ຮອງ​ນາ​ຍົກລັດຖະມົນຕີ ແຫ່ງ ສປປ ລາວ ເຂົ້າ​ຮ່ວມ​ງານ​ສະ​ແດງ​ສິນ​ຄ້າ​ບໍ​ລິ​ໂພກ ສາ​ກົນ ທີ່ ສ​ປ ຈີນ

ງານຄັ້ງນີ້, ນອກຈາກ ຈະເປັນການວາງສະແດງສິນຄ້າ ທີ່ມີຄຸນນະພາບ ແລະ ມີຄວາມທັນສະໄໝ ຊັ້ນ​ນໍ​າຂອງໂລກແລ້ວ, ຍັງຈະເປັນ ເວທີສໍາຄັນ ສໍາລັບ ພາກລັດ ແລະ ພາກທຸລະກິດ ຂອງ ສປ ຈີນ ແລະ ບັນດາປະເທດຕ່າງໆ ທີ່ເຂົ້າຮ່ວມງານ ໃນການປຶກສາຫາລື, ແລກປ່ຽນທັດສະນະ ແລະ ປະສົບການທີ່ດີຮ່ວມກັນ, ເພື່ອຊອກຫາຊ່ອງທາງຮ່ວມມືຄ້າຂາຍຮ່ວມກັນ ລວມທັງເປັນການເພີ່ມຄວາມເຊື່ອໝັ້ນໃຫ້ບັນດາຜູ້ປະກອບການ, ຜູ້ຊື້-ຜູ້ຂາຍ ທີ່ມີທ່າແຮງ ທີ່ຢູ່ໃນແຖວໜ້າດ້ານສິນຄ້າອຸປະໂພກ ລວມທັງ ຜູ້ບໍລິໂພກ ຂອງ ສປ ຈີນ ແລະ ປະເທດເຂົ້າຮ່ວມອື່ນໆຈາກທົ່ວໂລກ ໄດ້ໂຄສະນາສິນຄ້າຂອງຕົນ ເພື່ອເປັນການສົ່ງເສີ່ມສິນຄ້າອຸປະໂພກ ປະເພດຕ່າງໆໃຫ້ມີຄຸນນະພາບດີຂຶ້ນ ທັງເປັນການເຊື່ອມໂຍງ ແລະ ຂະຫຍາຍຕະຫຼາດ ສິນຄ້າ ຂອງຕົນອອກສູ່ພາຍນອກ ກໍຄື ຕະຫຼາດສາກົນຫຼາຍຂຶ້ນ ຊຶ່ງໃນງານວາງ​ສະ​ແດງຄັ້ງນີ້ ມີບັນດາບໍລິສັດທີ່ ມາຈາກ 65 ປະເທດ ແລະ ເຂດແຄ້ວນເຂົ້າຮ່ວມ ແລະ ມີສິນຄ້າຫຼາຍກ່ວາ 3.000 ປະເພດ, ໃນນັ້ນ ມີປະມານ 300 ກ່ວາປະເພດທີ່ເປັນສິນຄ້າໃໝ່ຫາກໍເລີ່ມນໍາມານໍ​າສະ​ເໜີ ແລະ ໂຄສະນາ ສູ່ຕະຫຼາດ.​

ໃນໂອກາດເຂົ້າຮ່ວມງານວາງສະແດງໃນຄັ້ງນີ້ ທ່ານຮອງນາຍົກລັດຖະມົນຕີ ຍັງໄດ້ຮັບກຽດໃຫ້ຂຶ້ນມີຄໍາເຫັນໃນພິທີເປີດງານທາງການ ໂດຍທ່ານໄດ້ສະແດງຄວາມຊົມເຊີຍຕໍ່ຝ່າຍ ສປ ຈີນ ໂດຍສະເພາະແຂວງ​​ຫາຍໜານ ແລະ ຄະນະຮັບຜິດຊອບຈັດດງານວາງສະແດງໃນຄັ້ງນີ້ທີ່ສາມາດຈັດງານໄດ້ຢ່າງຍິ່ງໃຫຍ່, ຈົບງາມ ແລະ ມີຄວາມໝາຍສໍາຄັນສອດຄ່ອງກັບສະພາບເສດຖະກິດຂອງໂລກໃນປັດຈຸບັນ, ນອກນັ້ນ ທ່ານຮອງນາຍົກລັດຖະມົນຕີຍັງໄດ້ແຈ້ງໃຫ້ແຂກທີ່ເຂົ້າຮ່ວມໃນພິທີເປີດງານວາງສະແດງຊາບວ່າ ໃນວັນທີ 13 ເມສາ 2023, ສປປ ລາວ ແລະ ສປ ຈີນ ຈະໄດ້ເປີດໃຫ້ບໍລິການລົດໄຟຖ້ຽວປະຖົມມະລືກ ນະຄອນຫຼວງວຽງຈັນ-ຄຸນໝິງ ແລະ ຄຸນໝິງ-ນະຄອນຫຼວງວຽງຈັນ ແລະ ເຊີນຊວນໃຫ້ບັນດາແຂກໄປໃຊ້ບໍລິການ ແລະ ຢ້ຽມຢາມ ສປປ ລາວ.

ໂອ​ກາດ​ເຂົ້າ​ຮ່ວມ​ວາງ​ສະ​ແດງ​ຄັ້ງ​ນີ້, ໃນຕອນເຊົ້າຂອງວັນທີ 10 ເມສາ 2023, ທ່ານຮອງນາຍົກລັດຖະມົນຕີ ຍັງໄດ້ພົບກັບ ​ທ່ານ ວາງ ຢົ້ງ ຮອງປະທານສະພາທີ່ປຶກສາການເມືອງທົ່ວປະເທດ ສປ ຈີນ ແລະ ຕອນບ່າຍຂອງວັນທີ 11 ເມສາ 2023, ພົບປະກັບ ​ທ່ານ ເຟີງ ເຟ່ ກໍາມະການສູນກາງພັກກອມມູນິດຈີນ ເລຂາພັກແຂວງໆຫາຍໜານ ຊຶ່ງການພົບປະໃນຄັ້ງນີ້ ທັງສອງຝ່າຍ ໄດ້ຕີ​ລາຄາ​ສູງຕໍ່ການເປັນປະເທດເພື່ອນມິດຍຸດທະສາດ ຮອບດ້ານໝັ້ນຄົງ ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກຳ ລາວ-ຈີີນ, ຈີນ-ລາວ ໂດຍສະເພາະແມ່ນການຈັດຕັ້ງປະຕິບັດ ແລະ ຜັນຂະຫຍາຍຜົນການພົບປະຂອງສອງເລຂາທິການໃຫຍ່ ລາວ-ຈີນ ໃຫ້ໄດ້ຮັບໝາກຜົນ ລວມທັງການຈັດຕັ້ງຜັນຂະຫຍາຍບັນດາ ເອກະສານທີ່ການນໍາຂັ້ນສູງຂອງທັງສອງປະເທດໄດ້ເຫັນດີ ແລະ ລົງນາມຮ່ວມກັນໃນໄລຍະຜ່ານມາ. ສອງຝ່າຍມີຄວາມຍິນດີເພີ່ມທະວີການພົວພັນຮ່ວມມືນຳກັນພ້ອມທັງ ເຫັນດີຈະສືບຕໍ່ໃຫ້ການຮ່ວມມື ແລະ ຊ່ວຍເຫຼືອຊຶ່ງກັນ ແລະ ກັນໃນ​ຕໍ່ໜ້າ. ນອກຈາກນີ້, ເລຂາພັກແຂວງຫາຍໜານໄດ້ສະແດງຄວາມຂອບໃຈມາຍັງພັກ ແລະ ລັດຖະບານ ສປປ ລາວ ທີ່ໄດ້ສົ່ງຄະນະຜູ້ແທນຂັ້ນສູງທີ່ນຳໂດຍ ທ່ານຮອງນາຍົກລັດຖະມົນຕີ ເພື່ອເຂົ້າຮ່ວມງານວາງສະແດງທີ່ຫາຍໜານ ແລະ ຫາຍໜານມີຄວາມຍິນດີປະກອບສ່ວນເຂົ້າໃນການພົວພັນຮ່ວມມື ລາວ- ຈີນ ແລະ ຈັດຕັ້ງຜັນຂະຫຍາຍການຕົກລົງເຫັນດີຂອງການນໍາຂັ້ນສູງຂອງສອງຝ່າຍ ໃນໂອກາດດັ່ງກ່າວເລຂາພັກແຂວງໄດ້ແຈ້ງສະພາບການພັດທະນາຂອງແຂວງຫາຍໜານ ລວມທັງການຈັດຕັ້ງປະຕິບັດນະໂຍບາຍຂອງສູນກາງພັກ ສປ ຈີນ ຊຶ່ງແຂວງຫາຍໜານແມ່ນໄດ້ຮັບອະຍຸຍາດໃຫ້ສ້າງເປັນເຂດເສດຖະກິດ-ການຄ້າພິເສດ ແລະ ເປັນເຂດປອດພາສີທີ່ໃຫຍ່ທີ່ສຸດໃນ ສປ ຈີນ ໂດຍມີການຊີ້ນຳໂດຍກົງຈາກສູນກາງພັກຂອງ ຈີນ ໂດຍສະເພາະແມ່ນໄດ້ຮັບການຊີ້ນຳຢ່າງໃກ້ຊິດຈາກ ທ່ານ ສີ ​ຈິ້ນຜິງ ເລຂາທິຫານໃຫຍ່ ປະທານປະເທດ ຊຶ່ງທາງແຂວງຫາຍໜານແມ່ນມີທ່າແຮງດ້ານກະສິກຳ ແລະ ການທ່ອງທ່ຽວ ນອກນັ້ນແຂວງຫາຍໜານຍັງມີສູນຄົ້ນຄວ້າທົດລອງດ້ານກະສິກຳ ແລະ ແນວພັນ ປາ, ກຸ້ງ ແລະ ອື່ນໆ.

ທ່ານຮອງນາຍົກຍັງໄດ້ແຈ້ງໃຫ້ຝ່າຍຈີນ ແຂວງຫາຍໜານຊາບວ່າ ປັດຈຸບັນ ພັກ ແລະ ລັດຖະບານ ສປປ ລາວ ກຳລັງສຸມໃ​ສ່ການແກ້ໄຂສະພາບດ້ານເສດຖະກິດ ແລະ ຢາເສບຕິດ ລວມທັງການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມຂອງ ສປປ ລາວ, ນອກນັ້ນ ຍັງໄດ້ສະເໜີມາຍັງອຳນາດການປົກຄອງແຂວງຫາຍໜານ ໃຫ້ຟື້ນຟູການໄປມາຫາສູ່ກັນຂອງປະຊາຊົນສອງຊາດ ໂດຍສະເພາະການພິຈາລະນາເປີດຄືນສາຍການບິນໂດຍກົງ ຈາກຫາຍໜານເຖິງນະຄອນຫຼວງວຽງຈັນ.

​ຂ່າວ: ກະຊວງການຕ່າງປະເທດ