ອັລ ນາສເຊີ ປົດ ກາເຊຍ ພົ້ນຕຳແໜ່ງຜູ້ຈັດການທີມ ຫລັງ ໂຣນັລໂດ ບໍ່ພໍໃຈແນວທາງນຳທີມ

ສື່ເປີດເຜີຍວ່າ ອັລ ນາສເຊີ ໄດ້ຕັດສິນໃຈປົດ ຣູດີ ກາເຊຍ ພົ້ນຕຳແໜ່ງຜູ້ຈັດການທີມແລ້ວ ຫລັງ ຄຣິສຕຽນໂນ ໂຣນັລໂດ ດາວເຕະຊຸບເປີສະຕາ ໄດ້ແຈ້ງໃຫ້ສະໂມສອນຊາບວ່າ ບໍ່ພໍໃຈແນວທາງນຳທີມຂອງຄູຝຶກລາຍນີ້.

ໂດຍ ໂຣນັລໂດ ຍ້າຍມາຫລິ້ນກັບ ອັລ ນາສເຊີ ທີມດັງຂອງລີກຊາອຸດິອາຣະເບຍເມື່ອຕະຫລາດນັກເຕະເດືອນມັງກອນທີ່ຜ່ານມາ ດ້ວຍຄ່າເມື່ອຍລະດັບສະຖິຕິໂລກ 173 ລ້ານປອນ/ປີ.

ແນວໃດກໍຕາມເຖິງ ໂຣນັລໂດ ຈະສະແດງຜົນງານໃຫ້ຕົ້ນສັງກັດໃຫມ່ໄດ້ຢ່າງດີເດັ່ນດ້ວຍການຍິງໄປ 11 ປະຕູຈາກການລົງສະໜາມ 13 ເກມ ລວມທຸກລາຍການ ແຕ່ເບິ່ງຄືວ່າຄວາມສຳພັນຂອງລາວກັບກາເຊຍນັ້ນ ເປັນໄປບໍ່ຄ່ອຍດີ.

່ກ່ອນໜ້ານີ້ ກາເຊຍ ເຄີຍຕຳນິ ໂຣນັລໂດ ຜ່ານສື່ວ່າໃຊ້ໂອກາດເປືອງ ລວມເຖິງເຊື່ອວ່າ ໂຣນັລໂດ ຈະບໍ່ແຂວນສະຕັດກັບ ອັລ ນາສເຊີ ແຕ່ຈະກັບມາຫລິ້ນໃນລີກຢູໂຣບອີກເທື່ອຫນຶ່ງເປັນຕົ້ນ.

ຈົນຫລ້າສຸດ ເດຍຣີໂອ ອາສ ສື່ໃນສະເປນເປີດເຜີຍວ່າ ອັລ ນາສເຊີ ໄດ້ປົດ ກາເຊຍ ອອກຈາກຕຳແໜ່ງດັ່ງກ່າວແລ້ວ ຫລັງ ໂຣນັລໂດ ແຈ້ງໃຫ້ສະໂມສອນຊາບເຖິງຄວາມບໍ່ພໍໃຈກັບຜົນງານ ແລະ ແນວທາງຂອງຜູ້ຈັດການທີມ.

ຂະນະທີ່ ມາກາ ສື່ໃນສະເປນອີກສຳນັກລະບຸວ່າ ສາເຫດທີ່ ກາເຊຍ ຖືກປົດນັ້ນເກີດຈາກຄວາມສຳພັນທີ່ບໍ່ດີຂອງລາວກັບລູກທີມຫລາຍຄົນ ບໍ່ແມ່ນພຽງ ໂຣນັລໂດ ເທົ່ານັ້ນ.

ເຖິງຢ່າງໃດກໍຕາມ ຍັງບໍ່ມີການຢືນຢັນເລື່ອງການປົດ ກາເຊຍ ອອກຈາກຕຳແໜ່ງຜູ້ຈັດການທີມຢ່າງເປັນທາງການຈາກໂມສອນແຕ່ຢ່າງໃດ.