ສປປ ລາວ ເປັນປະເທດສຸດທ້າຍ ແລ່ນທວນໄຟ ງານກິລາຊີເກມ ແລະ ອາຊຽນພາຣາເກມ

ສປປ ລາວ ຈະຈັດນັກກິລາແລ່ນ ຈຳນວນ 300 ຄົນ ກຽມແລ່ນທວນໄຟງານມະຫະກຳກິລາກິລາຊີເກມ ຄັ້ງທີ 32 ແລະ ອາຊຽນພາຣາເກມ ຄັ້ງທີ 12 ປະເທດກໍາປູເຈຍ ຈະຈັດຂຶ້ນໃນວັນທີ 25 ເມສາ 2023 ທີ່ນະຄອນຫຼວງວຽງຈັນ ຊຶ່ງສປປ ລາວ ເປັນປະເທດສຸດທ້າຍ ຖັດຈາກປະເທດມຽນມາ ທີ່ຈະເປັ່ງປະກາຍແປວໄຟຜ່ານສາຍຕາຊາວໂລກ ກໍຄື ຊາວອາຊຽນ ໂດຍຂະບວນແລ່ນຈະມີການກຳນົດ 6 ເສັ້ນທາງສະຖານທີ່ສຳຄັນຕ່າງໆ ປິ່ນອ້ອມຕົວເມືອງນະຄອນຫຼວງວຽງຈັນ ເປັນຈຸດເປົ້າໝາຍໃນການແລ່ນທວນໄຟຂອງສອງງານກິລາດັ່ງກ່າວ.

ໃນຕອນບ່າຍວັນທີ 12 ເມສາ 2023 ໄດ້ມີກອງປະຊຸມຄະນະຮັບຜິດຊອບຫ້າງຫາກະກຽມແລ່ນທວນໄຟ 2 ງານກິລາດັ່ງກ່າວ ຈະຈັດຂຶ້ນ ທີ່ປະເທດກຳປູເຈຍ ໃນເດືອນພຶດສະພານີ້ ໂດຍພາຍໃຕ້ການເປັນປະທານຂອງທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ, ປະທານຄະນະກຳມະການພາຣາແລມປິກແຫ່ງຊາດ ທັງເປັນຮອງປະທານຄະນະກຳມະການໂອແລມປິກແຫ່ງຊາດ, ມີທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ ແລະ ທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ ແລະ ຄະນະຮັບຜິດຊອບໜ້າວຽກຕ່າງໆເຂົ້າຮ່ວມ.

ໂອກາດນີ້, ທ່ານ ນາງ ໂພໄຊ ແພງພົງ ຮອງຫົວໜ້າກົມກິລາລະດັບສູງ, ຄະນະຮັບຜິດຊອບຫ້າງຫາກະກຽມແລ່ນທວນໄຟ ລາຍງານໃຫ້ຮູ້ວ່າ: ໃນການຫ້າງຫາກະກຽມຕ້ອນຮັບຂະບວນແລ່ນທວນໄຟ ກຽມມາແລ່ນຢູ່ ສປປ ລາວ ກໍຄື ນະຄອນຫຼວງວຽງຈັນ ໄດ້ກະກຽມ 2 ໜ້າວຽກສຳຄັນ ຄື ວຽກງານປະສານງານສຳເລັດ ແລະ ວຽກທີ່ໄດ້ກະກຽມ ສຳລັບວຽກປະສານງານ : ຄະນະທູດພິເສດກິລາຊີເກມ ຄັ້ງທີ 32 ມີ 9 ທ່ານ ໂດຍແມ່ນທ່ານຮອງລັດຖະມົນຕີ ກະຊວງທ່ອງທ່ຽວກຳປູເຈຍ ເປັນຫົວໜ້າ ໃນວັນທີ 24 ເມສາ 2023 ຈະໄດ້ກວດກາສະຖານທີ່ຈັດແລ່ນ, ວັນທີ 25 ເມສາ 2023 ຈັດແລ່ນທວນໄຟຢູ່ ນະຄອນຫຼວງວຽງຈັນ, ວັນທີ 26 ເມສາ 2023 ຄະນະທູດກິລາເດີນທາງໄປ ແຂວງຈໍາປາສັກ, ວັນທີ 27 ເມສາ 2023 ຄະນະທູດກິລາ ແລະ ແຂກຖືກເຊີນນໍາຂະບວນທວນໄຟອອກໄປຊາຍແດນ ກໍາປູເຈຍ ໃນການແລ່ນທວນໄຟຄັ້ງນີ້ ຈະມີເງິນສະໜັບສະໜູນຈັດແລ່ນທວນໄຟ ຈຳນວນ 5.000 ໂດລາ.

ສ່ວນວຽກທີ່ກະກຽມ : ໜັງສືແຈ້ງການຈາກ ຄະນະກໍາມະການຈັດການແຂ່ງຂັນກິລາຊີເກມ ຄັ້ງທີ 32 ທີ່ປະເທດກໍາປູເຈຍ, ແຈ້ງການອະນຸຍາດໃຫ້ຈັດແລ່ນທວນໄຟຈາກ ຫ້ອງວ່າການສໍານັກງານນາຍົກລັດຖະມົນຕີ, ຂໍ້ຕົກລົງແຕ່ງຕັ້ງຄະນະຮັບຜິດຊອບ ແລະ ອະນຸກໍາມະການຝ່າຍຕ່າງ, ໄດ້ລົງກວດເສັ້ນທາງແລ່ນ ເລີ່ມແຕ່ສະຖານທູດກຳປູເຈຍ ເຖິງພະທາດຫຼວງ ໄລຍະທາງ 5,5 ກິໂລແມັດ ແລະ ກໍານົດຈຸດນັກກິລາແລ່ນ 6 ຈຸດ ສຳລັບຈຸດທີ 1 ແມ່ນຈະແລ່ນຈາກສານປະຊາຊົນສູງສຸດ ຫາ ວັດສີເມືອງ ໄລຍະທາງ 1.000 ແມັດ, ຈຸດທີ 2 ຈາກວັດສີເມືອງ ຫາ ກະຊວງເຕັກໂນໂລຊີ ແລະ ການສື່ສານ ໄລຍະທາງ 1.200 ແມັດ, ຈຸດທີ 3 ກະຊວງເຕັກໂນໂລຊີ ແລະ ການສື່ສານ ຫາ ກະຊວງກະສິກຳ ແລະ ປ່າໄມ້ ໄລຍະທາງ 1.000 ແມັດ, ຈຸດທີ 4 ກະຊວງກະສິກຳ ແລະ ປ່າໄມ້ ຫາ ທະນາຄານອິນໂດຈີນ ໄລຍະທາງ 1.000 ແມັດ, ຈຸດທີ 5 ຈາກທະນາຄານອິນໂດຈີນ ຫາປະຕູໂຂງທາດຫຼວງ ໄລຍະທາງ 1.000 ແມັດ ແລະ ຈຸດທີ 6 ຈາກປະຕູໂຂງທາດຫຼວງ ຫາ ຕໍ່ໜ້າພະທາດຫຼວງ ໄລຍະທາງ 300 ແມັດ

ໃນກອງປະຊຸມດັ່ງກ່າວ ກໍຍັງໄດ້ມີການປຶກສາຫາລືການປັບປຸງວາລະການແລ່ນທວນໄຟ, ຮ່າງກໍານົດພາກສ່ວນແຂກຖືກເຊີນ, ສະເໜີຂໍນໍາໃຊ້ເດີ່ນພະທາດຫຼວງ ແລະ ຂໍອະນຸມັດຂຶ້ນປ້າຍໂຄສະນາ ແລະ ອອກແບບ, ປະດັບປະດາສະຖານທີ່ພິທີເປີດຢູ່ສະຖານທູດກໍາປູເຈຍ ແລະ ພິທີຖະແຫຼງຂ່າວຢູ່ເດີ່ນພະທາດຫຼວງ (ປ້າຍຜ້າສາກຫຼັງເວທີ, ປ້າຍໂຄສະນາເສົາໄຟ) ສ່ວນໜ້າວຽກທີ່ຈະສືບຕໍ່ກະກຽມ ໄດ້ມີການປະສານແຂວງຈຳປາສັກ ເພື່ອວາງແຜນກະກຽມຕ້ອນຮັບຂະບວນໄຟຊີເກມ ແລະ ນໍາສົ່ງເຖິງຊາຍແດນກໍາປູເຈຍ, ປະສານສົມທົບກັບສະຖານທູດກໍາປູເຈຍ ໃນການກະກຽມສະຖານທີ່ຕ່າງໆ ແລະ ຮ່າງແຜນງົບປະມານຮັບໃຊ້ໃນວຽກງານດັ່ງກ່າວ ເພື່ອໃຫ້ສຳເລັດພາລະກິດຕາມ້ປົ້າໝາຍທີ່ໄດ້ກຳນົດໄວ້.