ເມືອງໄຊເຊດຖາ ຄອງແຊ໋ມ 2 ລາຍການ ແຂ່ງຂັນສິລະປະ-ວັນນະຄະດີນັກຮຽນ ທົ່ວນະຄອນຫຼວງວຽງຈັນ

ນັກຮຽນເມືອງໄຊເຊດຖາ ກວາດແຊ໋ມ 2 ລາຍການ ປະເພດຟ້ອນ ແລະ ຮ້ອງເພງ ໃນການແຂ່ງຂັນສິລະປະ-ວັນນະຄະດີນັກຮຽນມັດທະຍົມສຶກສາທົ່ວນະຄອນຫຼວງວຽງຈັນ (ນວ) ປະຈຳສົກຮຽນ 2022-2023 ເພື່ອສົ່ງເສີມການຈັດຕັ້ງປະຕິບັດ 5 ຫຼັກມູນການສຶກສາແຫ່ງຊາດ ທີ່ກະຊວງສຶກສາທິການ ແລະ ກິລາ ວາງອອກ ໃຫ້ປະກົດຜົນເປັນຈິງ. ຂະນະທີ່ ປະເພດຂັບລຳ ຊະນະເລີດ ຕົກເປັນຂອງໂຮງຮຽນມັດທະຍົມສຶກສາຕອນປາຍ ມິດຕະພາບ ວຽງຈັນ-ໂຮ່ຈິມິນ ຫຼື ມ.ປາຍ ວຽງຈັນ-ໂຮ່ຈິມິນ.

ການແຂ່ງຂັນງານດັ່ງກ່າວ ຈັດຂຶ້ນ ເມື່ອວັນທີ 7 ເມສາ ຜ່ານມາ ທີ່ສູນການຄ້າລາວ-ໄອເຕັກ (ຕຶກເກົ່າ), ໂດຍໃຫ້ກຽດເຂົ້າຮ່ວມ ແລະ ມອບລາງວັນຂອງ ທ່ານ ຄຳພັດ ເພັດລາສີ ຮອງຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ກະຊວງສຶກສາທິການ ແລະ ກິລາ ແລະ ທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ມີບັນດາພະນັກງານ, ຄູ-ອາຈານ ແລະ ຂະແໜງການກ່ຽວຂ້ອງ ຕະຫຼອດຮອດກອງເຊຍຂອງແຕ່ລະເມືອງ ກໍຄື ມວນຊົນລາວເຂົ້າຮ່ວມຊົມ-ເຊຍຢ່າງຟົດຟື້ນມ່ວນຊື່ນ.

ໂອກາດນີ້, ທ່ານ ຫົງແກ້ວ ທຳມະວົງ ຫົວໜ້າຂະແໜງພະລະ-ສິລະປະສຶກສາ ພະແນກສຶກສາທິການ ແລະ ກິລາ ນວ ກ່າວວ່າ: ເພື່ອເຮັດໃຫ້ຊາວໜຸ່ມ-ເຍົາວະຊົນທີ່ມີຄວາມສາມາດ ພອນສະຫວັນ ແລະ ຮັກມັກໃນດ້ານສິລະປະວັນນະຄະດີປະເພດຕ່າງໆໄດ້ເຂົ້າຮ່ວມແຂ່ງຂັນ ທັງເປັນການແລກປ່ຽນບົດຮຽນ ປະສົບການເຊິ່ງກັນ ແລະ ກັນ ໃຊ້ເວລາຫວ່າງໃຫ້ເປັນປະໂຫຍດເພື່ອຫ່າງໄກຈາກຢາເສບຕິດ ພ້ອມກັນນັ້ນຍັງເປັນການຂະຫຍາຍແຜນຍຸດທະສາດທີ່ສອດຄ່ອງກັບ 5 ຫຼັກມູນການສຶກສາແຫ່ງຊາດ ທີ່ກະຊວງສຶກສາທິການ ແລະ ກິລາ ວາງອອກ.

ການແຂ່ງຂັນຄັ້ງນີ້ ມີ 12 ທີມທີ່ມາຈາກ 9 ຕົວເມືອງ ປະກອບມີ ເມືອງຈັນທະບູລີ, ເມືອງສີໂຄດຕະບອງ, ເມືອງສີສັດຕະນາກ, ເມືອງໄຊເຊດຖາ, ເມືອງຫາດຊາຍຟອງ, ເມືອງນາຊາຍທອງ, ເມືອງໄຊທານີ, ເມືອງປາກງື່ມ ແລະ ເມືອງສັງທອງ. ນອກນັ້ນ ກໍຍັງມີໂຮງຮຽນມັດທະຍົມສົມບູນ ລາວ-ຫວຽດນາມ (ມສ ລາວ-ຫວຽດນາມ), ມສ ວຽງຈັນ ແລະ ມ.ປາຍ ວຽງຈັນ-ໂຮ່ຈິມິນ ເຂົ້າຮ່ວມຊີງໄຊ ການແຂ່ງຂັນມີ 3 ລາຍການ ຄື: ປະເພດຟ້ອນ, ປະເພດຮ້ອງເພງ ແລະ ປະເພດຂັບລຳ. ຜ່ານການແຂ່ງຂັນລາຍການຟ້ອນ ຊະນະເລີດ ຕົກເປັນຂອງ ເມືອງໄຊເຊດຖາ, ທີ 2 ເມືອງສີໂຄດ, ທີ 3 ເມືອງຫາດຊາຍຟອງ; ລາຍການຮ້ອງເພງ ຊະນະເລີດ ເປັນຂອງ ເມືອງໄຊເຊດຖາ, ທີ 2 ເມືອງໄຊທານີ ແລະ ທີ 3 ເມືອງຈັນທະບູ; ລາຍການ ຂັບລຳ ຊະນະເລີດເປັນຂອງ ມ.ປາຍ ວຽງຈັນ-ໂຮ່ຈິມິນ, ທີ 2 ເມືອງໄຊທານີ ແລະ ທີ 3 ເມືອງສີໂຄດຕະບອງ.

ພາບ-ຂ່າວ:ໜັງສືພິມສຶກສາ-ກິລາລາຍວັນ