ຢ່າຫລົງໄປຕົກຫລຸມເຊື່ອການໂຄສະນາເກີນຈິງ ເຂົ້າເປັນສະມາຊິກ3ເດືອນສາມາດສ້າງລາຍໄດ້ເປັນ100ລ້ານ
ໃນຊ່ວງໄລຍະນີ້ ເຫັນວ່າການໂຄສະນາຜ່ານສື່ອອນລາຍເພື່ອຊັກຊວນອວນຕ້ານກັນໄປເຂົ້າໃນກຸ່ມຫາລາຍໄດ້ແບບງ່າຍດາຍ ຫລືວ່າ ບໍ່ແນ່ນອນໝັ້ນຄົງນັ້ນ ແມ່ນມີຖົມເຖ ແລະ ນັບມື້ນັບຫລາຍຂື້ນຕິກໆ ບາງບຸກຄົນ ຫລື ກຸ່ມຄົນກໍໂຄສະນາວ່າເປັນວິທີສ້າງລາຍຮັບໄດ້ມະຫາສານໂດຍບໍ່ຕ້ອງມີທຶນຮອນຫລາຍກໍສາມາດເຮັດໄດ້ ຂໍພຽງແຕ່ວ່າມີຄວາມອົດທົນ ແລະ ມີແຮງສູ້ ຫລື ນັັ່ງກົດໂທລະສັບຢູ່ເຮືອນກະສາມາດສ້າງລາຍຮັບໄດ້ແລ້ວວ່າຊັນ. ຖ້າຜູ້ໃດສົນໃຈຂໍໃຫ້ທັກມາຕິດຕໍ່ພົວພັນ ແລະ ບາງກຸ່ມກໍໃຫ້ໂອນເງິນເຂົ້າບັນຊີ ເພື່ອເຂົ້າເປັນສະມາຊິກກ່ອນ ແລ້ວທີ່ມາຂອງງານມັນຈະລາບລື່ນ ແລະ ອື່ນໆສາລະພັດຢ່າງ. ນອກຈາກນັ້ນ ກໍຍັງມີຫລາກຫລາຍຮູບການວິທີການທີ່ຊວນເຊື່ອ, ແຕ່ສຸດທ້າຍເມື່ອຫລາຍຄົນເຂົ້າໄປຄຸງເຖິງຕົວຈິງແລ້ວ ກໍຈະກາຍເປັນຮູບແບບຕ່ອງໂສ້ ເນັ້ນຊອກສະມາຊິກໜ້າໃຫມ່ໄປຕິກໆເພື່ອເອົາຜົນກຳໄລຈາກເງິນລົງສະໝັກເປັນຊະມາຊິກ.
ທິດກໍ່າຂໍຍົກເອົາຕົວຢ່າງໜຶ່ງທີ່ໄດ້ເຫັນເຂົາໂຄສະນາໃນສື່ອອນລາຍວ່າຫາເງິນພຽງ 3 ເດືອນໄດ້ຮອດ 100 ລ້ານກີບ ເຮັດໄປໄດ້ຫົກເດືອນກໍໄດ້ຮອດ 200 ລ້ານກີບ ບໍ່ນັບທັງເງິນເຂົ້າບັນຊີໃນແຕ່ລະມື້ທີ່ໄດ້ຖອນໃນແຕ່ລະໄລຍະ. ແຕ່ວ່າທາງເຈົ້າຂອງເຟສ (ຂໍສະຫງວນຊື່) ກໍບໍ່ໄດ້ບອກແຈ້ງວ່າລາຍຮັບເຫລົ່ານັ້ນມາຈາກທຸລະກິດອັນໃດ, ຢູ່ໃສ ແລະ ມີທີ່ໄປທີ່ມາແນວໃດ? ນີ້ເປັນພຽງຕົວຢ່າງໜຶ່ງທີ່ຢາກເຕືອນໃຫ້ຜູ້ບໍລິໂພກ ສື່ອອນລາຍທັງຫລາຍຕ້ອງໄດ້ພາກັນຄິດ ແລະ ພ້ອມກັນວິເຄາະເບິ່ງວ່າມັນມີແທ້ ຫລື ເວົ້າເກີນຄວາມເປັນຈິງ ເພາະສື່ອອນລາຍສະໄໝນີ້ ຄວາມຈິງກັບຄວາມເທັດມັນປົນເປກັນ ອັນສຳຄັນແມ່ນຂຶ້ນກັບຜູ້ບໍລິໂພກ. ບົດຮຽນທີ່ເຄີຍເກີດຂື້ນດັ່ງການໂຄສະນາຊວນເຊື່ອໃຫ້ໄປລົງທຶນທີ່ສ້າງຄວາມເຈັບປວດໃຫ້ຄົນລາວຫລາຍໆຄົນມາແລ້ວເຊັ່ນ: ແມັກກີ້, ເອຊຽນເຟສ, ຟິງໂກ້……ອື່ນໆ ແລະ ໂຕທີ່ໂດ່ງດັງສ້າງຜົນເສຍຫາຍໃຫ້ຄົນທີ່ຫລົງເຊື່ອເຂົ້າຮ່ວມລົງທຶນກໍຄື ບໍລິສັດ ພີເອັສ ນັ້ນເອງ.
ເມື່ອເອີ່ຍເຖິງແຫລ່ງຂໍ້ມູນຂ່າວສານຈາກສື່ອອນລາຍໃນສະໄໝນີ້ ມັນມີຫລາກຫລາຍສັບມະປິ ແລະ ໄວກວ່າຈະຫລວດຕັ້ງຫລາຍຮ້ອຍຫລາຍພັນເທົ່າ. ບັນດາແຫລ່ງຂ່າວເຫລົ່ານັ້ນ ມັນກໍມີຫລາຍຮູບຫລາຍສີສັນ, ຫລາຍຊ່ອງທາງໃຫ້ເລືອກ ສຸດແລ້ວແຕ່ຜູ້ຈະສັນຫາບໍລິໂພກ. ການບໍລິໂພກຂ່າວໃນສື່ອອນລາຍມັນກໍເຮັດໃຫ້ຄົນເຮົາມີຫລາຍຄວາມຮູ້ສຶກ ທັງອັນດີ ແລະ ອັນຮ້າຍ, ທັງຫລາຍແນວຄວາມຄິດ, ມີທັງອັນໂສກເສົ້າໂສກາ, ຕະຫລົກເຮຮາມ່ວນຊື່ນ ທັງເຫັນຂອງຫອມຂອງເໝັນ, ຂອງແທ້ຂອງປອມ, ບາງແຫລ່ງສື່ກໍໃຊ້ວິທີໂຄສະນາຕົວະຍົວະຫລອກລວງໃຫ້ຄົນເຮົາຫລົງເຊື່ອໄປແບບບໍ່ມີມູນຄວາມຈິງ ຫລື ເກີນເຫດ ເຊິ່ງແຫລ່ງຂ່າວປະເພດນີ້ເຂົາເອີ້ນວ່າ ຂ່າວປອມ ຫລືວ່າ ຂ່າວເທັດນັ້ນເອງ. ນີ້ຄືທີ່ມາຂອງຂໍ້ມູນຂ່າວສານໃນຍຸກ 4.0 ທີ່ພວມກິນໃຈຄົນໄປແຕ່ລະມື້ ແລະ ພວມຈະນັບມື້ກ້າວໄປສູ່ຍຸກ 5.0 ໃນຂະບວນວິວັດການຂະຫຍາຍຕົວຂອງເຕັກໂນໂລຊີ ກໍຄືການຂະຫຍາຍຕົວຂອງສັງຄົມມະນຸດໃນຍຸກໂລກາພິວັດ.
ແຕ່ວ່າແນວໃດກໍຕາມ, ການສະແຫວງຫາບັນດາຂໍ້ມູນຂ່າວສານຕ່າງໆທີ່ເປັນປະໂຫຍດແກ່ເຮົາ ໂດຍສະເພາະແມ່ນການບໍລິໂພກຂ່າວໃນສື່ອອນລາຍນັ້ນ ດີແທ້ພວກເຮົາຕ້ອງເສບຂ່າວທີ່ມີມູນຄວາມຈິງ ບໍ່ຄວນເຊື່ອ ແລະ ຫລົງໄຫລກັບການໂຄສະນາຊວນເຊື່ອທີ່ໄຮ້ປະໂຫຍດ ແລະ ບໍ່ມີຫລັກຖານຄວາມຈິງມາຢັ້ງຢືນ.
ຢ່າຫລົງເຊື່ອຈົນກາຍເປັນຄືເຫດການທີ່ເຄີຍເກີດຂຶ້ນ ແລະ ໂດ່ງດັງໄປທົ່ວສັງຄົມລາວກະຄືເຫດການຫລອກລະດົມທຶຶນ, ຮ່ວມລົງທຶນຂອງບໍລິສັດ ພີເອັສ, ເຈ້ທິບ ແລະ ກໍລະອື່ນໆ ທີ່ໄດ້ສ້າງຄວາມເສຍຫາຍມະຫາສານ ແລະ ເຈັບປວດໃຫ້ຫລາຍໆຄົນ.
ໂດຍ: ທິດກ່ຳ
