ອິນເດຍພົບຜູ້ຕິດເຊື້ອໂຄວິດ-19 ສາຍພັນ XBB.1.16 ສູງເຖິງ 12,591 ຄົນ

ສຳນັກຂ່າວຕ່າງປະເທດລາຍງານ: ວັນທີ 20 ເມສາ 2023, ກະຊວງສາທາລະນະສຸກອິນເດຍ ໄດ້ຖະແຫລງຂ່າວກ່ຽວກັບສະຖານະການໂຄວິດ-19 ໂດຍສະເພາະຄວາມກັງວົນຕໍ່ເຊື້ອພະຍາດໂຄວິດ-19 ສາຍພັນໃໝ່ XBB.1.16 ທີ່ກຳລັງແພ່ລະບາດໜັກ, ປັດຈຸບັນອິນເດຍພົບຜູ້ຕິດເຊື້ອໃໝ່ສູງເຖິງ 12,591 ຄົນ ເຮັດໃຫ້ສະຖິຕິຈຳນວນຜູ້ຕິດເຊື້ອເພີ່ມຂຶ້ນມາເປັນ 65,286 ຄົນ ໃນຮອບ 8 ເດືອນ.

ກະຊວງສາທາລະນະສຸກອິນເດຍລະບຸວ່າ: ມີຜູ້ເສຍຊີວິດຈາກໂຄວິດ-19 ເພີ່ມຂຶ້ນ 40 ຄົນ ເຮັດໃຫ້ຈຳນວນຜູ້ເສຍຊີວິດຈາກໂຄວິດຂຶ້ນມາຢູ່ທີ່ 531,230 ຄົນ, ແລະ ມີຈຳນວນຜູ້ຕິດເຊື້ອສະສົມທັງໝົດເພີ່ມເປັນ  44.8 ລ້ານຄົນ.

ທັງນີ້, ບັນດາຜູ້ຊ່ຽວຊານກຳລັງເຝົ້າຕິດຕາມວ່າ: ເຊື້ອໂຄວິດ-19 XBB.1.16 ຈະແພ່ຕິດເຊື້ອໄດ້ໄວຂຶ້ນກວ່າໂອໄມຄອນ ຫລາຍພຽງໃດ ແລະ ຈະເຮັດໃຫ້ເກີດມີອາການເພີ່ມຂຶ້ນຮຸນແຮງຫລືບໍ ເນື່ອງຈາກສາຍພັນນີ້ XBB.1.16 ສາມາດຫລົບຫລີກພູມຄຸ້ມກັນໃນຮ່າງກາຍມະນຸດໄດ້ດີ.