ໂຈະຮັບເອກະສານການຂໍອະນຸຍາດດໍາເນີນການບໍລິການຈັດຫາງານຊົ່ວຄາວ

ວັນທີ 13 ເມສາ 2023 ຜ່ານມານີ້ ຫ້ອງການກະຊວງແຮງງານ ແລະ ສະຫວັດດີການສັງຄົມອອກແຈ້ງການ  ໂຈະຮັບເອກະສານການຂໍອະນຸຍາດດໍາເນີນການບໍລິການຈັດຫາງານຊົ່ວຄາວ ໂດຍອີງຕາມ ແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 1481/ຫສນຍ, ລົງວັນທີ 14 ຕຸລາ 2022 ຕອນທ້າຍຂໍ້ທີ 1 ທີ່ຊີ້ນໍາວ່າ ໃຫ້ກະຊວງ ແຮງງານ ແລະ ສະຫວັດດີການສັງຄົມ ປະເມີນຄືນບັນດາບໍລິສັດຈັດຫາງານ ຖ້າບໍລິສັດໃດຫາກບໍ່ປະຕິບັດຕາມກົດໝາຍ ແລະ ລະບຽບການກ່ຽວຂ້ອງແມ່ນໃຫ້ກ້າວໄປສູ່ການຖອນໃບອະນຸຍາດ.

ເພື່ອເຮັດໃຫ້ ການຈັດຫາງານຂອງບັນດາວິສາຫະກິດຈັດຫາງງານ ທີ່ກະຊວງແຮງງານ ແລະ ສະຫວັດດີການ ສັງຄົມໄດ້ອະນຸຍາດໄປແລ້ວ ໄດ້ຮັບການປັບປຸງ ເພື່ອຫັນເຂົ້າສູ່ການມີຄຸນນະພາບສູງຂຶ້ນ ຕາມທິດຊີ້ນໍາຂອງຂັ້ນເທິງ ທີ່ຖື ເອົາຄຸນນະພາບຂອງການໃຫ້ການບໍລິການເປັນກົກ ກະຊວງແຮງງານ ແລະ ສະຫວັດຕີການສັງຄົມ ມີຄວາມຈໍາເປັນຕ້ອງ ໄດ້ດໍາເນີນການປະເມີນຈັດລະດັບການດໍາເນີນທຸລະກິດຂອງບັນດາບໍລິສັດຈັດຫາງງານທັງຫມົດທີ່ກໍາລັງເຄື່ອນໄຫວຢູ່ໃນ ປັດຈຸບັນ ໂດຍຈະເລີ່ມແຕ່ວັນທີ 02 ພຶດສະພາ 2023 ເປັນຕົ້ນໄປ ຈົນຮອດວັນທີ 31 ກໍລະກົດ 2023 ເປັນຢ່າງໄວ,

ໃນຊ່ວງໄລຍະເວລາດັ່ງກ່າວ ກະຊວງຈະໂຈະການຮັບເອກະສານທີ່ມີຈຸດປະສົງເພື່ອສະເໜີ ຂໍອະນຸຍາດສ້າງຕັ້ງ ຫຼື ດໍາເນີນທຸລະກິດກ່ຽວກັບການບໍລິການຈັດຫາງານໄປກ່ອນ ເມື່ອສິ້ນສຸດເວລາຂອງການໂຈະ ຈະໄດ້ແຈ້ງໃຫ້ຊາບຢ່າງເປັນທາງການກ່ຽວກັບການສືບຕໍ່ຮັບການສະເຫນີຂໍອະນຸຍາດຕາມລະບຽບການທີ່ມີຢູ່. ສໍາລັບການ ສະເໜີມາກ່ອນວັນທີ 2 ພຶດສະພາ 2023 ກະຊວງຈະສືບຕໍ່ພິຈາລະນາຕາມຄວາມເຫມາະສົມກັບສະພາບ ແລະ ເງື່ອນໄຂຕາມຄວາມພ້ອມຕົວຈິງຂອງຜູ້ສະເໜີ ແລະ ຕາມລະບຽບການທີ່ມີຢູ່.

ດັ່ງນັ້ນ, ຈຶ່ງແຈ້ງການມາເພື່ອຊາບ ແລະ ຫວັງຢ່າງຍິ່ງວ່າ ຈະໄດ້ຮັບການຮ່ວມມືຈາກ ທຸກທ່ານ, ທຸກພາກສ່ວນ ຕາມແຈ້ງການສະບັບນີ້ດ້ວຍ.