ປະທານາທິບໍດີເບຣຊິນເດີນທາງຢ້ຽມຢາມຈີນ ຫວັງກະຕຸ້ນການຄ້າ-ການລົງທຶນ ເພີ່ມບົດບາດໃນເວທີໂລກ

ທ່ານ ລູອິຊ ອິນາຊິໂອ ລູລາ ດາ ຊິວວາ ປະທານາທິບໍດີເບຣຊິນ ເປັນຜູ້ນໍາປະເທດຄົນຫລ້າສຸດທີ່ກຽມເດີນທາງຢ້ຽມຢາມຈີນໃນວັນທີ 12 ເມສານີ້ ເພື່ອເຂົ້າພົບປະທານປະເທດ ສີຈິ້ນຜິງ ຂອງຈີນ ຫວັງກະຕຸ້ນການຄ້າ ແລະ ການລົງທຶນລະຫວ່າງທັງສອງປະເທດ ລວມທັງເພີ່ມບົດບາດທາງດ້ານການທູດຂອງຕົນໃນເວທີໂລກ ຫລັງຈາກກັບຂຶ້ນມາຮັບຕໍາແໜ່ງຜູ້ນໍາເບຣຊິນອີກເມື່ອບໍ່ດົນມານີ້.

ທ່ານ ລູລາ ໃຫ້ສໍາພາດຕໍ່ສະຖານີວິທະຍຸເບຣຊິນກ່ອນອອກເດີນທາງວ່າ: ທ່ານຈະຮັດແໜ້ນການພົວພັນກັບຈີນ ໂດຍທ່ານ ລູລາ ຈະເຊີນທ່ານ ສີຈິ້ນຜິງ ເດີນທາງຢ້ຽມຢາມເບຣຊິນຢ່າງເປັນທາງການ ເພື່ອເຈລະຈາຫາລື ແລະ ປະຊຸມທະວີພາຄີ ລວມທັງໃຊ້ເວທີດັ່ງກ່າວນໍາສະເໜີໂຄງການຕ່າງໆທີ່ຕ້ອງການດຶງດູດການຄ້າ-ການລົງທຶນຈາກຈີນ.

ການເດີນທາງຢ້ຽມຢາມຈີນຂອງທ່ານ ລູລາ ໃນຄັ້ງນີ້ເກີດຂຶ້ນຊັກຊ້າ ເນື່ອງຈາກທ່ານຫາກໍຕິດເຊື້ອໃນລະບົບທາງເດີນຫາຍໃຈ ແລະ ເກີດຂຶ້ນຫລັງຈາກຜູ້ນໍາເບຣຊິນເດີນທາງຢ້ຽມຢາມອາເມລິກາ ເພື່ອເຂົ້າພົບປະທານາທິບໍດີ ໂຈ ໄບເດນ ປະມານ 2 ເດືອນກ່ອນ ໂດຍທ່ານ ລູລາ ກໍາລັງຜະເຊີນຄວາມທ້າທາຍໃນຫລາຍດ້ານ ໂດຍສະເພາະການຟື້ນຟູບົດບາດຂອງເບຣຊິນໃນເວທີໂລກ ລວມທັງການປົກປ້ອງເນື້ອທີ່ປ່າອາເມຊອນຈາກການລັກລອບຕັດໄມ້ທໍາລາຍປ່າທີ່ມີທ່າອ່ຽງຮຸນແຮງຂຶ້ນ ໃນໄລຍະທີ່ເບຣຊິນຢູ່ພາຍໃຕ້ການນໍາຂອງທ່ານ ຢາອີ ໂບລໂຊນາໂຣ ປະທານາທິບໍດີເບຣຊິນຄົນກ່ອນ.

ທ່ານ ລູລາ ມີກໍານົດເດີນທາງເຂົ້າຮ່ວມສະແດງຄວາມຍິນດີໃນພິທີສາບານຕົນຂອງທ່ານ ນາງ ດິວມາ ຣຸສເຊບ ອະດີດປະທານາທິບໍດີຂອງເບຣຊິນ ທີ່ໄດ້ຮັບເລືອກໃຫ້ດໍາລົງຕໍາແໜ່ງຜູ້ນໍາຄົນໃໝ່ຂອງ “ທະນາຄານເພື່ອການພັດທະນາໃໝ່” (NDB) ຂອງກຸ່ມປະເທດທີ່ມີການພັດທະນາທາງເສດຖະກິດຢ່າງວ່ອງໄວ ຄືກຸ່ມ BRICS ທີ່ປະກອບມີ ເບຣຊິນ, ຣັດເຊຍ, ອິນເດຍ, ຈີນ ແລະ ອາຟຣິກາໃຕ້ ກ່ອນທ່ານ ລູລາ ຈະເຂົ້າພົບທ່ານ ສີຈິ້ນຜິງ ໃນວັນທີ 14 ເມສານີ້.

ຂະນະທີ່ທາງການຈີນລະບຸວ່າ: ຈີນພ້ອມຈະປະສານການຮ່ວມມືກັບເບຣຊິນ ໂດຍຈະໃຊ້ໂອກາດໃນການເດີນທາງຢ້ຽມຢາມຄັ້ງນີ້ຍົກລະດັບການພົວພັນ ແລະ ການຮ່ວມມືກັນລະຫວ່າງສອງປະເທດໃນມິຕິຕ່າງໆ ລວມທັງເນັ້ນການສ້າງພະລັງງານທາງບວກ ຕະຫລອດຈົນການເປັນອັນໜຶ່ງອັນດຽວກັນ, ຮ່ວມມືກັນ ແລະ ຕອບສະໜອງຕໍ່ຄວາມທ້າທາຍລະດັບໂລກຮ່ວມກັນ.

ອ້າງອີງ:

https://buenosairesherald.com/…/lula-says-he-will…

https://www.aljazeera.com/…/brazils-lula-heads-to-china…

https://www.scmp.com/…/whats-store-brazils-president…