ກຳປູເຈຍ ສາມາດດຶງດູດການລົງທຶນ 39 ໂຄງການ ມີມູນຄ່າປະມານ 294 ລ້ານໂດລາ
ຂ່າວຕ່າງປະເທດລາຍງານ, ສະພາເພື່ອການພັດທະນາຂອງກຳປູເຈຍ (CDC) ໄດ້ເປີດເຜີຍບົດລາຍງານໂດຍລະບຸວ່າ ກຳປູເຈຍສາມາດດຶງດູດໂຄງການ ການລົງທຶນຊັບສິນຖາວອນ 39 ໂຄງການມູນຄ່າ 294 ລ້ານໂດລາ ໃນໄຕມາດທຳອິດຂອງປີ 2023 ຊຶ່ງມີສ່ວນຊ່ວຍສ້າງວຽກໃໝ່ປະມານ 47.000 ຕຳແໜ່ງງານ.
ບົດລາຍງານລະບຸວ່າ ຈີນຍັງຄົງຄອງຕຳແໜ່ງຜູ້ລົງທຶນຕ່າງປະເທດລາຍໃຫຍ່ທີ່ສຸດຂອງກຳປູເຈຍດ້ວຍອັດຕາສ່ວນການລົງທຶນເກືອບ 70% ຂອງການລົງທຶນທັງໝົດໃນເດືອນມັງກອນເຖິງເດືອນມີນາ ຄິດເປັນມູນຄ່າ 201 ລ້ານໂດລາ. ສ່ວນຜູ້ລົງທຶນຕ່າງປະເທດລາຍອື່ນແມ່ນມາຈາກເຊເຊວເລສ, ຊາມົວ, ສ ເກົາຫຼີ, ສິງກະໂປ ແລະ ຊູແອັດ ໂດຍໂຄງການການລົງທຶນ 38 ໂຄງການມຸ່ງເນັ້ນໄປທີ່ພາກອຸດສາຫະກຳ ແລະ ມຸ່ງເນັ້ນພາກການທ່ອງທ່ຽວອີກ 1 ໂຄງການ.
ທ່ານ ແປນ ໂສວິເຊດ ຮອງລັດຖະມົນຕີ ແລະ ໂຄສົກກະຊວງການຄ້າຂອງກຳປູເຈຍກ່າວວ່າ: ຂໍ້ຕົກລົງຫຸ້ນສ່ວນທາງດ້ານເສດຖະກິດລະດັບພາກພື້ນ (RCEP), ຂໍ້ຕົກລົງການຄ້າເສລີກຳປູເຈຍ-ຈີນ (CCFTA) ແລະ ກົດໝາຍການລົງທຶນທີ່ເອື້ອຍອຳນວຍຂອງກຳປູເຈຍລ້ວນແຕ່ເປັນປັດໄຈສຳຄັນທີ່ດຶງດູດນັກລົງທຶນຕ່າງປະເທດຫລາຍຂຶ້ນ.
ທ່ານ ລິມ ເຮງ ຮອງປະທານຫໍການຄ້າກຳປູເຈຍກ່າວວ່າ: ການລົງທຶນໃໝ່ໆຈະນຳພາເງິນທຶນ, ເຕັກໂນໂລຊີ ແລະ ໂອກາດການເຮັດວຽກໃໝ່ມາສູ່ກຳປູເຈຍ ໂດຍສະແດງໃຫ້ເຫັນວ່າ ການລົງທຶນຂອງຈີນມີຄວາມສຳຄັນຢ່າງຍິ່ງໃນການຊ່ວຍກະຕຸ້ນການເຕີບໂຕທາງດ້ານເສດຖະກິດ ແລະ ການຄ້າຂອງກຳປູເຈຍໃນຍຸກຫລັງການແຜ່ລະບາດຂອງພະຍາດໂຄວິດ-19.
