ກຳປູເຈຍ ເປັນຊາດທຳອິດບໍ່ເກັບຄ່າບ່ອນພັກ-ອາຫານ ນັກກິລາ ທັງ 11 ຊາດໃນຊີເກມ
ທ່ານ ວັດ ຈຳເຣີນ ເລຂາທິການຄະນະກຳມະການຈັດການແຂ່ງຂັນກິລາຊີເກມ ຄັ້ງທີ 32 ທີ່ປະເທດກຳປູເຈຍ ເປັນເຈົ້າພາບລະຫວ່າງວັນທີ 5-17 ພຶດສະພາ ແລະ ອາຊຽນພາຣາເກມ ຄັ້ງທີ 12 ລະຫວ່າງວັນທີ 3-9 ມິຖຸນາ 2023 ຢືນຢັນວ່າ ກຳປູເຈຍ ຈະບໍ່ເກັບຄ່າບ່ອນພັກ ແລະ ອາຫານສຳລັບນັກກິລາ ແລະ ທີມງານຈາກທຸກຊາດທີ່ເຂົ້າຮ່ວມການແຂ່ງຂັນ ຊີເກມ ແລະ ອາຊຽນພາຣາເກມ.
ຕາມປົກກະຕິແລ້ວໃນຊີເກມ ທຸກຄັ້ງ ຊາດເຈົ້າພາບຈະມີການເກັບເງິນຈຳນວນ 50 ຫລຽນສະຫະລັດ/ມື້ ຕໍ່ນັກກິລາ 1 ຄົນ ຈາກຊາດສະມາຊິກ ແຕ່ສຳລັບຄັ້ງນີ້ຈະບໍ່ມີການເກັບເງິນຈຳນວນດັງກ່າວ ໂດຍເລື່ອງນີ້ຖືກຢືນຢັນໃນບ່ອນປະຊຸມ ເຊິ່ງມີ ສົມເດັດພິໄຊເສນາ ເຕຍ ບັນ ຮອງນາຍົກລັດຖະມົນຕີ ແລະ ລັດຖະມົນວ່າການກະຊວງປ້ອງກັນຊາດກຳປູເຈຍ ໃນຖານະປະທານຄະນະກຳມການຈັດການແຂ່ງຂັນຊີເກມ ຄັ້ງທີ 32 ແລະ ດຣ ທອງ ຄອນ ລັດຖະມົນຕີວ່າການກະຊວງການທ່ຽວທ່ອງ ໃນຖານະປະທານຄະນະກຳມະການໂອລິມປິກແຫ່ງຊາດກຳປູເຈຍເຂົ້າຮ່ວມ.
ທ່ານ ວັດ ຈຳເຣີ້ນ ເປີດເຜີຍວ່າ : “ ໃນການປະຊຸມທີ່ສຳຄັນ ເຮົາທຸກຄົນໄດ້ຮັບຄຳແນະນຳຢ່າງສູງຈາກ ສົມເດັດພິໄຊເສນາ ເຕຍ ບັນ ເຊິ່ງກ່າວເຖິງການຕັດສິນໃຈຢ່າງສູງຂອງ ສົມເດັດ ຮຸນເຊັນ ນາຍົກລັດຖະມົນຕີກຳປູເຈຍວ່າ ຜູ້ແທນກິລາຈາກທຸກປະເທດໃນອາຊຽນບໍ່ຈຳເປັນຕ້ອງໃຫ້ເງິນ 50 ຫລຽນສະຫະລັດຕໍ່ຄົນຕໍ່ມື້ ໃຫ້ກັບເຈົ້າບ້ານຄືກຳປູເຈຍ ເຮົາທຸກຄົນຮູ້ສຶກອົບອຸ່ນ ແລະ ຕື່ເຕັ້ນຫລາຍ ດ້ວຍຄວາມພາກພູມໃຈໃນຊາດພາຍໃຕ້ການນຳລະດັບສູງຂອງ ສົມເດັດ ຮຸນເຊນ ເຮົາທຸກຄົນຈະເຄົາລົບການຕັດສິນໃຈນີ້ ”.
“ ຄະນະກຳມະການຜູ້ຊ່ຽວຊານທັງຫມົດໄດ້ຮັບຄຳແນະນຳເພີ່ມຕື່ມຈາກສົມເດັດພິໄຊເສນາ ເຕຍ ບັນ ແລະ ເຮົາຈະແຈ້ງໃຫ້ຜູ້ແທນຊີເກມ-ອາຊຽນ ພາຣາເກມ ຮູ້ທັງຫມົດວ່າຈະບໍ່ຮັບຄ່າທຳນຽມ ຫລື ຄ່າໃຊ້ຈ່າຍໃດໆ ເຮົາຈະໃຫ້ຂໍ້ມູນນີ້ກັບທຸກປະເທດທີ່ກຽມເຂົ້າຮ່ວມການແຂ່ງຂັນກິລາຊີເກມ-ອາຊຽນ ພາຣາເກມ 2023 ເຊິ່ງຈະເປັນປະວັດສາດຄັ້ງທຳອິດຂອງກຳປູເຈຍ ຈຸດປະສົງຫລັກເພື່ອສົ່ງເສີມການແຂ່ງຂັນກິລາທັງຫມົດໃນກຳປູເຈຍໃຫ້ອົບອຸ່ນ ແລະ ປະສົບຄວາມສຳເລັດຮ່ວມກັນ ນີ້ຄືປະເດັນທີ່ສຳຄັນທີ່ສຸດໃນການປະຊຸມທີ່ມີຄວາມຫມາຍ ”.
ນອກຈາກນີ້ ການປຊຸມຍັງໄດ້ເນັ້ນປະເດັນສຳຄັນຫລາຍປະການ ເຊັ່ນ ສະຫລຸບລາຍງານຮ່ວມ ແລະ ສະຖານະການປັດຈຸບັນໃນການກຽມຄວາມພ້ອມການເປັນເຈົ້າພາບຊີເກມ ຄັ້ງທີ 32 ແລະ ອາຊຽນພາຣາເກມ ຄັ້ງທີ 12 ໂດຍເປັນລາຍລະອຽດກ່ຽວກັບແຜນ ແລະ ແກ້ໄຂບັນຫາທີ່ເຫລືອບາງສ່ວນ ພ້ອມກັນນີ້ທີ່ປະຊຸມຍັງໄດ້ໃຫ້ຄວາມສຳຄັນກັບການຈັດຄວາມເປັນລະບຽບຮ້ອຍຮຽບ ສຸກຂະອະນາໄມ ການຕົກແຕ່ງໃຫ້ມີຄວາມສວຍງາມ.
ສຳລັບກ່ອນໜ້ານີ້ກຳປູເຈຍ ລາຍງານວ່າຈະມີນັກກິລາ ແລະ ທີມງານຈາກຊາດຕ່າງໆເຂົ້າຮ່ວມໃນຊີເກມ ຄັ້ງນີ້ 11,453 ຄົນ ເທົ່າກັບວ່າຄາໃຊ້ຈ່າຍດັ່ງກ່າວທີ່ກຳປູເຈຍ ໃຈດີບໍ່ເກັບຊາດສະມາຊິກນັ້ນເປັນຈຳນວນເງິນລວມແລ້ວຫລາຍກວ່າ 19.4 ລ້ານບາດ/ມື້.
