ພະແນກອຸດສະຫະກຳ ແລະ ການຄ້າ ເມືອງໄຊຍະບູລີ ລົງກວດກາການຊື້-ຂາຍສິນຄ້າພາຍໃນຕະຫລາດ  ໄລຍະບຸນປີໃໝ່ລາວ

ແຫລ່ງຂ່າວຈາກ ແຂວງໄຊຍະບູລີ ໃຫ້ຮູ້ວ່າ: ຫ້ອງການ ອຸດສາຫະກໍາ ແລະ ການຄ້າ ເມືອງໄຊຍະບູລີ ສົມທົບກອງຄະນະກຳມະການຄຸ້ມຄອງລາຄາສິນຄ້າ ແລະ ຄ່າບໍລິການຂັ້ນເມືອງ ລົງຕິດຕາມກວດກາການແລກປ່ຽນຊື້-ຂາຍສິນຄ້າໃນທ້ອງຕະຫລາດພາຍໃນເມືອງໄຊຍະບູລີ ໃນວັນທີ 14 ເມສາ 2023 ເພື່ອເປັນການປົກປ້ອງສິດ ແລະ ຜົນປະໂຫຍດອັນຊອບທໍາຂອງຜູ້ດໍາເນີນທຸລະກິດທີ່ປະຕິບັດຖືກຕ້ອງຕາມລະບຽບກົດໝາຍ ແລະ ເພື່ອກຳຈັດການສວຍໂອກາດ ແລະ ລະເມີດຝ່າຝືນລະບຽບການກ່ຽວກັບລາຄາສິນຄ້າ ແລະ ຄ່າບໍລິການເຊັ່ນ: ສ້າງສະພາບການປັ່ນປ່ວນ ແລະ ກັກຕຸນສິນຄ້າ ເພື່ອຫວັງເກງກຳໄລໂດຍພາລະການ ເຊິ່ງເຮັດໃຫ້ສັງຄົມບໍ່ມີຄວາມສະຫງົບ ແລະ ເພື່ອການປົກປ້ອງສິດ ແລະ ຜົນປະໂຫຍດອັນຊອບທຳຂອງຜູ້ຊົມໃຊ້ ຫລື ຜູ້ບໍລິໂພກທົ່ວໄປບໍ່ໃຫ້ຖືກເອົາລັດເອົາປຽບທາງດ້ານລາຄາ ໃນການຊື້ສິນຄ້າ ທັງຮັບປະກັນໃຫ້ທົ່ວສັງຄົມມີຄວາມສະຫງົບ ໂດຍສະເພາະແມ່ນໃນໄລຍະບຸນປີໃໝ່ລາວ.

ການລົງຕິດຕາມຄັ້ງນີ້ ເພື່ອກວດກາຄວາມເປັນລະບຽບຮຽບຮ້ອຍໃນການແລກປ່ຽນຊື້ຂາຍສິນຄ້າ ພ້ອມທັງໄດ້ແນະນໍາບັນດາຜູ້ປະກອບການ ນັກທຸລະກິດພໍ່ຄ້າຊາວຂາຍໃຫ້ຂາຍສິນຄ້າໃນລາຄາທີ່ລັດໄດ້ກຳນົດ ແລະ ໃຫ້ປະຕິບັດຕາມດຳລັດ ສະບັບເລກທີ 474/ນຍ, ລົງວັນທີ 18/11/2010 ວ່າດ້ວຍການຄຸ້ມຄອງລາຄາສິນຄ້າ ແລະ ຄ່າບໍລິການຢ່າງເຂັ້ມງວດ ເປັນຕົ້ນ ລາຄາສິນຄ້າປະເພດ: ເຂົ້າ, ຊີ້ນ, ປາ  ແລະ ໄຂ່ໄກ່, ເຊິ່ງລາຄາຕາມປົກກະຕິ ຊີ້ນງົວ ແລະ ຊີ້ນຄວາຍລາຄາ 100.000 ກີບຕໍ/ກິໂລ, ຊີ້ນໝູລາຄາ 75.000 ກີບ/ກິໂລ, ປານິນ 46.000 ກີບ/ກິໂລ, ປາດຸກ 36.000 ກີບ/ກິໂລ,ໄຂ່ໄກ່ພັນ 56.000 ກີບ/ແຕະ, ເຂົ້າສານໜຽວ 14.000 ກີບ/ກິໂລ, ເຂົ້າສານຈ້າວ 15.000 ກີບ/ກິໂລ ແລະ ພືດຜັກຕ່າງໆໃຫ້ຢູ່ໃນລາຄາທີ່ເໝາະສົມ.