ອາເຈນຕິນາຜະເຊີນການລະບາດ “ໄຂ້ເລືອດອອກເດັງກີ” ມີຜູ້ເສຍຊີວິດແລ້ວ 40 ຄົນ
ອາເຈນຕິນາຢືນຢັນການພົບຜູ້ເສຍຊີວິດແລ້ວ 40 ຄົນ ຈາກ “ໄຂ້ເລືອດເດັງກີ” ເຊິ່ງແພ່ລະບາດຢ່າງໜັກໃນປີນີ້.
ວັນທີ 22 ເມສາ, ສໍານັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກຂອງອາເຈນຕິນາລາຍງານ ການພົບຜູ້ເສຍຊີວິດຢ່າງໜ້ອຍ 40 ຄົນ ຈາກໄຂ້ເລືອດອອກເດັງກີ ແລະ ມີຜູ້ຕິດເຊື້ອສະສົມຫລາຍກວ່າ 60.000 ຄົນ ນັບແຕ່ຕົ້ນປີນີ້ ສ່ວນຫລາຍຢູ່ທາງພາກຕາເວັນຕົກສຽງເໜືອຂອງປະເທດ ເຊິ່ງມີຊາຍແດນຕິດກັບຊິລີ ແລະ ໂບລິເວຍ.
ເຖິງວ່າພາກລັດຢືນຢັນວ່າ: ສະຖານະການດັ່ງກ່າວ “ເຂົ້າສູ່ະພາບປົກກະຕິ” ແຕ່ຖືເປັນການລະບາດໃຫຍ່ຂອງໄຂ້ເລືອດອອກເດັງກີໃນອາເຈນຕິນາ ເປັນຄັ້ງທໍາອິດນັບແຕ່ປີ 2020.
ຂໍ້ມູນຂອງອົງການອະນາໄມໂລກ (WHO) ລະບຸວ່າ: ໄຂ້ເລືອດອອກເດັງກີ ເຊິ່ງເກີດຈາກເຊື້ອໄວຣັສຊື່ດຽວກັນ ທີ່ມີຍຸງລາຍເປັນພາຫະ ຂ້າຊີວິດປະຊາກອນໂລກສູງເຖິງປີລະ 50-100 ລ້ານຄົນ ສ່ວນຫລາຍເປັນພົນລະເມືອງທີ່ອາໄສຢູ່ໃນປະເທດອາກາດຮ້ອນຊຸ່ມ ຫລື ເຄິ່ງເຂດຮ້ອນ, ທໍາອິດຜູ້ຕິດເຊື້ອຈະມີອາການເຈັບຫົວ, ປວດຕາມຂໍ້, ເປັນໄຂ້ ແລະ ມີຜື່ນແດງຕາມຮ່າງກາຍຄືຜື່ນພະຍາດຫັດ, ແຕ່ຖ້າປ່ອຍໃຫ້ອາການຮຸນແຮງອາດເຮັດໃຫ້ເກີດສະພາບເກັດເລືອດຕໍ່າ ແລະ ຄວາມດັນເລືອດຕໍ່າຈົນຊັອກ ແລະ ເສຍຊີວິດໄດ້.
