ເຈົ້າໜ້າທີ່ ປກສ ລາຍງານຂໍ້ມູນເບື້ອງຕົ້ນ ເຫດຄາຕະກຳເສຍຊີວິດ 3 ຄົນ ຢູ່ເມືອງແອດ ແຂວງຫົວພັນ
ວັນທີ 12 ເມສາ 2023 ນີ້, ປກສ ເມືອງແອດ ແຂວງຫົວພັນ ລາຍງານວ່າ: ໃນເວລາປະມານ 22:00 ໂມງ ຂອງວັນທີ 10 ເມສາ 2023 ຜ່ານ, ເກີດເຫດຄາຕະກໍາ ມີຜູ້ເສຍຊີວິດ 3 ຄົນ ຢູ່ເສັ້ນທາງແຄມທົ່ງນາລະຫວ່າງ ບ້ານເມືອງແອດ ຫາ ບ້ານແກ່ວແຮ່ ເມືອງແອດ ແຂວງຫົວພັນ.
ຂໍ້ມູນຜູ້ເສຍຊີວິດຄື: ທ. ໂພນໄຊ ບຸນມີໄຊ 29 ປີ ປະຊາຊົນ ບ້ານນາປາ ຖືກຄາດຕະກໍາດ້ວຍການໃຊ້ຂອງມີຄົມພັນເຂົ້າຄໍ ງ່ອນດົ້ນ ຫົວ ມື ແຂນ ບ່າໄຫລ່ ຫລາຍບາດ, ເສຍຊີວິດຄາທີ່; ທ. ລີນ້ອຍ 33 ປີ ປະຊາຊົນ ບ້ານພຽງຢາງ ຖືກລູກປືນທະລຸເຂົ້າຄໍດ້ານຊ້າຍໜຶ່ງລູກ, ບ່າໄຫລ່ຊ້າຍໜຶ່ງລູກ ກົກແຂນຊ້າຍ ໜຶ່ງລູກ ແລະ ເຂົ້າດ້ານຫລັງເບື້ອງຂວາທະລຸອອກຫວ່າງເອິກດ້ານໜ້າ ເສຍຊີວິດຄາທີ່; ແລະ ທ. ແອລີ 29 ປີ ປະຊາຊົນ ບ້ານພຽງຢາງ ຖືກລູກປືນຊອດທະລຸເຂົ້າຫົວໜຶ່ງລູກ ເສຍຊີວິດຄາທີ່, ເຊິ່ງທັງສາມຄົນຢູ່ເມືອງແອດ ແຂວງຫົວພັນ.
ໃນສະຖານທີ່ເກີດເຫດພົບເຫັນວັດຖຸຂອງກາງ ມີລົດຈັກ 2 ຄັນ; ເຮໂຣອິນ 5 ແທ່ງ; ຄ້າຍຄືຢາໄອ້ 3 ແພັກ, ປືນສັ້ນ 1 ກະບອກ; ກະສອບລູກປືນ 5 ກະສອບ; ມີດ 2 ດວງ ແລະ ບັນດາເຄື່ອງຕິດຕົວອີກຈໍານວນໜຶ່ງ.
ສ່ວນສາເຫດແຮງຈູງໃຈ ແລະ ບຸກຄົນກໍ່ເຫດ ທາງເຈົ້າໜ້າທີ່ພວມດໍາເນີນການສືບສວນ-ສອບສວນ ເກັບກໍາຂໍ້ມູນຄວາມຈິງ ແລ້ວຈະແຈ້ງຂ່າວໃຫ້ຊາບຕື່ມພາຍຫລັງ.
