ຕຳຫລວດຈະລາຈອນ ປກສ ແຂວງວຽງຈັນ ຈັບຊາຍເຊື່ອງຢາບ້າ 6.000 ເມັດໃນກ້ອງເບາະລົດຈັກ

ໃນວັນທີ 13 ເມສາ 2023 ເຈົ້າໜ້າທີ່ຕຳຫລວດຈະລາຈອນ ປກສ ແຂວງວຽງຈັນ ປະຕິບັດໜ້າທີ່ວຽກງານວິຊາສະເພາະ ກໍຄືວຽກງານປ້ອງກັນ, ສະກັດກັ້ນອຸບັດຕິເຫດຈະລາຈອນທາງບົກ ໃນໄລຍະສະເຫລີມສະຫລອງບຸນປປີໃໝ່ລາວ ພສ 2566 ຢູ່ທີ່ຈຸດກວດກາ ເຂດບ້ານປາກແຈ້ງ, ເມືອງວຽງຄຳ, ແຂວງວຽງຈັນ ສາມາດກວດພົບຢາເສບຕິດ ປະເພດຢາບ້າ 6.000 ເມັດ ເຊື່ອງໄວ້ກ້ອງເບາະລົດຈັກ ຈຶ່ງໄດ້ກັກພາຫະນະ ພ້ອມຜູ້ຂັບຂີ່ໄວ້ ແລ້ວສົ່ງໃຫ້ພາກສ່ວນກ່ຽວຂ້ອງດຳເນີນການສືບສວນ-ສອບສວນ ຕາມຂັ້ນຕອນຕໍ່ໄປ.

ຜ່ານການຕັ້ງຈຸດກວດກາປ້ອງກັນ, ສະກັດກັ້ນອຸບັດຕິເຫດຈະລາຈອນທາງບົກ ໃນໄລຍະສະເຫລີມສະຫລອງສົ່ງທ້າຍປີເກົ່າ ຕ້ອນຮັບປີໃໝ່ລາວ ພສ 2566 ໃນຂອບເຂດທົ່ວປະເທດຄັ້ງນີ້ ບໍ່ພຽງແຕ່ເປັນການຮັກສາຄວາມເປັນລະບຽບຮຽບຮ້ອຍ-ປອດໄພ ແລະ ປ້ອງກັນສະກັດກັ້ນການເກີດອຸບັດຕິເຫດ ແຕ່ຍັງສາມາດ ຊ່ວຍໃຫ້ພົບເຫັນສິ່ງທີ່ຜິດກົດໝາຍ ທີ່ກຸ່ມຄົນບໍ່ດີນັ້ນຊຸກເຊື່ອງມານຳພາຫະນະອີກດ້ວຍ.