຄອນຫລວງວຽງຈັນ.
ໜ່ວຍກູ້ໄພມູນນິທິ 1623 ຈຶ່ງໄດ້ອອກກວດສອບພົບເຫັນຜູ້ບາດເຈັບ 1 ຄົນ ແລະ ເສຍຊີວິດ 1 ຄົນ (ຕິດພາຍໃນລົດ). ຜູ້ໄດ້ບາດເຈັບແມ່ນເປັນ ເພດຍິງ ອາຍຸ 18 ປີ ອາຊີບປະຊາຊົນ ບ້ານຜາໂຄມ ເມືອງຫລວງພະບາງ ແຂວງຫລວງພະບາງ. ອາການເບື້ອງຕົ້ນແມ່ນມີບາດຈີກຢູ່ແກ້ມເບື້ອງຂວາ.
ສ່ວນຜູ້ເສຍຊີວິດເປັນ ເພດຊາຍ ອາຍຸ 43 ປີ ອາຊີບປະຊາຊົນ ບ້ານຊ້າງຄູ້ ເມືອງໄຊທານີ ນະຄອນຫລວງວຽງຈັນ ແມ່ນຕິດພາຍໃນລົດບໍ່ສາມາດເອົາອອກມາຈາກລົດໄດ້, ໜ່ວຍກູ້ໄພຈຶ່ງໄດ້ນຳເອົາອຸປະກອນຕັດ-ຖ່າງເຂົ້າຊ່ວຍເຫລືອຜູ້ເສຍຊີວິດອອກຈາກລົດ.
ດັ້ງນັ້ນໜ່ວຍກູ້ໄພມູນນິທິຈຶ່ງໄດ້ປະຖົມພະຍາບານຂັ້ນຕົ້ນໃຫ້ຜູ້ບາດເຈັບແລ້ວນຳສົ່ງໂຮງໝໍມິດຕະພາບ 150 ຕຽງ ແລະ ສ່ວນສົບຜູ້ເສຍຊີວິດແມ່ນນຳສົ່ງໃຫ້ຍາດຕິພີ່ນ້ອງເພື່ອເຮັດພິທີທາງສາສະໜາ.
ຂໍສະແດງຄວາມເສຍໃຈກັບຍາດຕິພີ່ນ້ອງຂອງຜູ້ເສຍຊີວິດຄັ້ງນີ້ດ້ວຍ.
ຂໍ້ມູນ: ໜ່ວຍກູ້ໄພ 1623
