ບັງກະລາເທດຮ້ອນທີ່ສຸດໃນຮອບຫລາຍທົດສະວັດ ຫລັງຄື້ນຄວາມຮ້ອນແຜ່ປົກຄຸມຫລາຍພື້ນທີ່ທົ່ວປະເທດ

ບັງກະລາເທດກໍາລັງຜະເຊີນສະຖານະການອຸນຫະພູມເພີ່ມສູງຂຶ້ນຢ່າງຕໍ່ເນື່ອງ ສົ່ງຜົນໃຫ້ສະພາບອາກາດຮ້ອນທີ່ສຸດໃນຮອບຫລາຍທົດສະວັດ ຫລັງຄື້ນຄວາມຮ້ອນແຜ່ປົກຄຸມຫລາຍພື້ນທີ່ທົ່ວປະເທດ ໂດຍສະເພາະນະຄອນຫລວງທາກາ ເມືອງຫລວງຂອງບັງກະລາເທດ ໃນທ້າຍອາທິດຜ່ານມາ ວັດແທກອຸນຫະພູມໄດ້ສູງເຖິງ 40,6 ອົງສາ ສູງສຸດໃນຮອບເກືອບ 60 ປີ.

ຂະນະທີ່ວັນທີ 17 ເມສາ, ເມືອງອິຊາວາດີໃນພາກພື້ນຣາຊາຮີ ທາງຕາເວັນຕົກສຽງເໜືອຂອງບັງກະລາເທດ ວັດແທກອຸນຫະພູມໄດ້ສູງເຖິງ 43 ອົງສາ ຖືເປັນອຸນຫະພູມສູງທີ່ສຸດທີ່ວັດແທກໄດ້ພາຍໃນປີນີ້ຂອງບັງກະລາເດດ.

ສ່ວນອຸນຫະພູມສູງທີ່ສຸດທີ່ເຄີຍວັດແທກໄດ້ ນັບແຕ່ບັງກະລາເທດປະກາດເອກະລາດຈາກປາກິດສະຖານໃນປີ 1971 ຄື 45,1 ອົງສາ ວັດແທກໄດ້ຢູ່ພາກຣຊາຮີ ໃນວັນທີ 15 ພຶດສະພາ 1972.

ຜູ້ຊ່ຽວຊານຊີ້ວ່າ: ອຸນຫະພູມທີ່ເພີ່ມສູງຂຶ້ນ ແລະ ຄື້ນຄວາມຮ້ອນທີ່ມີທ່າອ່ຽງຈະແຜ່ຂະຫຍາຍ ແລະ ປົກຄຸມຫລາຍພື້ນທີ່ທົ່ວໂລກຢ່າງຍາວນານຍິ່ງຂຶ້ນນັ້ນ ສ່ວນໜຶ່ງເປັນຜົນມາຈາກການປ່ຽນແປງຂອງສະພາບອາກາດໂລກ ເຊິ່ງມີສ່ວນເຮັດໃຫ້ວິກິດໂລກແປປ່ວນຍິ່ງຂຶ້ນ, ປະສົບໄພພິບັດຫລາຍຂຶ້ນ, ຮຸນແຮງຂຶ້ນ, ຍາວນານຂຶ້ນ ອາດເຖິງເວລາທີ່ທຸກຝ່າຍຕ້ອງຮ່ວມມືກັນແກ້ໄຂ ແລະ ກຽມພ້ອມຮັບມືຕໍ່ບັນຫາຕ່າງໆເຫລົ່ານີ້ຢ່າງຈິງຈັງ.

ສະພາບອາກາດທີ່ຮ້ອນຂຶ້ນນີ້ ສົ່ງຜົນໃຫ້ປະຊາຊົນຈໍານວນຫລາຍຢູ່ບັງກະລາເດດຕ່າງຫາວິທີຄາຍຮ້ອນ ບໍ່ວ່າຈະເປັນ ການດື່ມນໍ້າເພື່ອດັບຄວາມຮ້ອນ, ການພົມນໍ້າຊ່ວງບໍລິເວນຫົວ ແລະ ລໍາຄໍ ລວມທັງລ້າງໜ້າລ້າງຕາເພື່ອໃຫ້ເກີດຄວາມສົດຊື່ນ ໂດຍສະເພາະໃນໄລຍະເວລາກາງເວັນທີ່ແດດຮ້ອນແຮງ ແລະ ອຸນຫະພູມສູງ ຫລາຍຄົນເລືອກຈະນັ່ງພັກໃນຮົ່ມ ແລະ ໃນບ່ອນສະພາບອາກາດຖ່າຍເທໄດ້ສະດວກ ເພື່ອປ້ອງກັນການເປັນພະຍາດລົມແດດ (Heatstroke).

ອ້າງອີງ:

https://bdnews24.com/bangladesh/9fo6ipzp3o

https://www.dhakatribune.com/…/intense-heatwave-grips…

https://www.preventionweb.net/…/do-these-heat-waves…

https://www.indiatoday.in/…/heatwave-breaks-58-year…