ໄລຍະບຸນປີໃໝ່ລາວ ນະຄອນຫລວງວຽງຈັນ ບໍ່ມີຄວາມເສຍຫາຍ ຈາກອັກຄີໄພ

ວັນທີ 19 ເມສາ 2023 ຜ່ານມາ, ທ່ານ ພັທ ບຸນຍົງ ໄຊປັນຍາ ຮອງຫົວໜ້າພະແນກສະກັດກັ້ນ ແລະ ຕ້ານອັກຄີໄພ ນະຄອນຫລວງວຽງຈັນໃຫ້ຮູ້ວ່າ: ໃນໄລຍະສະເຫລີມສະຫລອງບຸນປີໃໝ່ລາວ ວັນທີ 13-16 ເມສາ 2023 ຢູ່ນະຄອນຫລວງວຽງຈັນ ມີອັກຄີໄພເກີດຂຶ້ນທັງໝົດ 4 ເລື່ອງ, ແຕ່ບໍ່ມີຜົນເສຍຫາຍຂອງຊັບສິນ ແລະຊີວິດ, ເນື່ອງຈາກອັກຄີໄພທີ່ເກີດຂຶ້ນແມ່ນໄຟໄໝ້ປ່າຫຍ້າ ໃນນີ້ໄຟໄໝ້ປ່າຫຍ້າເຂດບ້ານທົ່ງກາງ, ໄຟໄໝ້ປ່າຫຍ້າເຂດດອນຈັນ ບ້ານຂາວ ເມືອງສີສັດຕະນາກ, ໄຟໄໝ້ປ່າຫຍ້າເຂດບ້ານປາກທ້າງ ເມືອງສີໂຄດຕະບອງ ແລະ ໄຟໄໝ້ປ່າຫຍ້າເຂດຫລັກ 16 ເມືອງໄຊທານີ, ສ່ວນສາເຫດທີ່ພາໃຫ້ເກີດອັກຄີໄພ ແມ່ນຢູ່ຂັ້ນຕອນການສືບສວນ-ສອບສວນຂອງເຈົ້າໜ້າທີ່.