ສະພາຊິລີອະນຸມັດຮ່າງກົດໝາຍ ຫລຸດເວລາເຮັດວຽກ ເຫລືອ “40 ຊົ່ວໂມງຕໍ່ອາທິດ”
ລັດຖະສະພາຊິລີຜ່ານຮ່າງກົດໝາຍທີ່ມີການຖົກຖຽງກັນຢ່າງໜັກ ໃນການຄ່ອຍໆຫລຸດຊົ່ວໂມງການເຮັດວຽກຕໍ່ອາທິດ ຈາກ 45 ຊົ່ວໂມງ ເປັນ 40 ຊົ່ວໂມງ ຖືເປັນໄຊຊະນະທາງກົດໝາຍຂອງປະທານາທິບໍດີ ກາບຽວ ບໍຣິກ ຜູ້ນຳຊິລີ ທ່າມກາງຄະແນນຄວາມນິຍົມຂອງທ່ານເຊິ່ງບໍ່ໝັ້ນຄົງ.
ວັນທີ 12 ເມສາ, ສໍານັກຂ່າວຣອຍເຕີລາຍງານວ່າ: ທ່ານ ບໍຣິກ ຜູ້ໃຫ້ຄໍາໝັ້ນກ່ຽວກັບວາລະໃນການປະຕິຮູບສັງຄົມ ແລະ ເສດຖະກິດ ປະສົບຄວາມລົ້ມເຫລວຫລາຍຄັ້ງ ບໍ່ວ່າຈະເປັນ ຜູ້ມີສິດເລືອກຕັ້ງປະຕິເສດລັດຖະທຳມະນູນສະບັບໃໝ່ທີ່ມີຄວາມກ້າວໜ້າ ແລະ ການເສຍໄຊທາງກົດໝາຍສໍາລັບຮ່າງກົດໝາຍພາສີທີ່ສໍາຄັນ.
ແຕ່ກົດໝາຍຊົ່ວໂມງການເຮັດວຽກຕໍ່ອາທິດ ເຊິ່ງປັດຈຸບັນກໍາລັງລໍຖ້າການລົງນາມຂອງທ່ານ ບໍຣິກ ຖືເປັນໄຊຊະນະນ້ອຍໆສໍາລັບລັດຖະບານຊິລີ ທີ່ພະຍາຍາມເຮັດໃຫ້ປະເທດອອກຫ່າງຈາກລັດຖະທໍາມະນູນຕະຫລາດເສລີ ໂດຍກົດໝາຍໃໝ່ກໍານົດໃຫ້ປະຊາຊົນເຮັດວຽກໜ້ອຍລົງວັນລະ 1 ຊົ່ວໂມງ ສົ່ງຜົນໃຫ້ຊິລີຢູ່ໃນແນວປະຕິບັດດຽວກັບປະເທດພັດທະນາແລ້ວສ່ວນຫລາຍ.
ຮ່າງກົດໝາຍດັ່ງກ່າວ ເຊິ່ງໄດ້ຮັບສຽງສະໜັບສະໜູນຢ່າງຫລວງຫລາຍ ດ້ວຍຄະແນນສຽງເຫັນພ້ອມ 127 ສຽງ ຕໍ່ສຽງຄັດຄ້ານພຽງ 14 ພຽງ ມີຂຶ້ນເມື່ອປະເທດຕ່າງໆທົ່ວໂລກເຊັ່ນ: ອັງກິດ ແລະ ແອັສປາຍ ກໍາລັງທົດລອງຫລຸດຊົ່ວໂມງການເຮັດວຽກໃນແຕ່ລະອາທິດຫລາຍກວ່າເກົ່າ.
ເຖິງວ່າບໍລິສັດຫລາຍແຫ່ງໃນຊິລີ ປະກາດວ່າ: ພວກເຂົາຈະນໍາເອົາຮ່າງກົດໝາຍນີ້ມາໃຊ້. ເຖິງຢ່າງໃດກໍຕາມ, ບໍລິສັດຂະໜາດນ້ອຍບາງແຫ່ງວິພາກວິຈານກົດໝາຍສະບັບໃໝ່ ໂດຍກ່າວວ່າ: ພວກເຂົາບໍ່ມີຊັບພະຍາກອນພຽງພໍຈະຈ້າງແຮງງານເພີ່ມ ແລະ ທົດແທນຊົ່ວໂມງເຮັດວຽກທີ່ຫາຍໄປ.
