ທະນາຄານໄຕ້ຫວັນ ແລະ ຫວຽດນາມ ສົນໃຈລົງທຶນປ່ອຍເງິນກູ້ຢູ່ລາວ
ໃນໂອກາດທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງຄະນະສະຖາບັນການເງິນ ແລະ ປ່ອຍເງິນກູ້ຂອງທະນາຄານໄຕ້ຫວັນ ແລະ ທະນາຄານ ສສ ຫວຽດນາມ ຊຶ່ງນຳພາຄະນະໂດຍທ່ານ ເຈມ (James) ຮອງປະທານອາວຸໂສທະນາຄານຄາເທຢູໄນເຕັດໄຕ້ຫວັນໃນອາທິດຜ່ານມາ, ຊຶ່ງທັງສອງໄດ້ສະແດງເຈດຈໍານົງ ແລະ ມີຄວາມສົນໃຈຢາກຈະມາລົງທຶນຢູ່ ສປປ ລາວ ໃນດ້ານການເງິນ, ການປ່ອຍເງິນກູ້ ແລະ ອື່ນໆ.
ໃນໂອກາດນີ້, ທ່ານ ສົມດີ ດວງດີ ໄດ້ສະແດງຄວາມຄວາມຂອບໃຈມາຍັງບັນດາສະຖາບັນການເງິນ ແລະ ການປ່ອຍເງິນກູ້, ບັນດາທະນາຄານຈາກໄຕ້ຫວັນ ແລະ ທະນາຄານຈາກ ສສ ຫວຽດນາມ ທີ່ມີຄວາມສົນໃຈຢາກຈະມາລົງທຶນຢູ່ ສປປ ລາວ ໃນດ້ານການເງິນ ແລະ ສີນເຊື່ອ.
ປັດຈຸບັນ ສປປ ລາວ ກຳລັງຈັດຕັ້ງປະຕິ ບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ເພື່ອແກ້ໄຂຄວາມທຸກຍາກຂອງປະຊາຊົນໃຫ້ດີຂຶ້ນ ແລະ ກ້າວໄປສູ່ການນໍາເອົາປະເທດໃຫ້ຫລຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ 2020 ໃຫ້ປະສົບຜົນສໍາເລັດ.
